بوريس نەمتسوۆتىڭ ولىمىنە بەسىنشى كۇدىكتى انىقتالدى

استانا. 8 ناۋرىز. رەسەي تەرگەۋ كوميتەتى ساياساتكەر بوريس نەمتسوۆتىڭ ولىمىنە قاتىسى بار دەگەن بەسىنشى كۇدىكتىنى قاماۋعا الۋعا تالاپ ەتىپ جاتىر. بۇل تۋرالى تەرگەۋ كوميتەتى رەسمي وكىلى ۆلاديمير ماركيننىڭ سوزىنە سىلتەمە جاساعان «گازەتا.Ru» حابارلادى. «تەرگەۋ كوميتەتى بوريس نەمتسوۆتىڭ ولىمىنە قاتىسى بار بەسىنشى فيگۋرانتتى قاماۋعا الۋعا كەپىلدەمە بەرىپ وتىر», - دەلىنگەن حابارلامادا. بۇدان بۇرىن گروزنىيدا پوليتسەيلەردىڭ ۇستاۋعا ارەكەت جاساپ جاتقان كەزىندە تاعى ءبىر كۇدىكتىنىڭ گراناتاعا جارىلىپ قازا تاپقانى حابارلانعان. ول شەشەنستان ورتالىعىنداعى كوپ قاباتتى ۇيلەردىڭ پاتەرىندە جاسىرىنىپ جاتقان جەرىنەن ىزدەپ كەلگەن قۇقىق قورعاۋشىلارعا وق جاۋدىرعان. سوسىن ءتارتىپ ساقشىلارىنا قاراي لاقتىرعان گراناتاسىنىڭ جارىقشاعى وزىنە ءتيىپ, سول جەردە قازا تابادى. ال پوليتسەيلەر اراسىنان زارداپ شەككەندەر بولماعان. تەرگەۋ ونىڭ دا نەمتسوۆتىڭ ولىمىنە قاتىسۋى بولۋى مۇمكىن ەكەنىن ايتىپ وتىر. قازىرگى تاڭدا ءتورت كۇدىكتى قولعا تۇسكەن. ولاردىڭ اراسىندا قولدارىنا العاشقى بولىپ كىسەن سالىنعان انزور گۋباشەۆ پەن زاۋر داداەۆتان باسقا, انزوردىڭ تۋعان ءىنىسى جانە تاعى ءبىر جىگىت بار. مۇرات ايتقوجا. دەرەك, فوتو: گازەتا.Ru.