اۋە قاقپاسىنىڭ الەۋەتى جوعارى

باق قونىپ, قۇت دارىعان قازاق دالاسى ۇرپاعىنا بار بايلىعىن جومارتتانا جايىپ تۇر. قازاقستان ءوزىنىڭ وسى ءبىر ۇلان-عايىر دارحان دالاسىنىڭ گەوگرافيالىق ورنالاسۋىنىڭ ارقاسىندا ەۋروپا مەن ازيا ەلدەرىن بايلانىستىراتىن التىن كوپىرگە اينالدى. مەملەكەت باسشىسىنىڭ جاقىندا جاريالاعان ۇلت جوسپارىن ىسكە اسىرۋ ارقىلى قازاقستان ءىرى كولىك-لوگيستيكالىق حابقا اينالماق. ەلباسى نۇرسۇلتان نازار­باەۆ­تىڭ 5 ينستيتۋتتىق رەفورماسىن جۇزەگە اسىرۋعا باعىتتالعان 100 ناقتى قادامدا «ەير استانا» حا­لىق­ارالىق باعىتتارعا ىڭعاي­لاس­تىرىلادى جانە الەمنىڭ نەگىزگى قارجى ورتالىقتارىنا (نيۋ-يورك, توكيو, سينگاپۋر) جاڭا باعىتتار اشادى. «ەير استانانىڭ» دامۋى «قتج»-نىڭ بالامالى مارشرۋتتاردى  دامىتۋ جونىندەگى جوسپارىمەن ۇيلەستىرىلەدى, بۇل جۇكتەردى جەتكىزۋ قۇنىن ەكى ەسەدەن استام تومەندەتۋگە مۇمكىندىك بەرەدى» دەپ اتاپ كورسەتىلگەن. وسىعان وراي «ەير استانا» اۋە تاسىمالداۋ­شى­سى اتالعان باعىتتارعا ۇشۋ ساپار­لارىن ۇيىمداستىرۋ, جاڭا باعىت­تاردى باعىندىرۋ مىندەتتەرىنە كىرىستى. بۇگىندە «قازاقستان تەمىر جو­لى» ۇك» اق «قورعاس – شىعىس قاقپاسى» ارنايى ەكونوميكالىق ايماعىن سالۋدىڭ سوڭعى كەزەڭىن جۇزەگە اسىرۋدا. كومپانيا باس­پا­سوز قىزمەتىنىڭ حابارلاۋىنشا, كولىك-لوگيستيكالىق كەشەن الا­ڭىن­دا باسقا دا نىساندار قۇرى­لىسى سالىنۋدا. جاقىن ارادا كە­دەندىك راسىمدەۋ ورتالىعى جانە كون­تەي­نەرلىك تەرمينالدار قولدانىسقا ەنگىزىلەتىن بولادى. كولىك-لوگيستي­كالىق كەشەن قۇرىلىسى الداعى ۋاقىتتا دا جالعاسادى. 2016 جىلى حالىقارالىق «باتىس ەۋروپا – با­تىس قىتاي» كولىك دالىزىمەن ۇشتاسا­تىن اۆتوكولىك جولى پايدالانۋعا بەرىلمەك. تاعى ءبىر ايتا كەتەتىن ماسەلە, «قتج» ۇك» اق قۇرىلىمىندا ارنايى «Airport Management Group» جشس قۇرىلىپ, وتاندىق بىرقاتار اۋەجايلاردى دامىتۋ مىندەتىن قولعا الدى. «قازاقستاننىڭ 11 مەم­لەكەتتىك اۋەجايىن دامىتۋعا 2030 جىلعا دەيىن 250 ميلليارد تەڭگە نەمەسە 1 ميلليارد ەۋرو قارجى قاراستىرىلىپ وتىر. بۇل قارجىعا اۋەجايلاردىڭ ۇشۋ-قونۋ الاڭدارى جاڭعىرتىلىپ, جاڭا تەرمينالدار قۇرىلىسى سالىنىپ, ۇشاقتارعا قىزمەت كورسەتەتىن جاڭا