ءبىر ۇمىتكەر ءوتتى, ەكىنشىسى ءسۇرىندى

كەشە ورتالىق سايلاۋ كوميسسياسىندا قازاقستان رەسپۋبليكاسى پرەزيدەنتتىگىنە كانديداتتىققا ۇسىنىلعان «رۋحاني قوعام الەمى» قوعامدىق قورىنىڭ پرەزيدەنتى ليمانا قويشيەۆا مەن ۋاقىتشا جۇمىسسىز سافيوللا الداجانوۆ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسياعا سىناق تاپسىردى. لينگۆيستيكالىق كوميسسيانىڭ توراعاسى مىرزاتاي جولداسبەكوۆ سىناق تاپسىرۋشى ليمانا قويشيەۆا ءۇش كەزەڭنەن تۇراتىن سىناقتىڭ ءتارتىبىن تۇسىندىرگەن سوڭ, ول ۇسىنىلعان تاقىرىپتاردىڭ ىشىنەن ءوز قالاۋى بويىنشا جازباشا جۇمىسىنا «قازاق ءداستۇرىنىڭ رۋحاني قۇندىلىقتارى» دەگەن تاقىرىپتى تاڭدادى. ونىڭ سىناق تاپسىرۋ ۋاقىتى ءبىر جارىم ساعاتقا عانا سوزىلدى. «ليمانا قويشيەۆانىڭ سىناق تاپسىرۋ ناتيجەسى بىلاي بولدى, – دەدى لينگۆيستيكالىق  كوميسسيانىڭ توراعاسى مىرزاتاي جولداسبەكوۆ. – «قازاق ءداستۇرىنىڭ رۋحاني قۇندىلىقتارى» دەگەن تاقىرىپتاعى جازبا جۇمىسىندا ول التى قاتە جىبەرگەن. ونىڭ ءبىر قاتەسى ەملەدەن, ەكى قاتە تىنىس بەلگىسىنەن, ال ءۇش قاتە سويلەم قۇراۋدان كەتكەن. كانديداتتىققا ۇسىنىلۋشى ل.قويشيەۆانىڭ جازبا جۇمىسىنىڭ ساپاسى ناشار بولعان جوق». كوميسسيا توراعاسىنىڭ اتاپ وتۋىنشە, سىناق تاپسىرۋشى ەكىنشى كەزەكتە ابايدىڭ قارا سوزدەرىن مانەرلەپ وقۋى ءتيىس ەدى. ولاردى ۇمىتكەر قۇلاققا دا, جانعا دا جاعىمدى ەتىپ, مانەرلەپ وقىپ بەرگەن. «ابايدىڭ قارا سوزدەرىن ناقىشىنا كەلتىرىپ وقۋ وڭاي ەمەس, – دەدى كوميسسيا توراعاسى. – ءۇشىنشىسى ەركىن تاقىرىپ رەتىندە «الەم جانە بەيبىتشىلىك» دەگەن تاقىرىپ كەلدى. ۇمىتكەر بۇل تاقىرىپتى دا وتە جاقسى اڭگىمەلەپ بەردى. كوميسسيا مۇشەلەرى ريزا بولدى. ناتيجەسىندە لينگۆيستيكالىق كوميسسيا ليمانا قويشيەۆا مەملەكەتتىك ءتىلدى ەركىن مەڭگەرگەن دەگەن قورىتىندىعا كەلدى». «انالار مەن ارۋلار اتىنان قازاق ايەلىنىڭ بۇگىنگى بولمىسىن كورسەتۋ ماقساتىم بولدى, – دەدى بىزبەن سۇحباتىندا ليمانا قويشيەۆا. – ماعان وتباسىم, تۋعان-تۋىستارىم, دوستارىم سەنىم ارتتى. ولاردىڭ سەنىمىن اقتاۋ مەن ءۇشىن وتە