قازاقستان دەۆيس كۋبوگىنىڭ شيرەك فينالىنا شىقتى

استانا. 8 ناۋرىز. دەۆيس كۋبوگىنىڭ 1/8 فينالىندا قازاقستان يتاليانى 3:2 ەسەبىمەن جەڭىپ, جارىستىڭ شيرەك فينالىنا شىقتى. بۇل تۋرالى egemen.kz حابارلادى. قوس كوماندا اراسىنداعى سوڭعى شەشۋشى ويىن وتانداسىمىز الەكساندر نەدوۆەسوۆ پەن يتاليالىق فابيو فونيني اراسىندا ءوتتى. العاشقى سەتتە قارسىلاستار ءوز مۇمكىندىكتەرىنىڭ بارلىعىن پايدالانىپ, ەسەپتى 6:6-عا جەتكىزدى. سوعان بايلانىستى جەڭىمپاز تاي-برەيك ارقىلى انىقتالىپ, ساشا بۇل سىندا 7:5 ەسەبىمەن جەڭىسكە جەتتى. ەكىنشى جانە ءۇشىنشى سەت يتاليالىقتىڭ باسىمدىعىمەن ءوتتى. الدىمەن فونيني 2-كەزەڭدى 6:3 ەسەبىمەن ءوز پايداسىنا اياقتاپ, تارازى باسىن تەڭەستىردى. سونداي-اق, كەلەسى كەزەڭدە 6:4 ەسەبىمەن جەڭگەن ول جالپىەسەپتە العا شىقتى. جەرگىلىكتى جانكۇيەرلەردىڭ قولداۋىنان قۋات العان الەكساندر 4-سەتتى وتە شيراق باستادى. ناتيجەسىندە, 6:3 ەسەبىمەن باسىم ءتۇسىپ, ويىننىڭ جالپىەسەبىن 2:2-گە جەتكىزدى. شەشۋشى سەتتە قارسىلاستار ءار دوپ ءۇشىن ايقاسىپ, ناعىز تارتىستىڭ ۇلگىسىن كورسەتتى. ءدال وسى كەزەڭدە بەس مارتە برەيك جاسالعانىن ايتا كەتەيىك. ونىڭ ۇشەۋى ءبىزدىڭ تەننيسشىنىڭ ەنشىسىنە جازىلسا, ەكى رەت فونيني ساشانىڭ دوبىن ءوز پايداسىنا اياقتادى. سەت قورىتىندىسى بويىنشا نەدوۆەسوۆ 7:5 ەسەبىمەن قارسىلاسىنان ايلاسىن اسىردى. سونىڭ ناتيجەسىندە, ويىندا 3:2 (7:6 (7:5), 3:6, 4:6, 6:3, 7:5) ەسەبىمەن جەڭىسكە جەتىپ, كوماندامىزدى دەۆيس كۋبوگىنىڭ كەلەسى اينالىمىنا الىپ شىقتى. ايتا كەتەيىك, بۇگىندە الەكساندر اتر رەيتينگىندە 130-ورىندا كەلەدى. ال فونيني الەمنىڭ 22-راكەتكاسى. جارىستىڭ شيرەك فينالىندا دياس دوسقاراەۆ جاتتىقتىراتىن ۇلتتىق قۇرامامىز اۆستراليامەن وينايدى. ءوز كەزەگىندە, جاسىل قۇرلىق وكىلدەرى چەحيا تەننيسشىلەرىنەن 3:1 ەسەبىمەن باسىم تۇسكەن بولاتىن. ەلامان قوڭىر. دەرەك: egemen.kz. سۋرەت: daviscup.com.