سۇلۋلىق. نازىكتىك. تاعاتتىلىق. ىسكەرلىك

8 ناۋرىز – حالىقارالىق ايەلدەر كۇنى قۇرمەتىنە وراي قازاقستان رەسپۋبليكاسىنىڭ پرەزيدەنتى ن.ءا.نازارباەۆپەن «كوكتەم شۋاعى» كەزدەسۋىنە قاتىسقان قازاقستاننىڭ ايەلدەر قوعامداستىعىنىڭ وكىلدەرى

يرينا پەتروۆنا ارونوۆا, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى. 58 جاستا. ءماجىلىستىڭ الەۋمەتتىك-مادەني دامۋ جونىندەگى كوميتەتىنىڭ مۇشەسى. قازاقستان رەسپۋبليكاسىنىڭ قۇرمەت گراموتاسىمەن (2007 ج.), «قۇرمەت» وردەنىمەن (2012 ج.) ماراپاتتالعان. اۋداندىق مادەنيەت ءۇيىنىڭ مەتوديسىنەن, مادەنيەت جونىندەگى كوميتەت ءتورايىمى, اۋداندىق مادەنيەت ءبولىمىنىڭ مەڭگەرۋشىسى, اكىمشىلىك باسشىسىنىڭ ورىنباسارى, اۋدان اكىمىنە دەيىنگى ەڭبەك جولىنان ءوتتى. قوستاناي وبلىسى از قامتاماسىز ەتىلگەن ازاماتتاردى قولداۋ جونىندەگى وڭىرلىك قوردى باسقاردى (1988-2007). 2007 جىلدىڭ تامىزىندا قوستاناي وبلىستىق ءماسليحاتىنىڭ دەپۋتاتى بولىپ سايلاندى. 2007 جىلدىڭ مامىرىنان «نۇر وتان» پارتياسى قوستاناي وبلىستىق فيليالى توراعاسىنىڭ ءبىرىنشى ورىنباسارى بولىپ تابىلادى. سالتانات احمەتوۆا, «استانا وپەرا» وپەرا جانە بالەت تەاترىنىڭ جەتەكشى ءسوليسى. 28 جاستا. ماسكەۋدە وتكەن «ۇلكەن وپەرا» جاس ورىن­داۋ­شىلاردىڭ تەلەۆيزيالىق بايقاۋىنىڭ جەڭىمپازى. 2014 جىلدىڭ 29 قاراشاسىندا چايكوۆسكي اتىنداعى كونسەرۆاتوريانىڭ زالىنداعى سالتاناتتىڭ ونەر كورسەتۋىن كورەرمەندەر دۋ قول شاپالاقپەن قارسى الدى. گەرمانياداعى Neue Stimmen حالىقارالىق بايقاۋىنىڭ Klassik-Herbst Forderpreis ارنايى جۇلدەسىنىڭ يەگەرى. كوكشەتاۋ قالاسىنداعى ءبىرجان سال اتىنداعى مۋزىكا كوللەدجىنىڭ (2004) جانە قازاق ۇلتتىق مۋزىكا اكا­دە­مياسىنىڭ (2008) تۇلەگى. يتالياداعى ۆوكال ونەرى اكادەمياسىندا تاجىريبەدەن ءوتتى (2009). ءانشىنىڭ ەنشىسىندە بىرنەشە رەس­پۋب­ليكالىق جانە حالىقارالىق بايقاۋلارداعى جەڭىستەر, ولاردىڭ اراسىندا بيبىگۇل تولەگەنوۆا, گلينكا, Villaincanto (يتاليا) اتىنداعى بايقاۋلار بار. اقنۇر جۇماباەۆا, «Queen of the Planet-2014» گران-ءپريى اتاعىنىڭ يەگەرى. 35 جاستا. كوپ بالالى انا اقنۇر جولداسىمەن بىرگە 6 بالانى (3 قىز جانە 3 ۇل) تاربيەلەپ ءجۇر, «كۇمىس القا» يەگەرى. ەرلى-زايىپتىلارعا بالا تاربيەلەۋدە ۇلكەن ىنتىماقتى ۇيدە بىرگە تۇرىپ جاتقان ەرىنىڭ اتا-اناسى كومەكتەسەدى. ەكى جوعارى ءبىلىمى بار. ەكونوميكا عىلىمدارىنىڭ ماگيسترى. كونسالتينگتىك كومپانيانى باسقارادى جانە 15 جىلدان استام ۋاقىتتان بەرى باعالاۋ قىزمەت سالاسىندا ەڭبەك ەتەدى. Queen of the Planet اتاعىن الۋداعى جەڭىس – بۇل قازاقستاندىق ايەلدەردىڭ وسىناۋ حالىقارالىق بايقاۋداعى العاشقى جەڭىسى. ول مۇنى تەك ءوزىنىڭ عانا ەمەس, سونىمەن بىرگە, «مەنىڭ ەلىمنىڭ ەڭبەگى» دەپ ەسەپتەيدى. Queen of the Planet بايقاۋىنىڭ يدەياسى – وتباسىلىق قۇندىلىقتاردى دارىپتەۋ, انا بەدەلىن ارتتىرۋ. حالىقارالىق بايقاۋعا قاتىسۋ يدەياسى اقنۇرعا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مەن «سەزون» جۋرنالى «قازاقستان ارۋى-2011» بالالى ايەلدەر اراسىندا ۇيىمداستىرعان ۇلتتىق بايقاۋدان كەيىن كەلگەن. قۇرالاي احمەتقىزى اققوشقاروۆا, پروفەسسور, قازاقستان ينجەنەرلىك اكادەمياسىنىڭ اكادەميگى. 