«اقنيەت» كاسىپكەرلىككە جول اشادى

قيىر قونىپ, شەت جايلاعان اۋىلداردا شاعىن جانە ورتا بيزنەستى قالاي دامىتۋعا بولادى؟ جالپى, ەلدى مەكەندەردە قانداي كاسىپپەن اينالىسقان دۇرىس؟ ارينە, حالىققا كۇندەلىكتى ءتىر­شىلىكتە قاجەتتى شاشتاراز, ناۋ­بايحانا, بالاباقشا, ءدارىحانا سەكىلدى بيزنەسپەن شۇعىلدانعان پايدالى. دۇكەن اشىپ, ساۋدا-ساتتىقپەن اينالىسقاننىڭ دا ءجونى بولەك. دۇرىس دەلىك. ەندى وي بار, ماقسات بار. بىراق قارجى جوق. سوندا اۋىلداعى اعايىن كاسىپكەرلىكپەن اينالىسۋ ءۇشىن نە ىستەۋى كەرەك؟ قۇر قيالدىڭ جەتەگىنە ەرىپ جۇرە بەرۋگە جانە بولمايدى. ناقتى ىسپەن اينالىسۋ ءۇشىن العاشقى كاپيتال قاجەت. ماسەلەنىڭ ءبارى قارجىعا كەلىپ تىرەلگەندە تىعىرىقتان شىعار جول جوقتاي بوپ كورىنەتىن. دەگەنمەن, مۇنىڭ دا رەتى تابىلدى. مىسالى, قىزىلوردا وبلىسىندا سوڭعى ءۇش جىل بويىنا «اقنيەت» باعدارلاماسى ىسكە اسىپ كەلەدى. باعدارلاما ەلدى مەكەندەردە بيزنەسپەن شۇعىلدانعىسى كەلەتىن ادامدارعا ارنالعان. «اقنيەتتىڭ» تىكەلەي ومىرگە كە­لۋىنە وبلىس اكىمى قىرىمبەك كوشەرباەۆ مۇرىندىق بولدى. ال «لۋكويل وۆەرسيز سەرۆيس ب.ۆ» مۇناي كومپانياسى قارجىلاي كومەكتەسەدى. اتالعان باعدارلاما بويىنشا اۋىلداعى اعايىن 1 ميلليون تەڭگەگە دەيىن قايتارىمسىز قارجى الا الادى. باستىسى, ءوز كاسىبىنىڭ پايدالى ەكەنىن دالەلدەسە بولعانى. ايتالىق, 2013 جىلى «اقنيەت» بويىنشا 77 ادام ارنايى گرانت ۇتىپ الدى. بۇگىندە ولاردىڭ جۇمىسى دوڭگەلەنىپ ءجۇرىپ تۇر. ال بىلتىر بۇل كورسەتكىش 20 ادامعا ۇلعايدى. ياعني, 97 تۇرعىن ناقتى كاسىپكەرلىكپەن اينالىسا باستادى. ال بيىل 94 ادامنىڭ بيزنەس جوسپارى ماقۇلدانىپ, 1 ميلليون تەڭگەگە دەيىن قايتارىمسىز اقشا بەرىلدى. سوندا ءۇش جىلدا 268 ادام گرانت الىپ وتىر ەكەن. بۇل وسىنشاما كاسىپكەرلىك نىسان اشىلدى دەگەن ءسوز. از با, كوپ پە؟ بۇرناعى كۇنى «لۋكويل وۆەرسيز سەرۆيس ب.ۆ.» مۇناي كوم­پانياسى قارجىلاندىراتىن «اقنيەت» الەۋمەتتىك-سەرىكتەستىك باعدارلاماسى اياسىندا جەڭىم­پاز اتانعان 94 كاسىپكەرگە گرانت كۋالىكتەرى تابىس ەتىلدى. مارا­پاتتاۋ راسىمىنە قىزىلوردا وب­لىسىنىڭ اكىمى قىرىمبەك كوشەرباەۆ, «لۋكويل وۆەرسيز سەرۆيس ب.