فۋتبول. «استانا» چەمپيوندار ليگاسىنىڭ توپتىق كەزەڭىنە شىقتى (ۆيدەو)

استانا. 27 تامىز. بۇگىن «استانا» ۋەفا چەمپيوندار ليگاسى ىرىكتەۋ ءتۋرنيرىنىڭ پلەي-وفف باسەكەسى شەڭبەرىندە قارىمتا كەزدەسۋىن وتكىزدى. سىرت الاڭدا كيپردىڭ اپوەل كومانداسىمەن بولعان ويىن 1:1 ەسەبىمەن تەڭ اياقتالدى. اپتا بۇرىن وينالعان استاناداعى العاشقى ويىندا ەلوردالىقتار 1:0 ەسەبىمەن جەڭىسكە جەتكەن بولاتىن. ەكى ماتچتىڭ قورىتىندىسى بويىنشا «استانا» چەمپيوندار ليگاسىنىڭ توپتىق كەزەڭىنە جولداما الدى. مۇنداي ناتيجە قازاقستان فۋتبولىنىڭ تاريحىندا تۇڭعىش رەت تىركەلىپ وتىر. بۇل تۋرالى egemen.kz حابارلادى. نيكوسياداعى كەزدەسۋ تولىعىمەن الاڭ يەلەرىنىڭ باسىمدىعىمەن ءوتتى. ءبىرىنشى تايمدا بىرنەشە رەت قاۋىپتى شابۋىلدار ۇيىمداستىرعانىمەن اپوەل ويىنشىلارى ەسەپ اشاتىن مۇمكىندىكتەردى ءمۇلت جىبەردى. ال «استانا» قارىمتا شابۋىلدارعا عانا يەك ارتىپ, نەگىزىنەن قورعانىستا كوپ كۇش جۇمسادى. ەكىنشى تايم تاعى دا اپوەلدىكتەردىڭ باسىمدىعىمەن باستالدى. تولاسسىز شابۋىلداردىڭ ارقاسىندا الاڭ يەلەرى 60-مينۋتتا ەسەپ اشتى. ايىپ سوققىسىن وتە ءساتتى ورىنداعان سەمير شتيليچ تاماشا گولدىڭ اۆتورى اتاندى. گول سالعاننان كەيىن اپوەل-ءدىڭ قارقىنى كۇشەيىپ, شابۋىلداۋدى ۇدەتە ءتۇستى. ويىنداعى وزگەرىستەردى ەسكەرگەن «استانانىڭ» باس جاتتىقتىرۋشىسى ستانيمير ستويلوۆ 68-مينۋتتا العاشقى قادامىن جاساپ, تاڭات نوسەرباەۆتىڭ ورنىنا جۋنيور كابانانگانى شىعاردى. ايقاستىڭ 84-مينۋتىندا ءبىزدىڭ كوماندا دەگەنىنە جەتىپ, تارازى باسىن تەڭەستىردى. كەزەكتى قارىمتا شابۋىلداردىڭ بىرىندە باۋىرجان جولشيەۆ قاپتالدان ايىپ الاڭىنا پاس شىعاردى. ارىپتەسى اسىرعان دوپتى ءساتتى پايدالانعان نەمانيا ماكسيموۆيچ قازاقستان فۋتبولى تاريحىنداعى ەڭ ماڭىزدى گولداردىڭ ءبىرىن سوقتى. سەبەبى, ويىن سوڭىنا دەيىن ەسەپ وزگەرىسسىز قالىپ, ماكسيموۆيچتىڭ دوبى «استانانى» ءتۋرنيردىڭ توپتىق كەزەڭىنە الىپ شىقتى. ماتچتاعى كەيبىر ستاتيستيكالىق كورسەتكىشتەرگە نازار اۋدارايىق. قاقپاعا باعىتتالعان سوققى جونىنەن اپوەل الدا بولدى (10 – 8). ونىڭ ىشىندە تۋرا جاسالعان سوققىلار – 6 – 6. ال دوپقا يەلىك ەتۋ كورسەتكىشى بويىنشا الاڭ يەلەرى ايتارلىقتاي باسىمدىق تانىتتى (66% – 34%). ويىن بارىسىندا «استانانىڭ» قاقپاشىسى نەناد ەريچتىڭ بەلسەندى بولعانىن ەرەكشە اتاپ وتكەن ءجون. سونداي-اق, باۋىرجان جولشيەۆ پەن گەورگي جۋكوۆ تا شەبەرلىكتەرىمەن كوزگە ءتۇستى. ۋەفا چەمپيوندار ليگاسى. ىرىكتەۋ ءتۋرنيرىنىڭ پلەي-وفف باسەكەسى. اپوەل (نيكوسيا, كيپر) – «استانا» (استانا, قازاقستان) 1:1 (0:0), 0:1 26 تامىز. نيكوسيا. گسپ ستاديونى. 23 000 كورەرمەن. تورەشىلەر: مارتين اتكينسون, ستيۆەن چايلد, ستيۋارت بارد ء(بارى دە – انگليا). اپوەل: بوي ۆاتەرمان, ماريۋ سەرجيۋ, ينياكي استيس, ماريوس انتونيادەس (ماتەۋش پەنتكوۆسكي 86), كارلاۋ (جواو گيلەرمە 83), سەمير شتيليچ, كونستانتينوس ماكريديس (كونستانتينوس حارالامبيدەس 55), نۋنۋ مورايش, توماس سەباستيان دە ۆينسەنتي, لۋيس لەال, ۆاندەر. «استانا»: نەناد ەريچ, مارين انيچيچ, برانكو يليچ, ەۆگەني پوستنيكوۆ, دميتري شومكو, روحەر كانياس, فوكسي كەتەۆواما (الەكسەي ششەتكين 90+3), نەمانيا ماكسيموۆيچ, تاڭات نوسەرباەۆ (جۋنيور كابانانگا 68), گەورگي جۋكوۆ (ابزال بەيسەبەكوۆ 89), باۋىرجان جولشيەۆ. گولدار: سەمير شتيليچ 60 – نەمانيا ماكسيموۆيچ 84. ەسكەرتۋلەر: توماس سەباستيان دە ۆينسەنتي 32, كونستانتينوس حارالامبيدەس 61, ۆاندەر 88 – برانكو يليچ 37, دميتري شومكو 63, روحەر كانياس 71, مارين انيچيچ 87. ەلامان قوڭىر. دەرەك: egemen.kz. سۋرەت: footboom.kz.