65 جاستا. ءال-فارابي اتىنداعى قازاق ۇلتتىق ۋنيۆەرسيتەتىن, ا.بايكوۆ اتىنداعى ماسكەۋ مەتاللۋرگيا ينستيتۋتىنىڭ اسپيرانتۋراسىن بىتىرگەن. وقىتۋشىدان دەكانعا دەيىنگى ەڭبەك جولى ۋنيۆەرسيتەتتە ءوتتى. قازاقستان رەسپۋبليكاسىنىڭ ءبىلىم جانە عىلىمعا ەڭبەك سىڭىرگەن قىزمەتكەرى. 2013 جىلى ۋنيۆەرسيتەتتىڭ عىلىمي كەڭەسى وعان «ۋنيۆەرسيتەت كافەدراسىنىڭ قۇرمەتتى مەڭگەرۋشىسى» اتاعىن بەردى. جۇزدەن استام عىلىمي ەڭبەكتەردىڭ, سونداي-اق, «فيزيكا. تەوريا. ەسەپتەر. سۇراقتار. ونى شەشۋدىڭ جولدارى» اتتى العاشقى مەملەكەتتىك تىلدەگى وقۋلىقتىڭ اۆتورى. عالىم ن.قويشىباەۆپەن بىرلەسكەن وسىناۋ ەڭبەك قر بعم تاپسىرىسى بويىنشا «اتامۇرا» باسپاسىنان (2006 ج.) جارىققا شىقتى جانە شەشۋ جولدارى مەن جاۋاپتارى كەلتىرىلگەن مىڭنان استام تەست سۇراقتارى مەن ەسەپتەردەن تۇرادى. 1972 جىلى «مولودايا گۆارديا» (ماسكەۋ) باسپاسىنان «ستۋدەنتتەردىڭ بۇكىلوداقتىق سلەتى» اتتى كىتابى شىقتى, وندا سلەت دەلەگاتتارى الدىندا ءسوز سويلەپ, كسرو باسشىسى ل.ي.برەجنەۆتەن العىس العان قازاق ستۋدەنتى ق.اققوشقاروۆا تۋرالى ماتەريال جاريالاندى. «ەڭبەكتەگى ەرلىگى ءۇشىن» مەدالىمەن ماراپاتتالعان. مەرەكە سەرىكقاليقىزى اقسيەۆا, كوپ بالالى انا. 38 جاستا. باتىس قازاقستان وبلىسىنىڭ قازتالوۆ اۋدانىنداعى قايشاقۇدىق اۋىلىندا تۇرادى. ورتا ءبىلىمى بار. 2011 جىلدان سەلولىق كلۋب مەڭگەرۋشىسى بولىپ جۇمىس ىستەيدى. جولداسى ەرمەكپەن بىرگە 7 بالا (4 ۇل جانە 3 قىز) تاربيەلەپ وتىر, «التىن القا» يەگەرى. ەرى شارۋا قوجالىعىن باسقارادى. مەرەكە ءوز ۋاقىتىنىڭ كوبىن بالا تاربيەسىنە بولەدى. بۇل ىستە وعان مەكتەپتە مۇعالىم بولىپ ىستەيتىن قىزدارىنىڭ ۇلكەنى كومەكتەسەدى. مۋزىكانى ۇناتادى, دومبىرا تارتادى. سابينا التىنبەكوۆا, ۆولەيبولشى, قازاقستان رەسپۋبليكاسى جاسوسپىرىمدەر قۇراما كومانداسىنىڭ مۇشەسى. 18 جاستا. سابينا 16 جاسىنان «الماتينوچكا-الماتى» كلۋبىندا وينايدى. كوماندامەن بىرگە 2013-2014 جىلدىڭ ماۋسىمىندا «ا» جوعارى ليگاسىنىڭ كۇمىس مەدالىن جەڭىپ الدى. ءال-فارابي اتىنداعى قازۇۋ-دىڭ 1-كۋرسىندا «بيولوگيا-بيوتەحنولوگيا» ماماندىعى بويىنشا وقيدى. 2014 جىلى س.التىنبەكوۆا قازاقستان رەسپۋبليكاسى قىزىل جارتى ايىنىڭ العاشقى رەسمي ۆولونتەرى بولدى. بۇل قوعام الەمنىڭ 189 ەلىندەگى 500 ملن. ادامدى بىرىكتىرەتىن قىزىل كرەست جانە قىزىل جارتى اي حالىقارالىق قوزعالىسىنىڭ بولىگى بولىپ تابىلادى. الماتى قالاسى مەملەكەتتىك جاستار ساياساتىن جۇزەگە اسىرۋ ماسەلەلەرى جونىندەگى كەڭەستىڭ مۇشەسى. تايبەيدەگى (قحر) ۆولەيبولدان جاسوسپىرىمدەر اراسىنداعى ازيا چەمپيوناتىندا الەمدىك باقتار سابينانى «قازاقستاننىڭ ەڭ سۇلۋ ۆولەيبولشىسى», سونداي-اق, «چەمپيوناتتىڭ ەڭ سۇلۋ ۆولەيبولشىسى» دەپ اتادى. تايۆان, جاپونيا جانە باسقا دا ازيالىق ەلدەر تەلەۆيدەنيەسى سابيناعا بىرقاتار رەپورتاجدار ارنادى. Daily Mail گازەتىنىڭ شولۋشىسى س.