ۆ.» كومپانياسىنىڭ قازاقستانداعى فيليالىنىڭ ديرەكتورى اندرەي كيريللوۆ جانە اۋدان اكىمدەرى قاتىستى. وسى سالتاناتتى شارا بارىسىندا 2013-2014 جىلعى جەڭىمپاز جوبالاردىڭ كورمەسى ۇيىمداستىرىلدى. تالپىنىسى زور بولعانىمەن, قولدىڭ قىسقالىعىنان ءىس باستاي الماي جۇرگەن 94 ازاماتتىڭ بيزنەس جوسپارى ماقۇلدانىپ, 1 ميلليون تەڭگەگە دەيىن قايتارىمسىز قارجى بەرىلدى. «اقنيەت» باع­دارلاماسى بويىنشا پايىزسىز ءارى قايتارىمسىز ۇلەستىرىلگەن قاراجاتقا قارماقشى, جالاعاش پەن سىرداريا اۋدانىنىڭ تۇر­عىندارى قول جەتكىزدى. باي­قاۋعا مۇمكىندىگى شەكتەۋلى جاندار, جال­عىزباستى انالار, كوپبالالى جانە تۇرمىسى تومەن وتباسىلار مەن 18-دەن 30 جاسقا دەيىنگى جاستار قاتىسقان بولاتىن.  اي­ماق باسشىسى جەڭىمپازداردى قۇتتىق­تاپ, ولارعا سەرتيفيكاتتار تابىس­تادى. – وبلىس حالقىنىڭ 60 پايى­زى اۋىلدىق جەرلەردە تۇرادى. قايتارىمسىز نەسيە – اۋىلدىق جەردە كاسىپ باستاۋعا ۇلكەن كومەك. سوندىقتان, اۋىلدىڭ ءال-اۋقاتىن كوتەرۋ ارقىلى ءبىز ءوڭىردىڭ الەۋ­مەتتىك ەكونوميكالىق احۋالىن جاقسارتپاقپىز. كاسىپكەرلەر – ەلدىڭ تىرەگى. سىزدەرگە جاعداي جاساۋ – ءبىزدىڭ مىندەتىمىز. شاعىن جانە ورتا بيزنەس دامىسا, كاسىپكەرلىك وركەندەسە, ەلدە ەكونوميكالىق دامۋ دا, تۇراقتىلىق تا بولارى ءسوزسىز,– دەدى قىرىمبەك ەلەۋ ۇلى. «اقنيەت» باعدارلاماسىنىڭ قىزىلوردادا جۇزەگە اسىپ جات­قانىنا بيىل ءۇشىنشى جىل ەكەنىن, وسىعان دەيىن باعدارلاما اياسىندا 174 ازاماتتىڭ ءوز كاسىبىن اشقانىن ايتتىق. بۇگىندە ولار اشقان شاشتاراز, ناۋبايحانا, بالاباقشا, جيھاز جانە كون­ديتەر تسەحى, ءدارىحانالار, ءتىس ەمدەۋ كابينەتتەرى, بالالاردى ساۋىقتىرۋ ورتالىعى, كومپيۋ­تەرلىك ورتالىق, تىگىن تسەحى سەكىلدى حالىققا قاجەتتى قىزمەت تۇرلەرى ەل يگىلىگى ءۇشىن جۇمىس ىستەپ تۇر. جوسپارى ماقۇلدانىپ, قارجىسى قولىنا تيگەن مىنا 94 ادامنىڭ دا بيزنەس نىساندارى الداعى ۋاقىتتا حالىق مۇقتاجدىعى ءۇشىن جۇمىس ىستەيدى دەگەن ويدامىز. ەرجان بايتىلەس, «ەگەمەن قازاقستان». قىزىلوردا وبلىسى.