شەكارا قىزمەتىنىڭ ەكس-ديرەكتورى 11 جىلعا سوتتالدى

استانا. 7 ناۋرىز. قازاقستان شەكارا قىزمەتىنىڭ ەكس-ديرەكتورى نۇرلان جولامانوۆ 11 جىلعا سوتتالدى. ونىمەن بىرگە ايىپ تاعىلعان بۇرىنعى اسكەري ءبولىم كومانديرى قايرات بالماعامبەتوۆ قىلمىستىق جاۋاپكەرشىلىكتەن بوساتىلدى. بۇل تۋرالى Tengrinews.kz ءتىلشىسى حابارلادى. «استانانىڭ قىلمىستىق ىستەر جونىندەگى مامانداندىرىلعان اۋدانارالىق اسكەري سوتى قازاقستان ۇلتتىق قاۋىپسىزدىك كوميتەتى شەكارا قىزمەتىنىڭ بۇرىنعى ديرەكتورى نۇرلان جولامانوۆتى 11 جىلعا باس بوستاندىعىنان ايىرۋعا ۇكىم شىعاردى», - دەلىنگەن حابارلامادا. سوت جولامانوۆتى «ۇيىمداسقان قىلمىستىق توپ قۇرعانى» جانە «اسا ءىرى كولەمدە پارا العانى» ءۇشىن ايىپتى دەپ تانىدى. ول جازاسىن قاتاڭ تارتىپتەگى قاماۋ كولونياسىندا وتەيتىن بولدى. سوت جولامانوۆتى ءومىر بويى مەملەكەتتىك جاۋاپتى قىزمەت ەتۋ قۇقىعىنان ايىردى. سونىمەن بىرگە سۋديا قازاقستان پرەزيدەنتىنە نۇرلان جولامانوۆتى گەنەرال-لەيتەنانت اسكەري شەنى مەن مەملەكەتتىك ناگراداسى – ەكىنشى دارەجەلى «داڭق» وردەنىنەن ايىرۋدى ۇسىندى. بۇعان دەيىن پروكۋرور سوتتان نۇرلان جولامانوۆتى 14 جىلعا باس بوستاندىعىنان ايىرۋدى جانە دۇنيە-مۇلكىن تاركىلەۋدى سۇراعان. ايىپتالۋشى وزىنە قارسى سوتتى «قولدان جاسالعان, ساياسي ءىس» دەپ اتاپ, تاعىلعان ايىپتاردى مويىندامايتىنىن مالىمدەگەن. جولامانوۆپەن بىرگە سوتتالۋشى – الماتىداعى 2458-اسكەري ءبولىمنىڭ بۇرىنعى كومانديرى قايرات بالماعامبەتوۆتى سوت قىلمىستىق جاۋاپكەرشىلىكتەن تولىق بوساتىپ, ونىڭ دۇنيە-مۇلكىن قاماۋدان بوساتۋعا شەشىم شىعاردى. سوت بارىسىندا بالماعامبەتوۆ وزىنە تاعىلعان «اسا ءىرى كولەمدە پارا العان» جانە «ۇيىمداسقان قىلمىستىق توپ قۇرعان» دەگەن ايىپتاردى مويىندايتىنىن, باستىعى جولامانوۆتىڭ «ىقپالىنان شىعا الماي» قىلمىسقا بارعانىن مالىمدەگەن. جولامانوۆ ۇستالعان كۇننەن باستاپ تەرگەۋ اباقتىسىندا قاماۋدا بولسا, بالماعامبەتوۆ ءۇي قاماعىندا ۇستالعان. سوت بۇگىن شىققان ۇكىم كۇشىنە ەنگەن ساتتەن باستاپ بالماعامبەتوۆتى ۇيقاماقتان بوساتۋ تۋرالى قاۋلى ەتتى. ايىپتاۋ دەرەكتەرى بويىنشا, 2013 جىلدىڭ جازىنان 2014 جىلعى قازاننىڭ 27-ىنە دەيىن سول كەزدەگى ۇقك شەكارا قىزمەتىنىڭ ديرەكتورى نۇرلان جولامانوۆ باسقارعان ۇيىمداسقان قىلمىستىق توپ 173 ميلليون تەڭگەدەن اسا (932 مىڭ دوللارعا جۋىق) اقشانى پارا رەتىندە العان. 2014 جىلى قازاننىڭ 27-ءسى كۇنى تۇتقىندالعان نۇرلان جولامانوۆ بىلتىر جەلتوقساندا قازاقستان پرەزيدەنتى نازارباەۆقا جازعان ۇندەۋىندە تەرگەۋگە سەنىمسىزدىك ءبىلدىرىپ, «ارنايى كوميسسيا قۇرىپ, وعان ۇقك شەكارا قىزمەتىندەگى جاعدايدى مۇقيات تەكسەرۋدى تاپسىرۋدى جانە قىلمىستىق ءىستى تەكسەرۋدى وزگە تەرگەۋ ورگانىنا جۇكتەۋگە كومەكتەسۋدى» سۇراعان ەدى. نۇرلان جولامانوۆتىڭ سوتى قاڭتاردىڭ 26-سى كۇنى باستالعان. ول 2013 جىلدىڭ قاڭتارىنان باستاپ ۇستالعان ۋاقىتقا دەيىن ۇقك شەكارا قىزمەتىن باسقارعان. نۇرلان جولامانوۆتىڭ ءىسى – سوڭعى جىلدارى ۇقك شەكارا قىزمەتىنە قاتىستى شىققان شۋلى وقيعالار مەن جانجالدى ىستەردىڭ كەزەكتى بىرىنە اينالدى. مۇرات ايتقوجا. دەرەك, سۋرەت: Tengrinews.kz.