التىنبەكوۆاعا ءوزى قاتىسقان وقيعانى ءوز تۇلعاسىمەن كومەسكىلەندىرۋدىڭ ءساتى ءتۇستى دەپ اتاپ ءوتتى, باسپاسوزدە چەمپيونات تۋرالى ءاربىر ەكى جولعا تىكەلەي ول تۋرالى ون بەتتەن كەلدى. زارينا دياس, تەننيسشى, WTA رەيتينگىندە الەمنىڭ 30-شى راكەتكاسى, جەكە رازريادتا بەس ITF ءتۋرنيرىنىڭ جەڭىمپازى. 21 جاستا. زارينا 13 جاسىندا قازاقستان رەسپۋبليكاسىنىڭ سپورت شەبەرى بولدى. 15 جاسىندا استاناداعى 25-مىڭدىقتا زارينا بىرىنەن سوڭ ءبىرى بەس ماتچتى ۇتتى جانە ءوزىنىڭ العاشقى كاسىبي مارتەبەسىن جەڭىپ الدى. جاس وتانداسىمىزدىڭ تابىسىن ۇلتتىق فەدەراتسيا اتاپ ءوتتى – ول ۇلتتىق قۇراما كومانداعا شاقىرىلدى جانە فەدەراتسيا كۋبوگىندا ول ءۇشىن ءبىر ماتچ وينادى. تسيۋانچجوۋدا جەڭىپ العان مارتەبە, ستراسبۋرگتەگى, مالايزياداعى, حوبارتتاعى, شەنجەندەگى WTA ءتۋرنيرىنىڭ شيرەك فينالىنداعى جەڭىس, نوتتينگەمدەگى, وساكاداعى فينالعا شىعۋى, ۇلكەن شلەم تۋرنيرىندەگى تابىستى ونەر كورسەتۋلەرى, ۋيمبلدوننىڭ 1/8, اۆستراليا وپەننىڭ 1/16 فينالىنا شىعۋى, US Open-دە جۇپتاسىپ, شيرەك فينالعا شىعۋى – ءبىر جىلعى تابىستارى وسىنداي. جۇزدەن استام پوزيتسيالاردى ويناپ, ول ماۋسىمدى جەكە رەيتينگتە الەمنىڭ 30-شى راكەتكاسى بولىپ اياقتادى. قىتاي مامانى الان مانىڭ گۋانچجوۋداعى اكادەميا­سىندا جاتتىعادى. جانار دۇعالوۆا, بەلگىلى قازاقستاندىق ءانشى, اكتريسا, كومپوزيتور. 28 جاستا. گيتيس تۇلەگى (ماسكەۋ) 2001 جىلعى «جاس قانات» بايقاۋىنىڭ گران-پري يەگەرى, كوپتەگەن حالىقارالىق بايقاۋلاردىڭ جانە رەسەيدەگى, پولشاداعى, ەستونياداعى, فرانتسياداعى, بولگارياداعى, قىتايداعى فەستيۆالداردىڭ لاۋرەاتى. قازاندا وتكەن «Turkvizion-2014» ءىى حالىقارالىق ءان بايقاۋىنىڭ جەڭىمپازى, وندا «تۇرىك الەمىنىڭ التىن داۋىسى» رەتىندە تانىلدى. جانار دۇعالوۆا ءوزىنىڭ بايقاۋداعى جەڭىسىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆقا ارنادى. جانار ءوزى جازعان ء«ىزىن كورەم» كومپوزيتسياسى بويىنشا ونەر كورسەتتى جانە جيىنتىعىندا 225 بالل الدى. بارلىعى فينالعا قازاقستاننان, تاتارستاننان, تۇركيادان, باشقۇرتستاننان, رەسەيدەن, وزبەكستاننان, قىرعىزستاننان, ماكەدونيادان, يراننان, قىرىمنان, بوسنيادان, بولگاريادان, ياكۋتيادان, ازەربايجاننان جانە تۇرىكمەنستاننان 15 كونكۋرسانت قاتىستى. گۇلناز جولانوۆا, «قازاق ارۋى-2014» رەسپۋبليكالىق سۇلۋلىق بايقاۋىنىڭ جەڭىمپازى. 