قازاقستان سىرت الاڭدا لاتۆيانى جەڭىپ, تۇركياعا جولداما الىپ بەردى

بۇرناعى كۇنى فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى شەڭبەرىندە قازاقستان ريگادا لاتۆيامەن كەزدەستى. تارتىستى ويىن ناتيجەسىندە ۇلتتىق قۇرامامىز 1:0 ەسەبىمەن جەڭىسكە جەتتى. ماتچ الاڭ يەلەرىنىڭ شابۋىلىمەن باستالدى. 12-مينۋتتا لاتۆيا ساپىنان ارتۋر زيۋزين ويىنداعى العاشقى سوققىنى جاسادى. الايدا, دوپ قاقپادان قيىس كەتتى. ارتىنشا سامات سماقوۆ باستاعان ءبىزدىڭ جىگىتتەر قارىمتا شابۋىل ۇيىمداستىرىپ, گافۋرجان سۇيىمباەۆ قارسىلاستار قاقپاسىن نىساناعا الىپ كوردى. بۇل جولى لاتىشتاردىڭ قاقپاشىسى شەبەرلىگىمەن كوزگە ءتۇستى. الما-كە­زەك شاۋىلمەن وربىگەن ءبىرىنشى تايمدا ەسەپ اشىلعان جوق. ەكىنشى تايمنىڭ العاشقى مينۋتتارىندا تاعى دا لاتۆيا ويىنشىلارى بەلسەندى قيمىلدادى. الايدا, ۋاقىت وتە يۋري كراسنوجاننىڭ شاكىرتتەرى شيراقتىق تانىتىپ, قارقىندارىن كۇشەيتتى. كوماندامىزدىڭ كەزەكتى شابۋىلدارىنىڭ بىرىندە يسلامبەك قۋات ءۇش قورعاۋشىنىڭ ورتاسىنان سىتىلىپ شىعىپ, ەسەپ اشتى. بۇل كەزدەسۋدىڭ 65-مينۋتى ەدى. قالعان ۋاقىتتا تابلوداعى ناتيجە وزگەرمەي, قازاقستان وسى ىرىكتەۋ تۋرنيرىندەگى العاشقى جەڭىسىنە قول جەتكىزدى. وسىمەن كەلەسى جىلى فرانتسيادا وتەتىن قۇرلىقتىق دوپ دوداسىنا ىرىكتەۋ سايىسى مارەسىنە جەتتى. «ا» توبىندا سىنعا تۇسكەن قازاقستان 5 ۇپايمەن ءتۋرنيردى 5-ورىندا اياقتادى. ءبىزدىڭ توپتا ءبىرىنشى جانە ەكىنشى ورىن العان چەحيا مەن يسلانديا ەۋروپا چەمپيوناتىنا تىكەلەي جولداما الدى. سونداي-اق, ۇزدىك ۇشتىكتەن كورىنگەن تۇركيا قۇراماسى دا فرانتسياعا باراتىن بولدى. ول بارلىق توپتاعى ءۇشىنشى ورىن العان كوماندالار اراسىندا ۇزدىك ناتيجە كورسەتكەنى ءۇشىن وسىنداي جەتىستىككە جەتىپ وتىر. ۋەفا بەكىتكەن ەرەجە بويىنشا مۇنداي كوماندانى انىقتاۋ كەزىندە ءوز توبىندا سوڭعى ورىن العان قۇرامامەن وتكىزگەن ەكى ويىننىڭ ۇپايى ەسەپكە الىنبايدى. وسى رەتتە تۇرىكتەردىڭ جەڭىسىنە لاتۆيا – قازاقستان ماتچىنىڭ ءناتي­جەسى تىكەلەي اسەر ەتكەنىن اتاپ وتكەن ءجون. سەبەبى, ءبىزدىڭ كوماندا لاتىشتاردى جەڭۋ ارقىلى توپتا بەسىنشى ساتىعا كوتەرىلىپ, سوڭعى ورىنعا لات­ۆيا جايعاستى. سوعان وراي تۇركيا تەك ەكى ۇپاي جوعالتتى. ءويت­كەنى, ءتۇ­رىك اعايىندارىمىز ەكى رەتتە دە لات­ۆيامەن تەڭ ويناعان بولاتىن. ال ەگەر سوڭعى ورىندى قازاقستان العان جاعدايدا انادولى ەلى التى ۇپايدان ايىرىلاتىن ەدى. ەلامان قوڭىر, «ەگەمەن قازاقستان».