«بارىس» «اۆانگاردپەن» ايقاستا جالپى ەسەپتى تەڭەستىردى

استانا. 8 ناۋرىز. قۇرلىقتىق حوككەي ليگاسىنىڭ پلەي-وفف باسەكەسىندە باق سىنايتىن استانانىڭ «بارىسى» ومبىنىڭ «اۆانگاردىمەن» التىنشى ويىندى وتكىزدى. استاناداعى «قازاقستان» سپورت كەشەنىندە وتكەن تارتىستا «بارىس» 4:1 ەسەبىمەن جەڭىسكە جەتتى. بۇل تۋرالى egemen.kz حابارلادى. العاشقى كەزەڭ اسا تارتىستى وتكەنىمەن, ەسەپ اشىلمادى. ال ەكىنشى كەزەڭدە ايدىن يەلەرى تىزگىندى ءوز قولدارىنا الىپ, جۇيەلى ويىن ورنەگىن كورسەتتى. ناتيجەسىندە ويىننىڭ 25-مينۋتىندا رومان ساۆچەنكو مەرگەندىگىمەن كوزگە ءتۇسىپ, كومانداسىن العا شىعاردى. ارادا نەبارى ەكى مينۋت وتكەندە, «بارىس» حوككەيشىلەرى ەسەپتى ەسەلەدى. بۇل جولى ناتيجەلى سوققى جاساعان رومان ستارچەنكو. ءۇشىنشى كەزەڭ «اۆانگاردتىڭ» باسىمدىعىمەن باستالدى. 45-مينۋتتا كيريلل سەمەنوۆ يان لاتسو قورعاعان قاقپادان ساڭىلاۋ تاۋىپ, ەسەپ ايىرماسىن قىسقارتتى. دەگەنمەن, كەزەڭنىڭ قالعان بولىگى استانالىقتاردىڭ باقىلاۋىمەن ءوتتى. قارسىلاستارىنىڭ قىسىمىنا شىداماعان «اۆانگاردتىڭ» قوس بىردەي حوككەيشىسى - نيكولاي گلۋحوۆ پەن ۆاديم حوميتسكي 11 جانە 12-مينۋتتاردا بىرىنەن سوڭ ءبىرى ايدىننان قۋىلدى. ويىنشى باسىمدىعىن پايدالانا الماعانىمەن, «بارىس» حوككەيشىلەرى 16-مينۋتتا ءۇشىنشى شايبالارىن سوقتى. داستين بويدتان پاس العان نايدجەل دوۋس گولدىڭ اۆتورى اتاندى. ويىننىڭ سوڭعى مينۋتىندا «اۆانگاردتىڭ» باس جاتتىقتىرۋشىسى رايمو سۋماننەن قاقپاشىنىڭ ورنىنا التىنشى ويىنشىنى شىعارىپ, تاۋەكەلگە بەل بۋدى. الايدا, بۇل ارەكەتى ەش ناتيجە بەرمەدى. ەسەسىنە, ايدىن يەلەرى ساپىنان كونستانتين پۋشكارەۆ بوس قاقپانى ءدال كوزدەپ ەسەپتى 4:1-گە جەتكىزدى. وسى جەڭىسىنەن كەيىن «بارىس» پەن «اۆانگارد» اراسىنداعى ايقاستىڭ جالپى ەسەبى تەڭەسىپ, 3:3-كە جەتتى. سوڭعى شەشۋشى ويىن 10 ناۋرىزدا ومبىدا وتەدى. سول تارتىستا جەڭىسكە جەتكەن كوماندا گاگارين كۋبوگى ءۇشىن جارىستى جالعاستىرادى. ەلامان قوڭىر. دەرەك: egemen.kz. سۋرەت: hcbarys.kz.