21 جاستا. اقتاۋ قالاسىندا تۋعان. اقتاۋ قالاسىنداعى ەكونوميكالىق ليتسەيدىڭ تۇلەگى. ءال-فارابي اتىنداعى قازاق ۇلتتىق ۋنيۆەرسيتەتىنىڭ «تۋريزم ماماندىعى» بويىنشا 4-كۋرس ستۋدەنتى. رەسەيدە (2006 ج.), چەحيادا (2008 ج.), اۆستريادا (2008 ج.), ماكەدونيادا (2009 ج.), ارمەنيادا (2010 ج.) وتكەن ۇلتتىق بيلەردى وزىق ورىنداۋدا حالىقارالىق بايقاۋلار لاۋرەاتى بولىپ تابىلادى. «ماحابباتىم جۇرەگىمدە» تەلەسەريالىنداعى باستى ءرولدى (كامشات), «قىزدار» تەلەسەريالىندا باستى ءرولدى (زەرە) ورىنداۋشى. قازىرگى ۋاقىتتا ۋنيۆەرسيتەتتەگى وقۋدى «Shine Production» پروديۋسەرلىك ورتالىعىنداعى جۇمىسپەن (اكتريسا, تەلەجۇرگىزۋشى) قوسا الىپ ءجۇر. نازىم قىزايباي, بوكستان الەم چەمپيونى. 21 جاستا. قازاقستاننىڭ ايەلدەر بوكسى تاريحىنداعى العاشقى الەم چەمپيونى. 2014 جىلدىڭ قاراشاسىندا وڭتۇستىك كورەيادا وتكەن ايەلدەر اراسىنداعى چەمپيوناتتا نازىم التىن مەدالدى جەڭىپ الدى. ەڭبەك سىڭىرگەن سپورت شەبەرى. 2009-دان 2014 جىلعا دەيىن قازاقستان چەمپيونى. 2011-2012 جج. الەم جۇلدەگەرى. بوكستان حالىقارالىق كلاستاعى سپورت شەبەرى. الماتى قالاسىنداعى سپورت جانە تۋريزم اكادەمياسىنىڭ 3-كۋرسىندا وقيدى. قىزايباي وتباسىندا 6 بالا بار. اتا-انالارى بوكسپەن اينالىسۋىنا قولداۋ ءبىلدىردى. بوكستان تىس نازىم سپورتتىڭ باسقا تۇرلەرىمەن دە اينالىستى: مەكتەپتە ۆولەيبول, فۋتبول وينادى. سپورتتاعى دارىندى بالالارعا ارنالعان ينتەرناتقا تۇسكەننەن كەيىن بەس ايدان سوڭ جاسوسپىرىمدەر اراسىنداعى قازاقستان چەمپيوناتىندا ءبىرىنشى ورىندى جەڭىپ الدى. تاتيانا نيكولاەۆنا نەمتسان, سەلولىق مەكتەپ ديرەكتورى. 50 جاستا. مەكتەپ ديرەكتورى. اقمولا وبلىسى ارشالى اۋدانىنداعى «اقبوتا» قوعامدىق قورىن باسقارادى. قازاقستان جاستارى اراسىنداعى «جاسىل باستاما» قوزعالىسىنىڭ باستاماشىسى بولىپ تابىلادى. وڭىرلىك, وبلىستىق جانە ۇلتتىق دەڭگەيلەردە جەرگىلىكتى حالىقتىڭ اراسىندا ەنەرگيا جانە سۋ ۇنەمدەۋ تەحنولوگيالارىن العا باستىرۋ جۇمىستارىنا جەتەكشىلىك جاسايدى. ەنەرگيا ءتيىمدى تاجىريبەنى (كۇن كوللەكتورلارى, ءپيروليزدى جىلىتۋ, كۇن باتارەيالارى), سونداي-اق, سۋ ۇنەمدەۋ تەحنولوگيالارىن ( تامشىلاتىپ سۋارۋ, ەنەرگيا ءتيىمدى جىلىجايلار) ەنگىزۋ بويىنشا ۇكىمەتتىك ەمەس ۇيىمداردىڭ رەسۋرستىق جەلىسىن ۇيىمداستىردى, ول بالالاردى ءۆيتاميندى تاماقتاندىرۋ ماسەلەسىن شەشۋدە جۇمىسسىز ايەلدەر ءۇشىن جاڭا جۇمىس ورىندارىن اشۋعا جاعداي جاسايدى. تاياۋدا تۋنيستە V ەنەرگيا تيىمدىلىگى جونىندەگى حالىقارالىق فورۋمدا قازاقستاننىڭ ەنەرگيا ءتيىمدى باستاماسىن العا باستىرۋداعى تاجىريبەنى ۇسىندى. قازاقستان رەسپۋبليكاسى ءبىلىم بەرۋ ءىسىنىڭ ۇزدىگى. تۇرمىسقا شىققان. ەكى بالا تاربيەلەپ وتىر. دينارا مۇراتقىزى رىسبەكوۆا, مەرگەن. 26 جاستا. كىشى سەرجانت دينارا رىسبەكوۆا كەلىسىمشارت بويىنشا 2002 جىلدان قارۋلى كۇشتەر قاتارىندا اسكەري قىزمەت اتقارىپ ءجۇر. 2007 جىلى سەمەي پوليتەحنيكالىق كوللەدجىن اياقتاعان. تۇرمىسقا شىققان, ەكى بالا تاربيەلەپ وتىر. گارنيزوننىڭ قوعامدىق-ساياسي ومىرىنە بەلسەندى ارالاسادى. 2013 جانە 2014 جىلدارداعى اسكەريلەندىرىلگەن پارادقا قاتىسقان. گۇلجان جانپەيىسقىزى قاراقۇسوۆا, پارلامەنت ءماجىلىسىنىڭ دەپۋتاتى, قارجى جانە بيۋدجەت كوميتەتىنىڭ ءتورايىمى. 