بوريس نەمتسوۆتى ءولتىردى دەگەن ەكى كۇدىكتى قاماۋعا الىندى

استانا. 7 ناۋرىز. بۇگىن رەسەي فەدەرالدى قاۋىپسىزدىك قىزمەتىنىڭ ديرەكتورى الەكساندر بورتنيكوۆ ساياساتكەر بوريس نەمتسوۆتىڭ ولىمىنە بايلانىستى ەكى كۇدىكتىنىڭ قولعا تۇسكەنىن مالىمدەدى. بۇل تۋرالى Interfax حابارلادى. «جۇرگىزىلگەن جۇمىستاردىڭ ناتيجەسىندە بۇگىن اتالمىش قىلمىستى جاساعان ەكى كۇدىكتى – كۋباشەۆ انزور جانە دۋداەۆ زاۋر دەگەن بىرەۋلەر قولعا ءتۇستى, بۇل تۋرالى مەملەكەت باسشىسىنا باياندالدى», - دەدى ول «ءبىرىنشى ارنانىڭ» ەفيرىندە. بورتنيكوۆ كۇدىكتىلەردىڭ كاۆكاز تۇرعىندارى ەكەنىن انىقتاپ ايتتى. «قازىرگى ساتتە جەدەل جانە قاجەتتى تەرگەۋ شارالارى جالعاسىپ جاتىر», - دەدى فسب باسشىسى. ول «ەلدىڭ پرەزيدەنتى ۆلاديمير ءپۋتيننىڭ تاپسىرۋى بويىنشا, فسب, ىشكى ىستەر مينيسترلىگى مەن تەرگەۋ كوميتەتىنە بوريس نەمتسوۆتىڭ ءولىمىن تەكسەرۋ جونىندە بىرلەسكەن جەدەل-تەرگەۋ توبىن قۇرۋ جۇكتەلگەنىن» اتاپ ءوتتى. ەسكە سالا كەتەيىك, بوريس نەمتسوۆ 27 اقپان كۇنى ماسكەۋدەگى ۇلكەن ماسكەۋ وزەنى كوپىرى ۇستىندە 23:30 ساعات شاماسىندا اتىپ ولتىرىلگەن ەدى. سول كۇنى كەشكە ونىڭ جانىندا ۋكراين مودەلى اننا دۋريتسكايا بولعان. ول تەرگەۋ ورگاندارىنا تۇسىنىكتەمە بەرگەننەن كەيىن, 3 ناۋرىزدا ەلىنە قايتىپ كەتتى. رەسەي تەرگەۋ ورگاندارىندا ايتىلعان اڭگىمەنى سىرتقا تاراتپاۋ جانە تەرگەۋگە كومەكتەسۋ تۋرالى قولحات بەرگەن. رەسەي تەرگەۋ كوميتەتى ساياساتكەردى ءولتىرۋدىڭ بىرنەشە ۆەرسياسىن قاراستىرىپ وتىر. ولاردىڭ اراسىندا ساياسي سالدار دا, تۇرمىستىق تۇيتكىلدەر دە بار. قازىر وسى قىلمىستى اشۋعا كومەكتەسكەن ادامعا 3 ملن. تەڭگە كولەمىندە سىياقى بەلگىلەنگەن. نەمتسوۆتىى ءولتىرىلۋى رەسەي مەن شەتەلدەردىڭ ساياساتكەرلەرى مەن قوعام قايراتكەرلەرى اراسىندا ۇلكەن ءدۇمپۋ تۋعىزدى. 1 ناۋرىز كۇنى ماسكەۋدە ونى ەسكە الۋعا مىڭداعان ادام شىقتى. بوريس نەمتسوۆ وتكەن سەيسەنبى كۇنى رەسەي استاناسىنداعى تروەكۋر زيراتىنا جەرلەندى. مۇرات ايتقوجا. دەرەك, سۋرەت: Interfax.