استانا. 7 ناۋرىز. بۇگىن تەننيستەن دەۆيس كۋبوگى اياسىندا استانادا ءوتىپ جاتقان قازاقستان مەن يتاليا اراسىنداعى تارتىس ءوز جالعاسىن تاپتى. ەكىنشى جارىس كۇنىندە قارسىلاستار جۇپتىق سايىستا باق سىناپ, يتاليالىقتار 3:1 ەسەبىمەن جەڭىسكە جەتتى. ناتيجەسىندە, قوس كوماندا اراسىنداعى ايقاستا يتاليا 2:1 ەسەبىمەن العا شىقتى. بۇل تۋرالى egemen.kz حابارلادى.
جوسپار بويىنشا ۇلتتىق قۇرامامىزدىڭ كاپيتانى دياس دوسقاراەۆ كورتقا اندرەي گولۋبەۆ پەن الەكساندر نەدوۆەسوۆ جۇبىن شىعاردى. ال يتاليا ساپىنان فابيو فونيني مەن پاولو لورەنتستسي جۇبى شىعۋى ءتيىس ەدى. الايدا, كوماندا كاپيتانى كوررادو باراتسۋتتي تاكتيكالىق ءادىس قولدانىپ, پ.لورەنتستسيدىڭ ورنىنا سيمونە بولەلليدى شىعاردى.
العاشقى سەتتە تەننيسشىلەر ايتارلىقتاي قاتەلىككە بوي الدىرمادى. ءبىر-بىردەن برەيك جاساعان قارسىلاستار جەڭىمپازدى انىقتاۋ ءۇشىن تاي-برەيككە جۇگىندى. بۇل سىندا ەكى مارتە ءبىزدىڭ تەننيسشىلەردىڭ دوبىن ءوز پايدالارىنا جازعان يتاليالىقتار 7:6 (7:4) ەسەبىمەن باسىم ءتۇستى.
كەلەسى كەزەڭدە اپەنين تۇبەگىنەن كەلگەن تەننيسشىلەر وڭاي جەڭىسكە جەتتى. بار-جوعى 36 مينۋتتىڭ ىشىندە سەتتى اياقتاعان ولار ءوز پايدالارىنا 6:3 ەسەبىن تىركەدى.
جانكۇيەرلەر ناعىز تارتىسقا ءۇشىنشى سەتتە كۋا بولدى. ءار سوققى ءۇشىن ايقاسقان قارسىلاستار ءوز دوپتارىنان ۇپاي جوعالتقان جوق. ناتيجەسىندە, سەت جەڭىمپازى تاعى دا تاي-برەيك ارقىلى انىقتالدى. وسى كەزدە يتاليالىقتاردىڭ التى مارتە تەك سەتتى ەمەس, تۇتاس ويىندى جەڭىسپەن اياقتاۋعا مۇمكىندىگى بولعان. دەگەنمەن, گولۋبەۆ پەن نەدوۆەسوۆ قايسارلىق تانىتىپ, بۇل كەزەڭدى جەڭىسپەن اياقتادى. 1 ساعات 9 مينۋتقا سوزىلعان سەتتە قازاقستاندىقتار 7:6 (15:13) ەسەبىمەن باسىم ءتۇستى.
ال ءتورتىنشى سەتتە بولەللي مەن فونيني جۇبى ءوز مۇمكىندىكتەرىن ءمۇلت جىبەرمەدى. ءبىر مارتە برەيك جاساعان ولار كەزەڭدە 6:4 ەسەبىمەن جەڭىسكە جەتتى.
ەندى ەرتەڭ كوماندالار ەكى جەكەلەي سىندا كۇش سىناسادى. الدىمەن ميحايل كۋكۋشكين مەن ادرەاس سەپپي كورتقا شىقسا, ەكىنشى ويىندا اندرەي گولۋبەۆ پەن سيمونە بولەللي اراسىنداعى ايقاسقا كۋا بولامىز. بىزگە دەۆيس كۋبوگىنىڭ كەلەسى اينالىمىنا شىعۋ ءۇشىن ەكى ويىندا دا جەڭىس قاجەت. ال ەكى كۇننىڭ قورىتىندىسى بويىنشا 2:1 ەسەبىمەن الدا كەلە جاتىرعان يتالياعا ەرتەڭگى ويىننىڭ بىرەۋىن عانا ءوز پايداسىنا اياقتاسا جەتكىلىكتى.
ەلامان قوڭىر.
دەرەك: egemen.kz.
سۋرەت: daviscup.com.
