استانا. 8 ناۋرىز. تەننيستەن دەۆيس كۋبوگىنىڭ 1/8 فينالىندا ميحايل كۋكۋشكين الەمنىڭ 35-راكەتكاسى اندرەاس سەپپيدى 3:0 (7:6 (10:8), 6:0, 6:4) ەسەبىمەن جەڭدى. سونىڭ ناتيجەسىندە, قازاقستان مەن يتاليا اراسىنداعى ايقاستا تارازى باسى تەڭەسىپ, ەسەپ 2:2-گە جەتتى. بۇل تۋرالى egemen.kz حابارلادى.
العاشقى سەتتە قارسىلاستار ءبىر-بىردەن برەيك جاساپ, جەڭىمپازدى انىقتاۋ ءۇشىن تاي-برەيككە جۇگىندى. بۇل سىندا تەننيسشىلەر 18 مارتە دوپتى ويىنعا قوسقانىن ايتا كەتەيىك. سونىڭ 10-ىندا وتانداسىمىزدىڭ مەرەيى ۇستەم بولدى.
ەكىنشى سەتتە يتاليا سەنگەن سەپپي بار بىلگەنىنەن جاڭىلدى. نەبارى 29 مينۋتقا سوزىلعان سەتتە كۋكۋشكين قارسىلاسىنا ەشقانداي ۇپاي بەرمەدى.
كەلەسى كەزەڭ دە ميشانىڭ باسىمدىعىمەن باستالدى. سالعان جەردەن اندرەاستىڭ دوبىن ءوز پايداسىنا جازعان تەننيسشىمىز ەشقانداي قاتەلىككە بوي الدىرماي سەتتە جانە جالپى ويىندا جەڭىسكە جەتتى.
ازىرگە قوس كوماندا اراسىنداعى جالپىەسەپ 2:2. قورجىنىمىزداعى ەكى ۇپايدى دا كۋكۋشكين الىپ بەردى. العاشقى جارىس كۇنى ول سيمونە بولەلليدى جەڭگەن ەدى.
ءدال قازىر استاناداعى «داۋلەت» ۇلتتىق تەننيس ورتالىعىندا قازاقستاندىق الەكساندر نەدوۆەسوۆ پەن يتاليا تەننيسشىسى فابيو فونيني كۇش سىناسۋدا. بۇل جالپى جارىستىڭ تاعدىرىن شەشەتىن تارتىس. ياعني, قاي جەڭگەنى كومانداسىن دەۆيس كۋبوگىنىڭ شيرەك فينالىنا الىپ شىعادى. ازىرگە ەكى سەتتىڭ قورىتىندىسى بويىنشا ەسەپ 1:1.
نەگىزى سوڭعى ويىندا كورتقا اندرەي گولۋبەۆ پەن سيمونە بولەللي شىعۋى ءتيىس بولاتىن. دەگەنمەن, قوس كوماندانىڭ كاپيتاندارى قۇرامعا وزگەرىس ەنگىزىپ, وزگە تەننيسشىلەرگە مۇمكىندىك بەردى.
ەلامان قوڭىر.
دەرەك: egemen.kz.
سۋرەت: daviscup.com.
