استانا. 2 شىلدە. مەملەكەت باسشىسى «نۇرلى جول» جانە يندۋستريالىق-يننوۆاتسيالىق دامۋ مەملەكەتتىك باعدارلامالارىن جۇزەگە اسىرۋعا ارنالعان يندۋستريالاندىرۋ كۇنىنە قاتىستى. بۇل تۋرالى akorda.kz حابارلادى.
ءىس-شارا الدىندا مەملەكەت باسشىسى جاڭا ايشىقتى جوبالارمەن جانە وتاندىق جەڭىل ونەركاسىپ ونىمدەرىمەن تانىستى, سونداي-اق, «قازاقستاندا جاسالعان» اتتى كورمەنى ارالاپ كوردى.
جالپىۇلتتىق تەلەكوپىر اياسىندا يندۋستريالاندىرۋ كارتاسى مەن «نۇرلى جول» باعدارلاماسىنىڭ بىرقاتار جوبالارى ىسكە قوسىلدى. سونىمەن قاتار, جۇمىس ىستەپ تۇرعان وندىرىستەردىڭ قىزمەتى تانىستىرىلدى.
جينالعاندارعا ارناعان سوزىندە قازاقستان پرەزيدەنتى ءبىرىنشى ونەركاسىپتىك بەسجىلدىق كەزىندە شامامەن 33 ميلليارد دوللار شەتەلدىك ينۆەستيتسيا تارتىلىپ, ونىڭ جارتىسى ەلدى يندۋستريالىق-يننوۆاتسيالىق دامىتۋ باعدارلاماسىنا تيەسىلى بولعانىنا نازار اۋداردى.
مەملەكەت باسشىسى يندۋستريالاندىرۋدىڭ ەكىنشى بەسجىلدىعى بۇرىنعىدان دا ناقتىراق كورىنىسكە يە ەكەنىن ايتتى.
«باسىمدىعى بار التى سالا انىقتالدى, ولار – مۇناي وڭدەۋ جانە مەتاللۋرگيا كەشەنى, تاماق جانە حيميا ونەركاسىبى, ونەركاسىپتىك جابدىقتار جانە قۇرىلىس ماتەريالدارى ءوندىرىسى. ءبارىنىڭ نەگىزىندە كلاستەرلىك تاجىريبە جاتىر. جاڭا باعدارلامادا ءبىز ءبىرىنشى بەسجىلدىقتىڭ ساباقتارىن بارىنشا ەسكەرىپ, جيناقتالعان تاجىريبەنى قولدانۋعا تىرىستىق», – دەدى نۇرسۇلتان نازارباەۆ.
قازاقستان پرەزيدەنتى بۇگىندە وڭدەۋ ونەركاسىبىندە شەتەلدىك ينۆەستورلاردىڭ قاتىسۋىمەن 22 جاڭا جوبا جۇزەگە اسىرۋعا دايىندالىپ جاتقانىن اتاپ ءوتتى.
«جۇيە قۇراۋشى بىرقاتار ءىرى جوبالار بويىنشا جۇمىس جۇرگىزىلۋدە. ماسەلەن, «رەنو-نيسسان» اليانسىمەن بىرلەسىپ, تولىق تسيكلدى اۆتوزاۋىتتىڭ جانە اۆتوقۇرامداۋىشتار شىعاراتىن تەحنوپاركتىڭ قۇرىلىسى ىسكە قوسىلادى. يتاليانىڭ «تەناريس» كومپانياسى پرەميۋم ساناتتى قۇبىر وندىرەتىن زاۋىتقا ينۆەستيتسيا سالادى. اعىلشىندىق «داندو دريلينگپەن» بىرلەسىپ, بۇرعىلاۋشى قوندىرعىلار وندىرەتىن زاۋىت ىسكە قوسىلادى. رەسەيلىك «ەۆروحيم» مينەرالدىق تىڭايتقىشتار ءوندىرۋدى جوسپارلاپ وتىر. كانادانىڭ «كۋدۋ ينداستريز» كومپانياسى مۇناي-گاز سالاسىنا ارنالعان ءۆينتتى-سورعىلار ءوندىرىسىن جولعا قويۋعا نيەتتى. «جىبەك جولى» باعدارلاماسى بويىنشا ىنتىماقتاستىق اياسىندا قىتايلىق سەرىكتەستەرمەن جوبالاردىڭ ۇلكەن ءبىر توبى جۇزەگە اسىرىلۋدا», – دەدى مەملەكەت باسشىسى.