63 جاستا. س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ ساياسي ەكونوميكا فاكۋلتەتىن تامامداعان (1972). ەكونوميكا عىلىمدارىنىڭ دوكتورى, پروفەسسور. قازاق مەملەكەتتىك ۋنيۆەرسيتەتىنىڭ ساياسي ەكونوميكا كافەدراسىنىڭ اعا وقىتۋشىسى, ەكونوميكا جانە قۇقىق ۋنيۆەرسيتەتىنىڭ كافەدرا مەڭگەرۋشىسى بولىپ ەڭبەك ەتتى. 1994 جىلدان 1995 جىلعا دەيىن قازاقستان رەسپۋبليكاسى پرەزيدەنتىنىڭ كومەكشىسى – ەكونوميكالىق كەڭەسشىلەر كەڭەسىنىڭ جەتەكشىسى, 1997 جىلدان 2001 جىلدارى پارلامەنت سەناتىنىڭ دەپۋتاتى, ەكونوميكا, قارجى جانە بيۋدجەت جونىندەگى كوميتەت ءتورايىمى, 2001 جىلدان 2007 جىلعا دەيىن قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى قىزمەتتەرىن اتقاردى. 2012 جىلدىڭ قاڭتار ايىنان باستاپ قازاقستان رەسپۋبليكاسى پارلامەنتى بەسىنشى شاقىرىلىمىنداعى ءماجىلىستىڭ قارجى جانە بيۋدجەت كوميتەتىنىڭ ءتورايىمى قىزمەتىن اتقارادى. «پاراسات», II-دارەجەلى «بارىس», «ىنتىماقتاستىق» وردەندەرىمەن ماراپاتتالعان. اقتولقىن قۇرماشەۆا, باقشاشى, جەكە كاسىپكەر. 43 جاستا. اقتولقىن باۋ-باقشا ىسىمەن اينالىسادى. الما جانە باسقا جەمىس-جيدەك وسىرەدى. قازىر ونىڭ 14 گەكتار جەردى الىپ جاتقان الما باعىندا 5 مىڭنان استام الما اعاشى بار. الما تۇقىمىن جاقسارتۋ ماقساتىندا جەمىس اعاشتارىن بۋدانداستىرۋمەن اينالىسادى. «باق وتىرعىزۋ بولاشاققا باعا جەتپەس مۇرا قالدىرۋمەن پارا-پار», دەيدى اقتولقىن. قاراعاندى پوليتەحنيكالىق ۋنيۆەرسيتەتىن وندىرىستىك جانە ازاماتتىق قۇرىلىس ماماندىعى بويىنشا تامامداعان. 2001-2012 جىلدار ارالىعىندا «ارىس» وندىرىستىك كووپەراتيۆىندە ەڭبەك ەتتى. 2012 جىلدان بەرى باۋ-باقشا وسىرۋمەن اينالىسادى. قارلىعاش جانە نۇرداۋلەت اتتى بالالارى بار. بالالارى وقۋ وزاتتارى جانە كوپتەگەن وليمپيادالىق ويىندار مەن بايقاۋلاردىڭ جەڭىمپازدارى. شىرىن اسىلحانقىزى قۇرمانباەۆا, قازاق گۋمانيتارلىق-قۇقىقتىق يننوۆاتسيالىق ۋنيۆەرسيتەتىنىڭ رەكتورى. 57 جاستا. قازاقستان رەسپۋبليكاسى ءبىلىم بەرۋ سالاسىنىڭ ۇزدىك قىزمەتكەرى (2004). س.م.كيروۆ اتىنداعى قازاق مەملەكەتتىك ۋنيۆەرسيتەتىن «تاريحشى» ماماندىعى (1980), قازاق قۇقىقتىق اكادەمياسىن «زاڭگەر» ماماندىعى بويىنشا (2000) تامامداعان. ساياسات عىلىمدارىنىڭ دوكتورى, پروفەسسور. رەسەي فەدەراتسياسى ساياسي اكادەمياسىنىڭ اكادەميگى (2007). «شاپاعات» مەدالىمەن (2008) ماراپاتتالعان. 7 مونوگرافيانىڭ, 10 وقۋ قۇرالىنىڭ, 100 عىلىمي ەڭبەكتىڭ اۆتورى. «اجار» ايەلدەر جەتىستىگىن قوعامدىق مويىنداۋ ۇلتتىق سىيلىعىنىڭ «عىلىم جانە ءبىلىم» نوميناتسياسى بويىنشا لاۋرەاتى (2003). قازاقستان رەسپۋبليكاسى پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ مۇشەسى. تۇرمىس قۇرعان. ۇلى, 2 قىزى جانە 5 نەمەرەسى بار. سەرينا سۋناگاۆا, «استانا وپەرا» تەاترىنىڭ بالەريناسى. 31 جاستا. سەرينا استانالىق «استانا وپەرا» تەاترىندا ونەر كورسەتەتىن جاپون بالەريناسى. ول ءوزىنىڭ جاستىق شاعىن وكيناۆا ارالىندا وتكىزگەن. 