ماڭىزدى. وتباسى دا شاعىن مەملەكەت دەيدى عوي. مەملەكەتتىڭ بەرىكتىگى – وتباسىنىڭ بەرىكتىلىگى. ەلباسىنىڭ باسشىلىعىمەن جۇزەگە اسىرىلىپ جاتقان ءىس-شارالار مەن جۇمىستاردىڭ بارلىعىنا وتە ريزامىن. جالپى, مەن پرەزيدەنتىمىزدىڭ جۇرگىزىپ جاتقان ساياساتىن تولىق قولدايمىن, ءوزىمدى ەلباسىنى جاقتاۋشىلاردىڭ ءبىرى دەپ ەسەپتەيمىن». لينگۆيستيكالىق كوميسسيانىڭ سىناعىندا ويداعىداي ناتيجە كورسەتكەن ليمانا قويشيەۆا كانديداتتىققا ۇسىنىلعان 10 ادامنىڭ ىشىندەگى جالعىز ايەل ەكەنىن ايتا كەتكەنىمىز ءجون شىعار. ويتكەنى, قازاق حالقى قىزدارىن ارقاشان قۇرمەتتەگەن عوي. ال ۋاقىتشا جۇمىسسىز ءجۇر­گەن كانديداتتىققا ۇسى­نى­لۋ­شى سافيوللا الداجا­نوۆتىڭ مەم­لەكەتتىك ءتىلدى ەركىن مەڭگەرگەندىگى ءجو­نىندەگى سىناق­قا قاتىستى جاز­با جۇمىسى دا, مانەر­لەپ وقۋى دا, سويلەۋى دە لينگۆيس­تيكا­لىق كوميس­سيا مۇشەلەرىن قاناعاتتان­دىر­مادى. ونى كوميسسيا ءتورا­عاسى مىر­زاتاي جولداسبەكوۆ اتاپ كور­سەتتى. «الداجانوۆتىڭ «قازاق حان­دىعىنىڭ قاھارماندىق شەجىرەسى» تاقىرىبىنا جازعان جۇمىسى ساۋاتسىز جازىلعان, – دەدى كوميسسيا توراعاسى سىناق قورىتىندىسى ءجو­نىندە. – 42 قاتە كەتكەن, ونىڭ ىشىندە ەمىلە قاتەسى – 17, تىنىس بەلگىسى – 18, سويلەم قۇراۋى جاعىنان 7 قاتە جىبەرىلگەن. وي جۇيەسىز باياندالادى. قازاق حاندىعى تۋرالى كوپ ماسەلەلەردى ايتۋعا بولادى». سىناق تاپسىرۋشى ەكىنشى جانە ءۇشىنشى تالاپتارعا دا ءجوندى جاۋاپ بەرە المادى. «جاھاندانۋ: ءۇمىت پەن كۇدىك» تاقىرىبىن ءوزىڭىز تاڭداپ الدىڭىز. وكىنىشكە قاراي, جاھاندانۋ تۋرالى ۇعىمىڭىز وتە تاياز بولىپ شىقتى. سوندىقتان لينگ­ۆيستيكالىق كوميسسيا سا­فيول­لا قالاباي ۇلى الداجانوۆ مەملە­كەتتىك ءتىلدى ەركىن مەڭگەرمەگەن دەگەن قورىتىندىعا كەلدى», – دەدى م.جول­داسبەكوۆ. ال سىناق تاپسىرۋشى لينگ­ۆيس­تيكالىق كوميسسيانىڭ شىعارعان قورىتىندىسىمەن كەلىستى. «راسىندا دا مەن جاھاندانۋ دەگەننىڭ نە ەكەنىن تۇسىنبەدىم. ول ەكونوميكاعا قاتىستى شىعار», – دەدى سافيوللا الداجانوۆ بىزبەن اڭگىمەسىندە. ءاليسۇلتان قۇلانباي, «ەگەمەن قازاقستان».