نۇرسۇلتان نازارباەۆ يندۋستريالاندىرۋدى ستراتەگيا-2050-ءدىڭ ەلدى الەمدەگى بارىنشا دامىعان 30 مەملەكەت قاتارىنا قوسۋ جونىندەگى باستى ماقساتتارىنا جەتۋگە باعىتتالعان بۇكىل مەملەكەتتىك ساياساتىنىڭ وزەگى رەتىندە اتادى.
قازاقستان پرەزيدەنتى جۇمىس ىستەپ تۇرعان كاسىپورىنداردىڭ تيىمدىلىگى مەن ونىمدىلىگىن كوتەرۋدىڭ قاجەتتىلىگىن اتاپ ايتتى.
«بۇل ءۇشىن ۇقىپتى ءوندىرىس جۇيەلەرىن, روبوتتاندىرۋ جانە اۆتوماتتاندىرۋ ەلەمەنتتەرىن ەنگىزۋ, تەحنولوگيالىق جەلىلەردى جاڭعىرتۋ تالاپ ەتىلەدى. اسىرەسە بۇل ءبىزدىڭ مەتاللۋرگيا, مۇناي وڭدەۋ, حيميا سياقتى ءداستۇرلى سالالارىمىزعا قاتىستى,, – دەدى نۇرسۇلتان نازارباەۆ.
مەملەكەت باسشىسى قازاقستان ءۇشىن تۇبەگەيلى جاڭا – مۇناي-گاز حيمياسى, اۆتوموبيل قۇراستىرۋ جانە تاعى باسقا ونەركاسىپ سالالارىن قۇرۋ مەن دامىتۋدىڭ ماڭىزدىلىعىنا توقتالدى.
«مۇنداعى شەشىمنىڭ ءمانى – جاھاندىق ويىنشىلارمەن بىرگە بىرنەشە ءىرى ستراتەگيالىق جوبالاردى جۇزەگە اسىرۋدا. ۇكىمەتكە, ۇلتتىق حولدينگتەرگە وسىنداي جوبالاردىڭ تىزبەسىن انىقتاپ, ولاردى جۇزەگە اسىرۋعا جاۋاپتىلاردى بەكىتۋدى تاپسىرامىن. زاماناۋي تەحنولوگيالارعا, كومپەتەنتسيالار مەن جاھاندىق وتكىزۋ نارىقتارىنا قول جەتكىزۋ ءۇشىن ون ترانسۇلتتىق كورپوراتسيا مەن «زاكىرلى» ينۆەستورلار تارتۋدى قامتاماسىز ەتۋ كەرەك», – دەدى قازاقستان پرەزيدەنتى.
نۇرسۇلتان نازارباەۆ تاماق ونەركاسىبى, قۇرىلىس ماتەريالدارىنىڭ ءوندىرىسى, ماشينا جاساۋ سياقتى سەكتورلاردا وتاندىق بيزنەستى دامىتىپ, باسەكەگە قابىلەتتى ءونىم جاساۋ جانە سىرتقى نارىقتارعا شىعۋ ءۇشىن زور الەۋەت بار ەكەنىنە نازار اۋداردى. وسىعان بايلانىستى «بايتەرەك» حولدينگىنە «اتامەكەن» ۇلتتىق كاسىپكەرلەر پالاتاسىمەن بىرلەسىپ «ۇلتتىق چەمپيوندار» جوباسىن جۇزەگە اسىرۋ تاپسىرىلدى. سونداي-اق, مەملەكەت باسشىسى تىكەلەي ەلىمىزبەن بايلانىستىرىلاتىن جانە ونىڭ حالىقارالىق ارەناداعى يميدجىنە وڭ ىقپال ەتەتىن ءوز برەندىمىزدى ازىرلەۋدىڭ ماڭىزدىلىعىن ايتتى.