5 جاسىنان باستاپ بالەت ونەرىمەن اينالىسىپ, رەسەي بالەت مەكتەبىنەن ءدارىس الۋدى ارمانداعان. ونىڭ ارمانى ورىندالىپ, سانكت-پەتەربۋرگتاعى ۆاگانوۆ بالەت اكادەمياسىن تامامداعان. 2005 جىلدان 2013 جىلعا دەيىن ك.بايسەيىتوۆا اتىنداعى ۇلتتىق وپەرا جانە بالەت تەاترىندا بالەت ءارتىسى بولىپ جۇمىس ىستەدى. 2013 جىلى «استانا وپەرا» تەاترىنا جۇمىسقا قابىلداندى. وپەرالىق ءانشى سۇندەت بايعوجينعا تۇرمىسقا شىعىپ, ول ءوزىنىڭ ءومىرىن قازاقستانمەن ماڭگى بايلانىستىردى. سەرينا وتباسىنىڭ باسشىسى ەركەك بولۋى كەرەك دەپ ەسەپتەيدى جانە ونى قازاقتىڭ ۇلتتىق تاعامدارىمەن ەركەلەتەدى. ۇيدە قازاقشا, ورىسشا جانە جاپون تىلدەرىندە سويلەسەدى. قازىر ەرلى-زايىپتىلار ءسانيا اتتى 4 جاسار قىزدى تاربيەلەپ وتىر. تاتيانا نيكولاەۆنا بۋرميستروۆا, «تريو تاتيان» 80-جىلدارى كسرو-دا ەڭ تانىمال ونەر توبى بولعان. 57 جاستا. تاتيانا بۋرميستروۆا وڭتۇستىك قازاقستان وبلى­سىنىڭ العاباس كەنشارىندا ورىس وتباسىندا دۇنيەگە كەلدى. بالا جاسىنان باستاپ دومبىرا تارتىپ, تەك قازاق تىلىندە عانا ولەڭ ايتادى, اسىرەسە, تەرمەلەردى ناقىشىنا كەلتىرىپ ورىندايدى. تاشكەنت ورتاازيالىق پەدياتريالىق ينستيتۋتىن بىتىرگەن. ستۋدەنتتىك جىلدارى وقۋ مەن ايتىس ونەرىن قوسا دامىتتى. قازىرگى تاڭدا حالىق اۋىز ادەبيەتى شىعارماشىلىعى ارقىلى مەملەكەتتىك ءتىلدى ۇيرەتۋ, رۋحاني-ادامگەرشىلىك قۇندىلىقتاردى ناسيحاتتاۋ جونىندەگى «ۇلتتىق ونەر ورتالىعى» اتتى ورتالىق قۇرىپ جۇمىس جۇرگىزۋدە. 3 بالا تاربيەلەپ وسىرگەن, 1 نەمەرەسى بار. قازاقستان رەسپۋبليكاسىنىڭ ەڭبەك سىڭىرگەن قايراتكەرى. تاتيانا دميتريەۆنا پولتاۆسكايا, قازاق كسر مادەنيەتىنە ەڭبەك سىڭىرگەن قىزمەتكەر. 55 جاستا. حالىقارالىق كونكۋرستاردىڭ لاۋرەاتى. 80-جىلداردىڭ باسىندا تاتيانا پولتاۆسكايا ءوزىنىڭ تاماشا سوپرانو داۋسىمەن سول كەزدە داڭقى شىققان «التىباقان» جانە «تاماشا» تەلەباعدارلامالارىندا تۇراقتى ونەر كورسەتتى. پولتاۆسكايا تريو قۇرامىنداعى ءوزىنىڭ ونەر جولىن ەرەكشە ەسكە الادى. قازاق ءتىلى ول ءۇشىن ارقاشان تۋعان ءتىل بولعاندىعىن جانە جىلدار وتە كەلە دە سولاي بولىپ قالاتىندىعىن اتاپ كورسەتەدى. قازىرگى كەزدە ماسكەۋ قالاسىندا تۇرادى, «يزمايلوۆا» اتىنداعى ماسكەۋ پەداگوگيكالىق كوللەدج ديرەكتورىنىڭ تاربيە بەرۋ جانە الەۋمەتتىك جۇمىستار جونىندەگى ورىنباسارى بولىپ ەڭبەك ەتەدى. جۇبايىمەن بىرگە قىز ءوسىرىپ وتىر. تاتيانا ۆلاديميروۆنا مارتىنەنكو, شىمكەنت قالاسىنداعى №66 «بولاشاق» بالالار باقشاسىنىڭ مەڭگەرۋشىسى. 48 جاستا. وڭتۇستىك قازاقستان وبلىسى ورداباسى اۋدانىنىڭ چۋباروۆكا سەلوسىندا تۋعان. 1987 جىلى شىمكەنت مادەنيەت ينستيتۋتىن تامامداعان. ول ءوزىنىڭ ومىرلىك جولىن بالالارعا ءبىلىم جانە تاربيە بەرۋدەن تاپتى. بالالار باقشاسىندا تاربيەشى, №5 ورتا مەكتەپتە مۇعالىم بولىپ ەڭبەك ەتتى. مىنە, 16 جىلدان بەرى شىمكەنت قالاسىنداعى №66 «بولاشاق» بالالار باقشاسىنىڭ مەڭگەرۋشىسى بولىپ ەڭبەك ەتەدى. 