ءىلتيپات

«ۇستازدىق ەتكەن جالىقپاس ۇيرەتۋدەن بالاعا» دەپ ۇلى اباي ايتقانداي, ورتاڭعى توپتىڭ تاربيەشىسى گۇلباحار كادەنوۆانىڭ ەرەكشە قاسيەتتەرىنىڭ ءبىرى – ىزدەنىس. جاڭالىقتارعا جانى قۇمار ۇستاز تەك وتاندىق پەداگوگيكانىڭ جاڭا جەتىستىكتەرىمەن عانا شەكتەلىپ قويماي, وزگە ەلدەردىڭ دە وزىق تاجىريبەسىن زەردەلەپ, ءوز جۇمىسىنا بەيىمدەپ, شەبەر پايدالانادى. ول ۇنەمى ءوز ءبىلىمىن جەتىلدىرىپ, كوپتەگەن حالىقارالىق, جەرگىلىكتى سەمينارلارعا قاتىسىپ كەلەدى. «مەكتەپكە دەيىنگى تاربيەنىڭ حالىقارالىق باعدارلارى», «مونتەسسوريدى تانۋ پەداگوگيكاسى» سەمينار-ترەنينگتەرى, «جاڭا ستاندارت بويىنشا مەكتەپ الدى بالالارىنا ءبىلىم بەرۋ مەن تاربيە­لەۋ ءۇردىسىن ۇيىمداستىرۋدىڭ جاڭا تاسىلدەرى», «ءوزىن ءوزى تانۋ» ءپانىنىڭ قۇرىلىمدىق, مازمۇن­دىق ەرەكشەلىكتەرى», «بالاپان» باعدارلاماسىن ىسكە اسىرۋدىڭ عىلىمي-ادىستەمەلىك نەگىزدەرى», باسقا ءبىلىم جەتىلدىرۋ سەمينارلارى مەن كۋرستارىنا قاتىسىپ, وقىپ, بىلگەنىن, كوڭىلگە تۇيگەنىن ارىپتەستەرىمەن ءبولىسىپ, جاس بۋىننىڭ بويىنا ءسىڭىرىپ ءجۇر. ۇستاز مەملەكەتتىك ءتىل ساياساتىن جۇزەگە اسىرۋعا دا زور ۇلەس قوسىپ كەلەدى دەسەك, ەش ارتىقتىعى جوق. بالاباقشا بۇلدىرشىندەرىنىڭ باسىم كوپشىلىگى انا تىلىنە شور­قاقتاۋ ەكەنى ەشكىمگە دە قۇپيا ەمەس. تاجىريبەلى ماماننىڭ ءتالى­مى ارقاسىندا ۇل مەن قىز انا ءتىلىمىزدىڭ قاينار بۇلاعىنان سۋسىنداپ, ادەمى, ءارى جاتىق سويلەپ, ءتىپتى ۇلكەندەر كۇندە قولدانا بەرمەيتىن تىڭ سوزدەردى دە ايتىپ كەلەتىنىنە اتا-انالار ءدان ريزامىز. وتاندى ءسۇيۋدى, ۇلكەندى سىيلاۋدى, ماقال-ماتەلدەر, اندەر, ولەڭدەر ۇيرەتىپ, بويلارىنا نەبىر جاقسى ىزگى قاسيەتتەردى ەگۋدە. اباي اتىنداعى الماتى مەم­لەكەتتىك ۋنيۆەرسيتەتىن باستاۋىش ءبىلىم پەداگوگيكاسى مەن ادىستەمەسى, باستاۋىش سىنىپتار مۇعالىمى ماماندىعى بويىنشا تامامداعان گۇلباحار كادەنوۆا شيرەك عاسىر بويىنا وسكەلەڭ ۇرپاقتى ءبىلىم نارىمەن سۋسىنداتىپ, تاربيەلەۋدەن ەش جالىققان ەمەس. ول ءوزىن ءوزى جەتىلدىرىپ وتىرۋ, كاسىبي جانە مادەني دەڭگەيىن ارتتىرۋ توبىنداعى سابيلەردىڭ جەكەلەگەن قاسيەتتەرىن قادىرلەۋ, ولارعا دەگەن ادىلدىك پەن قۇرمەت, ءوز جۇمىسىنا شىعارماشىلىقپەن قاراۋ سياقتى قاسيەتتەرىمەن ەرەك­شەلەنەدى. اتا-انالارمەن بىرلەسە وتىرىپ, تاربيە بولمەسىن ەرەكشە ەستە­تيكالىق تۇرعىدا جابدىق­تاۋدا دا جاقسى شەشىمىن تاپقان. گۇلباحار ساسىقبايقىزى «اتا-بابا ءداستۇرى – ۇرپاققا ونەگە» – ورتاڭعى توپقا بەيىمدەلگەن باعدارلامانى, «بالالاردى ينا­باتتىلىققا تاربيەلەۋ» – ەرەسەكتەر توبىنا باعىتتالعان جوبانى جانە «بالالارعا ەكولوگيالىق تاربيە بەرۋ» تاقىرىبىنداعى ەرەسەكتەر ءۇشىن جوسپاردى ازىرلەپ, وسى جۇمىسىندا ءوزى عانا شەبەر قولدانىپ قويماي, ارىپتەستەرىمەن دە ءبولىسىپ كەلەدى. گۇلباحار كادەنوۆانىڭ ەڭبەگى, كاسىبي جوعارى بىلىكتىلىگى مەن ءبىلىمى باسشىلىق تاراپىنان ەسكەرىلىپ, ءبىرتالاي ماراپاتتارعا دا يە بولدى. مىنە, وسىنداي قاراپايىم قا­تارداعى ۇستازدىڭ اتقارىپ وتىرعان زور ەڭبەگى كولەڭكەدە قالىپ قويماي, كوپكە تانىلىپ, جاستارعا ونەگە بولسا ەكەن دەگەن نيەتپەن, اتا-انالار بالالارىمىزدىڭ سۇيىكتى تاربيەشىسى گۇلباحار كا­دەنوۆا تۋرالى كوپشىلىكپەن وي ءبولىسۋدى ءجون كوردىك. قولعا قالام العانداعى ماقساتىم دا وسىنداي ءوز ىسىنە شىن بەرىلگەن, تابيعاتىنان ۇستاز جاندار كوپ بولسا, وسكەلەڭ ۇرپاق تاربيەسى جالپى حالىقتى الاڭداتپاس ەدى دەگەن اتا-انا ءىلتيپاتىن ورتاعا سالۋ بولاتىن. ساۋلە قاليلامبەكوۆا, اتا-انا. الماتى.