گاز كەلدى, گازبەن بىرگە «جاز» كەلدى

قىزىلوردا وبلىسىنىڭ اۋدان ورتالىقتارى مەن اۋىلدارىن گازبەن قامتۋ ءىسى قىزۋ ءجۇرىپ جاتىر. كوگىلدىر وتىن ەڭ العاش بولىپ جاڭاقورعان اۋدانىنا جەتتى. وسىلايشا 25 مىڭنان استام ادام تۇراتىن اۋدان ورتالىعى وتىن مەن كومىردىڭ قيىنشىلىعىنان قۇتىلدى. ەڭ باستىسى, ەلىمىز بويىن­شا العاش رەت ءبىر اي ىشىندە وبلىس­تىڭ بىردەن بەس اۋدانى گازبەن قام­تاماسىز ەتىلەدى. 10 قازان كۇنى قىزىلوردا وبلىسىنىڭ اكىمى قى­رىمبەك كوشەرباەۆ پەن «قازترانس­گاز ايماق» اق-تىڭ باس ديرەكتورى يبۋللا سەرديەۆ جاڭاقورعان اۋدانىندا گاز بەرۋ ساتىنە كۋا بولىپ, كوپتىڭ قۋانىشىمەن ءبولىستى. ايتا كەتەيىك, قىزىلوردا وبلىسى اكىمدىگى مەن «قازترانسگاز» اق اراسىندا بىلتىر جاسالعان مەموراندۋمعا سايكەس جاڭاقورعان, شيەلى, قازالى جانە ارال اۋداندارى مەن بايقوڭىر قالاسىن گازداندىرۋعا قاجەتتى قاراجات بولىنگەن. ال وبلىستىڭ قالعان اۋ­دان­دارى كەلەسى جىلى گازبەن قام­تىلاتىن بولادى. بۇل جۇمىستارعا قاجەتتى 16 ميلليارد تەڭگەنى ەۋروپا قايتا قۇرۋ جانە دامۋ بانكى ينۆەستيتسيالايتىن بولادى. «اۋدان حالقى ەندى پەش جا­عىپ, كۇل شىعارۋ ماشاقاتىنان قۇتىلاتىن بولدى. ءبارىمىز ءۇشىن ارمان بولعان كوگىلدىر وتىن ۇيىمىزگە جەتتى. بۇدان ارتىق قانداي قۋانىش بولسىن», دەيدى جاڭاقورعاندىق گاۋھار بەكمىرزاەۆا. – ەلباسى ەلدى مەكەندەردى كوگىلدىر وتىنمەن قامتاماسىز ەتۋگە باستى نازار اۋدارۋدى تاپسىرعان. بۇل سونىڭ جەمىسى. جالپى العاندا, وبلىس­تا الەۋمەتتىك ماسەلەلەر ءتيىمدى شەشىلىپ كەلەدى «بەينەۋ-بوزوي-شىمكەنت» ماگيسترالدى گاز قۇبىرى جانە «باتىس ەۋروپا – باتىس قىتاي» حالىقارالىق تاس جولى سالىندى. ەندى اۋدان ورتالىقتارىنا گاز جەتكىزەتىن قۇبىرلار سالىنىپ ءبىتتى. الداعى ۋاقىتتا جاڭاقورعاندىقتار ءۇشىن شەشىمىن تاپپاعان كۇرمەۋى قيىن ماسەلە اۋىز سۋدىڭ جاعدايى دا وڭىنان شەشىلمەك. سۋ قۇبىرلارىن سالۋ جوباسى 2016-2018 جىلدارعا جوسپارلانعانىمەن, ءبىز جۇمىستى بيىل باستاي بەرۋگە شەشىم قا­بىل­داپ, جاقىندا العاشقى 200 ميلليون تەڭگەنى بولەتىن بولدىق. تاياۋدا جۇمىس باستالادى. وسىلايشا, رەت-رەتىمەن حالىقتىڭ تىرشىلىگى ءۇشىن قاجەتتى ماسەلەلەردى شەشە بەرەمىز,– دەدى قىرىمبەك ەلەۋ ۇلى. جاڭاقورعانعا گاز جەتكىزگەن «قازترانسگاز ايماق» اق-تىڭ باس ديرەكتورى يبۋللا سەرديەۆ تە اۋدان جۇرتشىلىعىنىڭ قۋا­نى­شىمەن ءبولىستى. – ءبىزدىڭ جوبامىزدىڭ باستى ەرەكشەلىگى – وبلىسقا وتاندىق گاز جەتكىزىلەتىن بولادى, ياعني گاز توق­تاۋسىز بەرىلەدى. حالىقتىڭ الەۋ­مەتتىك از قامتىلعان توپتارىنا جەڭىلدىكتەر قاراستىرىلعان. تۇر­عىنداردىڭ جاعدايىنا قاراي وتى­رىپ, پايىزى تومەن نەسيە­لەر ارقىلى بىرتىندەپ تولەۋ ءمۇم­كىندىگىن دە ويلاستىردىق. سونىمەن قاتار, تامىز بەن قازان ارالىعىندا پەش جانە ەسەپتەۋىش قۇرالدارىن ساتىپ الۋشىلارعا 45 پايىزدىق جەڭىلدىك بەرىلەدى, – دەدى ول. جاڭاقورعاندىقتاردىڭ قۋا­نىشىندا شەك جوق. تالاي جىل­عى ارماندارى ورىندالعان اۋدان تۇرعىندارىنىڭ اتىنان ارداگەرلەر كەڭەسىنىڭ توراعاسى زي­ناب­دين شەرماعانبەت قۇتتىقتاۋ ءسوز سويلەپ, ەلباسىنا سىر جۇرت­شى­لىعىنىڭ اتىنان العىس ايتتى. وسى اپتادا شيەلى اۋدانىن گازداندىرۋ باستالادى, ودان كەيىنگى كەزەكتە – قازالى جانە ارال اۋداندارى بار. ەرجان بايتىلەس, «ەگەمەن قازاقستان». قىزىلوردا وبلىسى.