1985 جىلى ماسكەۋ قالاسىندا وتكەن 12-ءشى بۇكىلالەمدىك جاستار جانە ستۋدەنتتەر فەستيۆالىن وتكىزۋگە دايىندىق جۇمىستارىن جۇرگىزۋ بويىنشا مەدال العان. قازاقستان رەسپۋبليكاسىنىڭ ەڭبەك سىڭىرگەن قايراتكەرى. ساكەن ومىرزاقوۆقا تۇرمىسقا شىققان. 3 بالا جانە 2 نەمەرە تاربيەلەپ وتىر. اينۇر تاششانوۆا, «Astana Solar» فوتوەلەكترلىك مودۋلدەردى قۇراستىرۋ جونىندەگى زاۋىتتىڭ وندىرىستىك اۋىسىمىنىڭ تەحنيگى. 23 جاستا. قوستاناي مەملەكەتتىك ۋنيۆەرسيتەتىن «قارجى» ماماندىعى بويىنشا تامامداعان. قازىرگى ۋاقىتتا زاۋىتتاعى ەڭبەگىن م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىندە «ەلەكترەنەرگەتيكاسى» ماماندىعى بويىنشا وقۋمەن ۇشتاستىرۋدا. ەلورداداعى 50 مۆت فوتوەلەكترلىك مودۋلدەرىن قۇراستىرۋ جونىندەگى زاۋىتتىڭ شىعاراتىن كۇن باتارەيالارىنىڭ قۋاتى 2 ءىرى ەلەكتر ستانساسىنىڭ وندىرەتىن ەلەكتر قۋاتىنا تەڭ. ا.تاششانوۆانىڭ مىندەتى شىنى پانەلدەرىن كۇن ەلەمەنتتەرىنىڭ اشەكەيلەرىمەن بەزەندىرۋ, ولاردى شىنى پانەلدەردە ورنالاستىرىپ پەشكە قىزدىرۋعا جىبەرۋ بولىپ تابىلادى. 1 ساعاتتا زاۋىت كونۆەيەرىنەن وسىنداي 30 پانەل شىعىپ وتىرادى. جايدارى دا جىلى ءجۇزدى اينۇر زاۋىتتىڭ قوعامدىق ومىرىنە بەلسەنە ارالاسادى, تاپقىشتار مەن كوڭىلدىلەر كلۋبىنىڭ, سپارتاكيادالاردىڭ بەلسەندى قاتىسۋشىسى بولىپ تابىلادى. مۋزىكانى جانى سۇيەدى. لاريسا نيكولەۆنا فينك, اۋداندىق اۋرۋحانانىڭ باس دارىگەرى. 43 جاستا. اقمولا مەملەكەتتىك مەديتسينا ينستيتۋتىن «دارىگەر-تەراپەۆت» ماماندىعى بويىنشا تامامداعان (1995). ينستيتۋتتى بىتىرگەننەن كەيىن قوستاناي وبلىسىنىڭ فەدوروۆ اۋدانىنداعى مەديتسينالىق مەكەمەلەردە ءارتۇرلى قىزمەتتەر اتقاردى. جالپى, جۇمىس ءوتىلى – 19 جىل. 2012 جىلدىڭ قاراشا ايىنان بەرى «فەدوروۆ ورتالىق اۋداندىق اۋرۋحاناسى» كوممۋنالدىق مەملەكەتتىك مەكەمەسىن باسقارادى. جۇبايى ەۆگەني ۆيكتوروۆيچ فينك وسى اۋرۋحانانىڭ حيرۋرگيا بولىمشەسىنىڭ مەڭگەرۋشىسى بولىپ تابىلادى, «2009 جىلدىڭ ۇزدىك اۋىلدىق دارىگەرى» قۇرمەتتى اتاعى بار. جۇبايى دارىگەرلەر اۋلەتىنىڭ وكىلى بولىپ تابىلادى. ونىڭ اتا-اناسى, اعاسى دارىگەرلەر. وتاعاسى – قازاقستان رەسپۋبليكاسىنىڭ ەڭبەك سىڭىرگەن دارىگەرى. لاريسا نيكولاەۆنانىڭ 2 ۇلى – ارتۋر (2000 ج.ت.), روبەرت (2009 ج.ت.) بار. وتباسىنداعى 2 ۇل دا قازىرگى كۇننەن اۋلەتتىك ءداستۇردى جالعاستىرىپ, دارىگەر بولۋدى ارماندايدى. ءلايلا سۇلتانقىزى, «قازاقستان» رترك» اق «بالاپان» بالالار تەلەارناسىنىڭ ديرەكتورى. 