نەمتسوۆتىڭ ولىمىنە كۇدىكتىلەر ينگۋشەتيادا ۇستالدى

استانا. 8 ناۋرىز. رەسەيدىڭ وپپوزيتسياداعى بەلگىلى ساياساتكەرى بوريس نەمتسوۆتى ولتىرۋگە كۇدىكتىلەر كەشە, 7 ناۋرىز كۇنى ينگۋشەتيادا قولعا ءتۇستى. بۇل تۋرالى ينگۋشەتيا قاۋىپسىزدىك كەڭەسىنىڭ حاتشىسى البەرت باراحاەۆتىڭ سوزىنە سىلتەمە جاساعان تاسس حابارلادى. ونىڭ ايتۋىنشا, انزور گۋباشەۆ مالگوبەكتەن رەسپۋبليكانىڭ مالگوبەك اۋدانىنداعى ۆوزنەسەنسكايا ستانيتساسىندا تۇراتىن اناسىنا ماشينامەن كەلە جاتقانىندا ۇستالعان. ال ەكىنشى كۇدىكتى – زاۋر داداەۆ ماگاس قالاسىندا قولعا تۇسكەن. قاۋىپسىزدىك كەڭەسى حاتشىسىنىڭ سوزىنە قاراعاندا, گۋباشەۆتىڭ تاعى ءبىر باۋىرى دا وسىلارمەن بىرگە ۇستالعان. قاۋىپسىزدىك كەڭەسىندەگىلەر گۋباشەۆتار مەن دۋداەۆتاردىڭ ۆوزنەسەنسكايا ستانيتساسىنا 60-جىلدارى قونىس اۋدارعان شەشەنستاننىڭ يتۋم-كالى اۋدانىنىڭ تۋمالارى بولىپ تابىلاتىندارىن ايتتى. باراحاەۆتىڭ مالىمەتى بويىنشا, انزور گۋباشەۆ پەن زاۋر داداەۆتىڭ گروزنىيدا ۇيلەرى بولعان, قازىر سوندا تۇرىپ جاتقان. كۇدىكتىلەردىڭ سوڭعىسى – داداەۆ شەشەنستان ىشكى ىستەر مينيسترلىگىنىڭ «سەۆەر» باتالونىندا ون جىلعا جۋىق ۋاقىت قىزمەت ەتكەن. بۇدان بۇرىن ساياساتكەر نەمتسوۆتى ىقيمال ولتىرۋشىلەر 8 ناۋرىزعا دەيىن قاماۋعا الىنىپ قالاتىنى ايتىلعان بولاتىن. «رپر-پارناس» پارتياسىنىڭ تەڭ توراعاسى جانە ياروسلاۆل وبلىستىق دۋماسىنىڭ دەپۋتاتى بوريس نەمتسوۆ 27 اقپان كۇننىڭ تۇنىندە, ساعات 23:30 شاماسىندا ماسكەۋدىڭ قاق ورتاسىندا اتىپ ولتىرىلگەن ەدى. جانىندا 23 جاسار ۋكراين فوتومودەلى اننا دۋريتسكايا بار ساياساتكەردى ءبىر اق ءتۇستى كولىكتەن تۇسكەن بەلگىسىز ادام بىرنەشە وق اتىپ, ءجانتاسىلىم ەتەدى. اتىلعان 7-8 وقتىڭ تورتەۋى ونىڭ ارقاسىنا تيەدى. ساياساتكەر 3 ناۋرىز كۇنى ماسكەۋدىڭ تروەكۋر زيراتىنا جەرلەندى. مۇرات ايتقوجا. دەرەك, سۋرەت: تاسس.