العاشقى تۋردا ەكى ويىندا عانا جەڭىمپاز انىقتالدى

استانا. 7 ناۋرىز. بۇگىن فۋتبولدان قازاقستان پرەمەر-ليگاسىنىڭ تۇساۋى كەسىلدى. سوعان وراي ەل فۋتبولىنىڭ ەليتالىق توبىندا وينايتىن 12 كوماندا جاسىل الاڭعا شىقتى. بۇل تۋرالى egemen.kz حابارلادى. ادەتتەگىدەي العاشقى تۋردا ايتارلىقتاي وقيعا تىركەلمەدى. ءتىپتى التى ويىندا بارلىعى 10 عانا گول سوعىلدى. ال ەكى كەزدەسۋدە مۇلدەم ەسەپ اشىلعان جوق. سونداي-اق, تەك ەكى ويىندا جەڭىمپاز انىقتالىپ, ءتورت باسەكەدە تەڭ ناتيجە تىركەلدى. تۋردىڭ ورتالىق كەزدەسۋى الماتىدا ءوتتى. جانكۇيەرلەردىڭ قىزىعۋشىلىعىن تۋدىرعان ويىندا جەرگىلىكتى «قايرات» قوستانايدىڭ «توبىلىن» قابىلدادى. قوس كوماندانىڭ دا ەل فۋتبولىندا وزىندىك ورنى بار. سول سەبەپتى دە ورتالىق كەزدەسۋگە بالانعان ويىننان كوپشىلىك ەكى مىقتىنىڭ اراسىنداعى ناعىز تارتىستى كۇتكەن ەدى. دەگەنمەن, وتاندىق فۋتبولسۇيەر قاۋىمنىڭ ءۇمىتى اقتالماي, ويىن ورنەگى تەك ءبىر كوماندانىڭ باقىلاۋىمەن ءوربىدى. بۇل ويىندا بيىلعى چەمپيوناتتىڭ العاشقى حەت-تريگى تىركەلگەنىن ايتا كەتەيىك. «توبىلدىڭ» قاقپاسىن ءۇش مارتە ءدال كوزدەگەن جەرار گوۋ ازىرگە مەرگەندەر كوشىن باستاپ تۇر. ويىننىڭ 78-مينۋتىندا «قايرات» ساپىنان زاۋربەك پليەۆ قىزىل قاعاز الىپ, الاڭنان قۋىلدى. سوعان قاراماستان, قوستانايلىقتار ەسەپ ايىرماسىن قىسقارتا المادى. ءتىپتى الماتىلىقتار ون ويىنشىمەن ءجۇرىپ-اق ءتورتىنشى گولدارىن سوعىپ, جانكۇيەرلەرىنىڭ العىسىنا بولەندى. ناتيجەسىندە, الاڭ يەلەرى 4:0 ەسەبىمەن جەڭىسكە جەتتى. ءبىرىنشى تۋردىڭ قورىتىندىسى تومەندەگىدەي: «قايسار» (قىزىلوردا) – «جەتىسۋ» (تالدىقورعان) – 0:0 «تاراز» – «شاحتەر» (قاراعاندى) – 0:0 «ورداباسى» (شىمكەنت) – «ەرتىس» (پاۆلودار) – 1:1 گولدار: ي.بوجيچ 12 (1:0), ا.گاتاگوۆ 45 (1:1). «اقتوبە» – «اتىراۋ» – 1:1 گولدار: م.بايجانوۆ 45 (0:1), د.جالمۇقان 62 (1:1). «استانا» – «وقجەتپەس» (كوكشەتاۋ) – 2:0 گولدار: ر.كانياس 37 (1:0), پ.تۆۋماسي 59 (2:0). «قايرات» (الماتى) – «توبىل» (قوستاناي) – 4:0 گولدار: ج.گوۋ 16 (1:0), ج.گوۋ 25 (پ) (2:0), ب.يسلامحان 55 (پ) (3:0), ج.گوۋ 90 (4:0). 2-تۋر ويىندارى 11 ناۋرىزدا وتەدى: «اقتوبە» – «قايرات». «ەرتىس» – «استانا». «اتىراۋ» – «تاراز». «شاحتەر» – «ورداباسى». «وقجەتپەس» – «قايسار». «جەتىسۋ» – «توبىل». ەلامان قوڭىر. دەرەك: egemen.kz. سۋرەت: prosportkz.kz.