37 جاستا. بەلگىلى قازاقستاندىق تەلەجۇرگىزۋشى ءلايلا سۇلتانقىزى قازىرگى كۇندە «بالاپان» بالالاردىڭ ويىن-ساۋىق تانىمدىق تەلەارناسىن باسقارادى. تەلەكورەرمەندەردىڭ جاس ەرەكشەلىگى 3 جاستان 10 جاسقا دەيىنگى بۇلدىرشىندەردى قامتيدى. HD فورماتىندا تاۋلىگىنە 14 ساعات بويى قازاق تىلىندە حابار جۇرگىزەدى. «مەن 5 جىل بالالار مەن ۇيدە وتىرىپ, بارلىق بالالارعا ارنالعان تەلەارنالاردى قارادىم. مەن ءۇشىن بالالارىمدى قانداي حابارلار قىزىقتىراتىنى باسىمدىق بولىپ تابىلادى. وسى جىلدار ىشىندە مەن شەتەلدەردىڭ بالالارعا ارنالعان تەلەباعدارلامالارىن كەڭىنەن زەرتتەدىم», دەپ وي بولىسەدى ءلايلا سۇلتانقىزى. «بالاپان» تەلەارناسى كونتەنتىنىڭ كىشكەنتاي تەلەكورەرمەندەر ءۇشىن قىزىقتى بولۋى ماقساتىندا «NickJr», «Marvel», «Disney» سياقتى بەلگىلى شەتەل كومپانيالارىنىڭ انيماتسيالىق سەريالدارى مەن فيلمدەرى ساتىپ الىندى. الداعى ۋاقىتتا ورىس ءتىلدى بالالارعا مەملەكەتتىك ءتىلدى وقىتۋ ماقساتىندا اۋديتوريانى ودان ءارى كەڭەيتۋ جوسپارلانىپ وتىر. وسى ماقسات ءۇشىن ينتەللەكتۋالدى, تانىمدىق-وتباسىلىق جانە سپورتتىق بىرقاتار جوبالار ىسكە قوسىلدى. داليدا ماراتوۆنا سيۆاراكشا, «اۆتوماتتاندىرۋ جانە اقپاراتتاندىرۋ جۇيەسى» كافەدراسىنىڭ دوتسەنتى, تەحنيكا عىلىمدارىنىڭ كانديداتى. 29 جاستا. اكادەميك ق.ي.ساتباەۆ اتىنداعى ەكىباستۇز ينجەنەرلىك-تەحنيكالىق ينستيتۋتىندا ءدارىس بەرەدى. ماسكەۋدە جانە فرايبەرگ قالاسىندا (گەرمانيا) وتكەن حالىقارالىق كونفەرەنتسيالاردا ءسوز سويلەگەن ءبىزدىڭ ەلىمىزدىڭ ەكولوگيالىق احۋالىن جاقسارتۋ جونىندەگى جوبالاردى بەلگىلەپ كەلەدى. ءبىلىم جانە عىلىم قىزمەتىمەن بەلسەندى اينالىسادى. «بوگاتىر» كومىر رازرەزىندەگى قورشاعان ورتانى لاستاندىرۋ قاۋپىن ازايتۋ جونىندەگى ادىستەردى وندىرىسكە ەنگىزۋ ءادىسىنىڭ اۆتورى بولىپ تابىلادى. «In Kaz» ەكولوگيا, تۋريزم جانە كاسىپكەرلىك سالاسىنداعى حالىقارالىق يننوۆاتسيالىق فورۋمىنىڭ ديپلومىمەن ماراپاتتالعان. تۇرمىستا, 1 ءسابي تاربيەلەپ وتىر. بيبىگۇل ءسۇيىنشالينا, قازاقستاندىق جانە رەسەيلىك كينواكتريسا. 23 جاستا. كىشكەنتاي كەزىندە اتا-اناسىمەن بىرگە ماسكەۋگە قونىس اۋدارعان. ەڭبەكتەگى العاشقى تاجىريبەسى – 2 جاستا تەلەديدار جارناماسىندا كىشكەنتاي جاپون بالاسىنىڭ ءرولىن ويناعان. 9 جاستا نۋرمۋر «جۇلدىزىم» توبىنىڭ مۋزىكالىق كليپىنە تۇسكەن. 15 جاسىندا كەلىسىمشارت جاساپ سينگاپۋردە جانە تايلاندتا مودەل بولىپ جۇمىس ىستەگەن. 2006 جىلى رەسەيلىك بەلگىلى «گروموۆتار. ءۇمىت ءۇيى» تەلەۆيزيالىق سەريالىندا فايكا ءرولىن ويناعان. وسى رولدەن كەيىن بيبىگۇلدى باسقا جوبالارعا دا شاقىرا باستادى. 2007 جىلى رەجيسسەر ولەگ فەسەنكونىڭ «ساگا و حانتاح» فيلمىندەگى رولدە وينادى. 2009 جىلى قاتارىنان 3 فيلمدە: «ترۋبادۋر» – زارينا باستى رولىندە, «استانا – مەنىڭ ماحابباتىم» – مارجان باستى رولىندە, ءامىر قاراقۇلوۆتىڭ «ۆيرتۋالنايا ليۋبوۆ» فيلمىندە – ەليا باستى رولىندە وينادى. 2013-2014 جىلدارى رەسەيلىك «ۆىجيت پوسلە» 12 سەريالىق تەلەۆيزيالىق فيلمىندە ايجان رولىندە, بارلىعى بيبىگۇل 12 كينو جانە سەريالداردا ويناعان. قازىرگى كەزدە ول رەسەيلىك مەملەكەتتىك اگرارلىق ۋنيۆەرسيتەتىندە سپورتتىق ات باپتاۋ ماماندىعى بويىنشا سىرتتاي ءدارىس الۋدا. سونىمەن بىرگە, بەرلين قالاسىندا نەمىس ءتىلىن ۇيرەنەدى. فوتوسۋرەتكە ءتۇسىرۋ جانە سۋرەت سالۋ ونەرىمەن شۇعىلدانادى.