الەمدە بولىپ جاتقان الۋان ءتۇرلى كەلەڭسىز وقيعالار, ۇرەي تۋىنداتاتىن ءىرىلى-ۇساقتى جاعدايلار, داعدارىستار مەن ءدۇمپۋلەر تەك ۇرەيلەنىپ وتىرۋدى نەمەسە سىرتتاي ەستىپ قانا قويۋدى ەمەس, الەمدىك جاعدايلارعا قارسى قام جاساپ, كەز كەلگەن احۋالعا الدىن الا دايىن بولۋ ءۇشىن ارەكەتتەنۋگە ۇمتىلدىرادى. ارينە, ءبىزدىڭ ەلىمىز ىشكى جانە سىرتقى قاۋىپسىزدىكتى قامتاماسىز ەتىپ, ەكونوميكالىق الەۋەتتى نىعايتۋ باعىتىندا جۇمىستار جۇرگىزۋدە. قازاقستاندىقتارعا ۇسىنىلعان «100 ناقتى قادام» باعدارلاماسى – ءبىزدىڭ الدىمىزدا تۇرعان دامىعان 30 ەلدىڭ قاتارىنا قوسىلۋ ءۇشىن جاسالاتىن ناقتى, نىق جانە قارىشتى العا ۇمتىلۋدىڭ العىشارتى. نەگىزگى سالالار قامتىلعان باعدارلاما قوعامداعى كۇنى بۇگىنگە دەيىن ورىن الىپ كەلگەن ءالسىز تۇستاردى «ەمدەپ», بولاشاققا تىڭ كۇشپەن, ەتەك-جەڭىن جيعان تياناقتىلىقپەن قادام باسۋعا سەپ بولماق. باعدارلامانىڭ ەكىنشى ءبولىگى تۇتاستاي زاڭ ۇستەمدىگىن قامتاماسىز ەتۋگە ارنالعان. بۇل – وتە ورىندى. حالىق ادىلدىك پەن قورعان ىزدەپ زاڭ ورىندارىنا بارادى, ال ولاردىڭ ءالسىز بولۋى – قوعامدى دىمكاس حالگە ءتۇسىرىپ, تۇرعىنداردىڭ رەنىشىن تۋىنداتۋى مۇمكىن. سونىمەن قاتار, تەلى-تەنتەكتەردىڭ كوبەيە تۇسۋىنە جول بەرەتىنى بەلگىلى. سوندىقتان, زاڭ سالاسىن, قۇقىق قورعاۋ ورىندارىن وڭتايلاندىرۋ, جاڭعىرتۋ – وتە وزەكتى, قاجەتتى ماسەلە. سونىڭ ىشىندە, 31-قادام, ياعني ەتيكالىق نورمالاردى بۇزۋعا جول بەرەتىن پوليتسەيلەردىڭ ءىس-ارەكەتتەرىنە شاعىمدانعان ازاماتتاردىڭ ارىزىن قاراۋ جونىندەگى قوعامدىق كەڭەس جۇيەسىن قۇرۋ ارقىلى پوليتسيانىڭ اشىقتىعىن قامتاماسىز ەتۋ ماسەلەسى تۇرعىنداردىڭ ريزاشىلىعىن تۋعىزاتىن تاپسىرما دەپ ويلايمىن. جاسىراتىنى جوق, قىزمەتتىك قۇقىعىن اسىرا پايدالانىپ, ءتىپتى كەي جاعدايلاردا زاڭدى وزدەرى بۇزىپ, ورىنسىز جاعدايلارعا جول بەرەتىن پوليتسەيلەر اتالعان سالانىڭ ابىرويىنا نۇقسان كەلتىرىپ جاتادى. «ءبىر قۇمالاق ءبىر قارىن مايدى شىرىتەدى» دەگەندەي, وسىدان كەلىپ پوليتسەيگە دەگەن سەنىم مەن قۇرمەت اياقاستى بولىپ, جاستاردىڭ قىزىعۋشىلىعىن جوعالتادى. مۇنداي جاعدايلاردا ولاردىڭ ءتيىستى ورىندارعا شاعىمدانۋىنا تۋرا كەلەدى, پوليتسەيدىڭ ءىسىن, ءتارتىبىن ءتيىستى ورىندارمەن بىرگە قوعامدىق كەڭەستەردىڭ تالقىلاۋى, ساراپتاۋى دۇرىس-اق. كەز كەلگەن ارىز-شاعىمدى قوعامدىق كەڭەس مۇشەلەرىنىڭ قاراۋى پوليتسەي جۇمىسىنىڭ اشىقتىعىن قامتاماسىز ەتەدى ءارى تۇرعىنداردىڭ اتالمىش قىزمەتكە, زاڭعا دەگەن سەنىمىن ورنىقتىرا تۇسەدى. سول سەبەپتى, وسىنشالىقتى جاۋاپتى, ماڭىزدى مىندەتتى موينىنا العان قوعامدىق كەڭەستەردىڭ مارتەبەسى مەن وكىلەتتىگى زاڭدى تۇردە بەلگىلەنۋى كەرەك. بۇل كەڭەس قىزمەتىن ارتتىرىپ, ونىڭ جۇمىسىنىڭ فورمالدى تۇردە ەمەس, ناقتى سيپاتقا, سالماقتى ماڭىزعا يە ەكەندىگىن قوعامعا دا, قۇقىق قورعاۋ ورگاندارى مەن كەڭەس مۇشەلەرىنىڭ وزدەرىنە دە ۇعىندىرا تۇسەدى.
مانەت شىراقباي, «جاۋقازىن» بالاباقشاسىنىڭ ديرەكتورى, تۇپقاراعان اۋداندىق ءماسليحاتىنىڭ دەپۋتاتى.
ماڭعىستاۋ وبلىسى.
