قازاقستان مەن رەسەي ىشكى ىستەر مينيسترلىكتەرىنىڭ وتىرىسى ءوتتى

استانا. 24-25 تامىز كۇندەرى رەسەيدىڭ استراحان قالاسىندا قازاقستان رەسپۋبليكاسى مەن رەسەي فەدەراتسياسى ىشكى ىستەر مينيسترلىكتەرىنىڭ العاشقى القا وتىرىسى ءوتتى. بۇل تۋرالى egemen.kz ءتىلشىسى حابارلادى. القا جۇمىسىنا ەكى مەملەكەتتىڭ ىشكى ىستەر مينيسترلەرى, بىرلەسكەن القا وتىرىسىنىڭ مۇشەلەرى, قازاقستان جانە رەسەي ءىىم قىزمەت باستىقتارى, ۇيىمداسقان قىلمىسقا جانە وزگە دە قاۋىپتى قىلمىس تۇرلەرىنە قارسى كۇرەستى ۇيلەستىرۋ بيۋروسىنىڭ ديرەكتورى, قازاقستان رەسپۋبليكاسىنان ۇقكۇب وكىلى, جەكەلەگەن وڭىرلەردىڭ ءىىد باستىقتارى, سونداي-اق, استراحان وبلىسىنىڭ گۋبەرناتورى قاتىستى. وتىرىس بارىسىندا قازاقستان مەن رەسەيدىڭ شەكاراس وڭىرلەرىنىڭ ىنتىماقتاستىعى, ەكى مەملەكەتتىڭ ىشكى ىستەر مينيسترلىكتەرىنىڭ قىلمىستى الدىن الا تەرگەۋ كەزىندە ءوزارا ءىس-قيمىل جاساسۋدى جەتىلدىرۋ ماسەلەلەرى تالقىلاندى. سونىمەن قاتار, بىرلەسكەن القا وتىرىسىنىڭ 2016 جىلعا ارنالعان جوسپارى بەكىتىلدى. دەلەگاتسيا باسشىلارى قىلمىسقا قارسى كۇرەستە بارلىق باعىتتار بويىنشا ىشكى ىستەر ورگاندارىنىڭ ءوزارا ءىس-قيمىلىنىڭ ماڭىزدىلىعى مەن قاجەتتىلىگىن اتاپ ءوتتى. قارالعان ماسەلەلەر بويىنشا قازاقستاننىڭ جانە رەسەيدىڭ ىشكى ىستەر مينيسترلەرىنىڭ بۇيرىقتارىمەن بەكىتىلگەن ءتيىستى شەشىمدەر قابىلداندى. بىرلەسكەن القا وتىرىسىنىڭ كەلەسى وتىرىسى قازاقستاندا وتەتىن بولادى. داستان كەنجالين. دەرەك, سۋرەت: قازاقستان رەسپۋبليكاسى ىشكى ىستەر مينيسترلىگى.