بايلانىستار بەكەمدەلە تۇسپەك

كەشە استانادا ەۋرازيالىق ەكونوميكالىق كوميسسيا وتىرىسى ءوتتى. وندا نەگىزىنەن ەرتەڭ بۋرابايدا مەملەكەت باسشىلارىنىڭ دەڭگەيىندە وتكەلى وتىرعان ەۋرازيالىق ەكونوميكالىق وداقتىڭ جوعارى كەڭەسىنە دايىندىق بارىسى, وندا قارالاتىن ماسەلەلەر تالقىلاندى. كوميسسيا وتىرىسى نەگىزىنەن جابىق رەجىمدە ءوتتى. وندا تالقىلانعان ماسەلەلەر جايىندا بۇقارالىق اقپارات قۇرالدارى وكىلدەرىنە قازاقستان پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ ايتىپ بەردى. ب.ساعىنتاەۆتىڭ ايتۋىنشا جوعارى كەڭەستىڭ كۇن تارتىبىنە ون بەس ماسەلە شىعادى. ونىڭ ەكەۋى نەگىزگى باسىمدىققا يە. «ءبىز ءدال وسى ەكى ماسەلەگە قاتىستى شاعىن قۇرامداعى كەزدەسۋدە ۇزاق تالقىلاۋلار جۇرگىزدىك. ونىڭ ءبىرىنشىسى ەۋرازيالىق ەكونوميكالىق كوميسسيا القاسى مۇشەلەرىنىڭ سانىنا قاتىستى بولدى. بۇگىندە ءار ەلدەن ءۇش مۇشەدەن قامتىلعان. جالپى ون بەس مۇشە بار. قازىرگى كەزدە ۇشەۋ, ەكەۋ نەمەسە باسقا فورمات تالقىلانۋدا», دەدى ب. ساعىنتاەۆ. ايتالىق, ءار ەلدەن ءۇش مۇشەدەن قابىلداۋ بۇرىن وداققا مۇشە مەملەكەتتەر سانى از بولعاندا قابىلدانعان شەشىم بولاتىن. وسى ورايدا ول تالقىلاۋلاردان كەيىن بۇل ماسەلە مەملەكەت باسشىلارىنىڭ دەڭگەيىنە شىعارىلاتىندىعىن, پرەزيدەنتتەر قابىلداعان شەشىمگە سايكەس بۇل فورمات ايقىندالاتىنىن جەتكىزدى. سونىمەن قاتار, ۇكىمەت باسشىسىنىڭ ءبىرىنشى ورىنباسارى كەلەسى نەگىزگى ماسەلە القاعا توراعالىق ەتەتىن ەلگە قاتىستى بولعانىن اتاپ ءوتتى. «ءبىرىنشى مەرزىم رەسەيدىڭ توراعالىعىمەن ءوتتى. ۆيكتور حريستەنكو ەۋرازيالىق ەكونوميكالىق كوميسسيا القاسىنىڭ توراعاسى قىزمەتىن ءتورت جىل اتقاردى جانە قازىرگى كەزدە مەرزىم اياقتالۋدا, سونداي-اق, القاداعى بارلىق مۇشەلەردىڭ دە مەرزىمى ءتامامدالۋدا. جاڭا جىلدان باستاپ بىزدە جاڭا ادامدار, جاڭا توراعا كەلەدى. اتاپ ايتقاندا, بۇل ماسەلە دە مەملەكەت باسشىلارىنىڭ دەڭگەيىندە تالقىلانىپ, ولار ءتيىستى شەشىمدى قابىلدايدى», دەدى ب.ساعىنتاەۆ. پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ سونداي-اق, ەۋرازيالىق ەكونوميكالىق كەڭەس وتىرىسىندا قازاقستاننىڭ دۇنيەجۇزىلىك ساۋدا ۇيىمىنا كىرگەننەن كەيىنگى مىندەتتەمەلەرى جايىندا دا كەڭىنەن تالقىلانعانىن تىلگە تيەك ەتتى. سونىمەن قاتار, تاعى ءبىر ماسەلە كەدەندىك كودەكستىڭ جوباسى قارالعان. جالپىلاي العاندا, كوميسسيا مۇشەلەرى بۇل وتىرىستا ەۋرازيالىق ەكونوميكالىق وداققا مۇشە ەلدەر اراسىندا ساۋدا-ەكونوميكالىق, ينفراقۇرىلىمدىق بايلانىستاردى ودان ءارى بەكەمدەي تۇسۋگە سەپتىگىن تيگىزەتىن 30-عا جۋىق قۇجاتتىڭ جوباسىن تالقىلاعان. دينارا بىتىكوۆا, «ەگەمەن قازاقستان».