تەحنيكالىق قوندىرعىلار ساتىپ الىنباق. بۇل اتالمىش مەملەكەتتىك اۋەجايلارداعى قىزمەت كورسەتۋ ساپاسىن جاقسارتىپ, قاۋىپ­سىزدىكتى ارتتىرادى», دەيدى «Air­port Management Group» كومپا­نياسىنىڭ باسقارما توراعاسى كلود بادان. «Airport Management Group» جشس «KTZ Express» اكتسيونەرلىك قوعامىنىڭ 100 پايىزدىق سەرىك­تەس كاسىپورنى بولىپ تابىلادى. ول مەملەكەتتىك اۋە­جايلاردى باسقارۋ ماقساتىمەن «قازاق­ستان تەمىر جولى» ۇك» اق قۇرىلىمىندا دۇنيەگە كەلگەن بولاتىن. وتكەن جىلدىڭ قىركۇيەك ايىندا 11 مەملەكەتتىك اۋەجايدىڭ التاۋىنىڭ – استانا, كوكشەتاۋ, پەتروپاۆل, قوستاناي, شىمكەنت جانە قىزىلوردا اۋەجايلارىنىڭ مەملەكەتتىك پاكەت اكتسيالارى 7 جىل مەرزىمگە «Airport Management Group» جشس-ىنە باسقارۋعا بەرىلدى. الداعى ۋاقىتتا بۇل كومپانياعا اقتوبە, اتىراۋ, پاۆلودار, سەمەي جانە وسكەمەن قالالارىنىڭ اۋە­جايلارى دا بەرىلەدى. كومپانيا باس­شىسىنىڭ ايتۋىنشا, ولار بۇل اۋە­جايلاردى حالىقارالىق ستان­دارت­تارعا سايكەس جاڭعىرتىپ, ۇشۋ-قونۋ قاۋىپسىزدىگىن جاقسارتادى. سونىمەن بىرگە, ولار الداعى ۋاقىتتا بۇل مەم­لەكەتتىك اۋەجايلاردىڭ قارجىلىق تۇراقتىلىعىن قامتاماسىز ەتۋ ماسە­لە­سىن دە ءوز مىندەتتەرىنە الىپ وتىر. قازىرگى ۋاقىتتا «ەير استانا» ەلوردادان سەۋل, پاريج جانە تبي­ليسي قالالارى باعىتتارىنا حالىقارالىق ۇشۋ ساپارلارىن جۇزە­گە اسىرادى. ەسكە سالا كەتەتىن بولساق, بيىلعى جىلى 29 ناۋرىزدا «ەير استانا» اۋەكومپانياسىنىڭ «بوينگ-757» اۋە كەمەسى استانادان پاريجگە العاش رەت تىكەلەي ۇشۋ ساپارىن جۇرگىزدى. ەندى بۇل حالىق­ارالىق ۇشۋ ساپارى اپتاسىنا ءۇش رەت (سارسەنبى, جۇما, سەنبى) قاتى­نايدى. ونىڭ ۇشۋ ۋاقىتى 7 ساعاتتى قۇرايدى. الداعى ۋاقىتتا «ەير اس­تانا» كومپانياسى دۋباي جانە گون­كونگپەن تىكەلەي اۋە بايلانى­سىن ورناتپاق.  ال 2016 جىلى جا­پو­نيا استاناسى توكيو قالاسىنا تىكەلەي ۇشۋ باعىتىن اشادى. 2019 جىلى قازاق­ستاندىقتار نيۋ-يورك قالاسىنا تىكەلەي ۇشۋ مۇمكىندىگىنە يە بولماق. ەلباسى نۇرسۇلتان نازار­باەۆ اتاپ كورسەتكەندەي, بولا­شاقتا استانادا تورتكۇل دۇنيەمەن تىكەلەي بايلانىس جاسايتىن  توعىز جولدىڭ تورابى  تۇيىسەدى. جىلقىباي جاعىپار ۇلى, «ەگەمەن قازاقستان».