پولتورانين الەم كۋبوگى كەزەڭىندە ەكىنشى ورىن الدى

استانا. 8 ناۋرىز. فينليانديانىڭ لاحتي قالاسىندا ءوتىپ جاتقان شاڭعىدان الەم كۋبوگىنىڭ كەزەكتى كەزەڭىندە وتانداسىمىز الەكساندر پولتورانين كۇمىس جۇلدەگە قول جەتكىزدى. ول 15 كيلومەترگە سوزىلعان كلاسسيكالىق جارىستا مارە سىزىعىن ەكىنشى بولىپ قيدى. بۇل تۋرالى egemen.kz حابارلادى. الەكساندر جارىس جولىن 34 مينۋت 54,2 سەكۋندتا ءجۇرىپ ءوتتى. ال ءبىزدىڭ شاڭعىشىدان مارەگە ءۇش سەكۋند ەرتە كەلگەن (34:51,2) يتاليان فرانچەسكو دە فابياني كەزەڭ جەڭىمپازى اتاندى. قولا جۇلدە جارىس قوجايىنى سامي ياۋحويارۆيگە بۇيىردى. ول جەڭىمپازدان 4,6 سەكۋند قالىپ قويدى. وسى جارىسقا قاتىسقان تاعى ءبىر وتانداسىمىز دەنيس ۆولوتكا مارەگە 65-ءشى بولىپ كەلدى. دەنيس 15 كيلومەتردى 38:29,5 ۋاقىتتا ءجۇرىپ ءوتتى. سايىسقا قاتىسۋعا بارلىعى 73 شاڭعىشى ءوتىنىش ءبىلدىرىپ, سونىڭ 71-ءى جارىس جولىنا شىققانىن ايتا كەتەيىك. وتكەن جىلدىڭ قاراشاسىندا باستاۋ العان الەم كۋبوگى جارىسى وسى ناۋرىز ايىندا اياقتالادى. سوڭعى ەكى كەزەڭ 11, 14 ناۋرىز كۇندەرى نورۆەگيانىڭ دراممەن جانە وسلو قالالارىندا وتەدى. بۇگىنگە دەيىنگى كەزەڭدەردىڭ قورىتىندىسى بويىنشا الەكساندر پولتورانين جالپى ەسەپتە 9-ورىندا كەلەدى. ونىڭ ەنشىسىندە 457 ۇپاي بار. ال كوش باسىندا 1211 ۇپايمەن مارتين سۋننبيۋ (نورۆەگيا) كەلەدى. ەلامان قوڭىر. دەرەك: egemen.kz. سۋرەت: ski-nordique.net.