بايلانىس اياسى كەڭەيەدى

اتىراۋلىقتار وڭتۇستىكقازاقستاندىقتارعا شاعىن اۆتوبۋس سىيلادى دوستىق كوڭىل ءۇشىن جەردىڭ شالعايلىعى كەدەرگى جاساي المايدى. بۇدان ءۇش اي بۇرىن وڭتۇستىك قازاقستاندا اتىراۋ وبلىسىنىڭ كۇندەرى وتكەن ەدى. سول كەزدە اتىراۋلىق ونەر شەبەرلەرى وڭتۇستىكقازاقستاندىقتارعا ءان مەن جىردان شاشۋ شاشقان بولاتىن. ەندى جاقىندا وڭتۇستىك قازاقستان وبلىسىنىڭ اتىراۋدا مادەنيەت كۇندەرى ءوتتى. قوس وبلىستىڭ اتاۋلارى باسقاشا اتالعانى, ءبىرى وڭتۇستىكتە, ەكىنشىسى باتىستا ورنالاسقانى بولماسا, وڭتۇستىك قازاقستان مەن اتىراۋدى بايلانىستىراتىن ۇقساستىقتار جەتەرلىك. اتىراۋ مەن شىمكەنتتى شەكارا قوسپاعانىمەن, ادامدارى بايلانىستىرىپ جاتىر. بيىل قازاق حاندىعىنىڭ 550 جىلدىعى كەڭىنەن تويلانۋدا. ەگەر وڭتۇستىك پەن باتىس بايلانىسپاعاندا, حاندىقتىڭ ءبىر استاناسى توستىكتىڭ تورىندەگى رۋحاني استانا – تۇركىستان, ەكىنشى استاناسى كيەلى سارايشىق بولماس ەدى. ەلىمىزدىڭ مەملەكەتتىك ءانۇرانىنىڭ ءسوزىن جۇمەكەن ناجىمەدەنوۆ, ءانىن ءشامشى قالداياقوۆ جازباس ەدى. «اق التىن» تەرگەن وڭتۇستىك پەن «قارا التىن» وندىرگەن مۇنايلى اتىراۋدىڭ اراسىندا گەوگرافيالىق ۇقساستىق تا بار ەكەن. قازاقتىڭ سارى دالاسىنىڭ ۇلى وزەنى – سىرداريانى وڭتۇستىك ەمىپ وتىرسا, ايالى اق جايىقتان باتىس ءوڭىرى ءنار الۋدا, دەدى وڭتۇستىكقازاقستاندىقتار ونەر شەبەرلەرىنىڭ گالا-كونتسەرتىندە اتىراۋ وبلىسى اكىمىنىڭ ورىنباسارى شىڭعىس مۇقان. ول وڭتۇستىك قازاقستان وبلىسىنىڭ دەلەگاتسياسىنا شاعىن اۆتوبۋستى سىيعا تارتتى. وڭتۇستىك قازاقستان وبلىسى اكىمىنىڭ ورىنباسارى ەرلان ايتاحانوۆ ايماقارالىق بايلانىستىڭ تاجىريبە الماسۋ ءۇشىن قاجەتتىگىنە كوڭىل اۋداردى. ول وڭتۇستىك وڭىردە جارىققا شىققان « ۇلى دالا وسيەتى» كىتابىنىڭ 50 داناسىن, «وركەندەگەن, كوركەمدەنگەن وڭتۇستىك» كىتابى مەن «قازىنالى وڭتۇستىك» كوپتومدىعىن, تۇركىستانداعى ق.ياساۋي كەسەنەسى سالىنعان گوبەلەن مەن ارىستان باب كەسەنەسى بەينەلەنگەن كىلەمدى اتىراۋلىقتارعا تارتۋ ەتتى. اتىراۋلىقتارعا «سۇگىر» اتىنداعى قازاق ۇلت-اسپاپتار وركەسترىنىڭ, «تۇمار» فولكلورلىق ءانسامبلى مەن قوبىزشىلار ءانسامبلىنىڭ, ش.قالداياقوۆ اتىنداعى وڭتۇستىك قازاقستان وبلىستىق فيلارمونيا ۇجىمىنىڭ, «سەمسەر» توبى مەن «قازىنا» بي توبىنىڭ, انشىلەر مەن ءارتۇرلى اسپاپتاردا وينايتىن شەبەرلەردىڭ ونەرى ۇسىنىلدى. وڭتۇستىك قازاقستان وبلىستىق ءازىل-سىقاق جانە ساتيرا تەاترى ۇسىنعان ج.ايماۋىتوۆتىڭ «سىلاڭ قىز» قويىلىمى دا مۇنايلى ءوڭىر تۇرعىندارىنىڭ ىستىق ىقىلاسىن تۋدىردى. ايتقانداي, وڭتۇستىكقازاقستاندىق ونەر شەبەرلەرى ماحامبەت جانە يساتاي اۋداندارىندا ونەر كورسەتتى. سونىمەن بىرگە, وڭتۇستىك قازاقستانداعى مۇراجايلار جادىگەرلەرى مەن قولونەر شەبەرلەرى مەن سۋرەتشىلەرىنىڭ تۋىندىلارى «شىرايلى وڭتۇستىك شەجىرەسى» اتتى كەڭەيتىلگەن كورمە-ەكسپوزيتسياعا قويىلدى. جولداسبەك شوپەعۇل, «ەگەمەن قازاقستان». اتىراۋ.