قازاقستان پرەزيدەنتى ىقپالداستىق اياسىندا, اسىرەسە ەۋرازيالىق ەكونوميكالىق وداق شەڭبەرىندە رەسەيدىڭ, ورتالىق ازيانىڭ, قىتايدىڭ, ءۇندىستان مەن يراننىڭ شەكارا ماڭىنداعى نارىقتارىنا شىعۋ ءۇشىن مەيلىنشە اۋقىمدى جۇمىستاردى باستاعان ءجون ەكەنىن اتاپ ءوتتى.
بۇدان بولەك, نۇرسۇلتان نازارباەۆ دسۇ-عا مۇشە بولۋ ەكونوميكامىز ءۇشىن جاڭا كوكجيەكتەرگە جول اشاتىنىنا نازار اۋداردى.
«ءبىر جاعىنان, بۇل ءبىزدىڭ كاسىپورىنداردىڭ شەتەلدىك الىپ نارىقتارعا شىعۋىن, ەكىنشى جاعىنان, تۇتىنۋشىلاردىڭ كوپتەگەن تاۋارلار مەن قىزمەتتەرگە قول جەتكىزۋىن قامتاماسىز ەتەدى. جاڭا وندىرىستەر مەن جۇمىس ورىندارىن اشۋعا مۇمكىندىك الامىز. ءبىزدىڭ مىندەتىمىز – قازاقستان كومپانيالارىنىڭ جاڭا جاعدايعا تەزىرەك بەيىمدەلىپ, دسۇ-عا كىرۋدەن مەيلىنشە پايدا تابۋعا كومەكتەسۋ», – دەدى قازاقستان پرەزيدەنتى.
مەملەكەت باسشىسى بولاشاق ۇرپاق يگىلىگى ءۇشىن ۇزاق مەرزىمگە جالعاساتىن ناتيجەلەرگە باعىتتالعان «نۇرلى جول» جاڭا ەكونوميكالىق ساياساتىنىڭ ايرىقشا ماڭىزدىلىعىن اتاپ ءوتتى.
«ءبىزدى ەل ىشىندە 7 مىڭ شاقىرىم اۆتوجولدار سالۋ جانە جوندەۋ جۇمىستارى كۇتىپ تۇر. الداعى 3 جىلدا باعدارلاما ماقساتىنا 20 ميلليارد دوللاردان استام قاراجات جۇمسالادى, ونىڭ ۇشتەن بىرىنەن استامىن حالىقارالىق قارجى ينستيتۋتتارى بولەدى. ءتورت جىل ىشىندە باعدارلاما ءىجو ءوسىمىن 16 پايىزعا ەسەلەيدى دەپ كۇتىلۋدە. قورىتىندىسىندا 2019 جىلعا قاراي ءبىز ءىرى قالالار اراسىنداعى جولعا كەتەتىن ۋاقىتتى ءۇش ەسە قىسقارتىپ, ەلدىڭ ءبىرتۇتاس ەنەرگەتيكالىق جۇيەسىن قالىپتاستىرۋدى جانە ەڭ باستىسى, بۇكىل ەكونوميكامىزدى ورتاق نارىققا بىرىكتىرۋدى كوزدەپ وتىرمىز, – دەدى نۇرسۇلتان نازارباەۆ.
قازاقستان پرەزيدەنتى «نۇرلى جول» باعدارلاماسى ونەركاسىپتى جانە قىزمەت كورسەتۋ سالاسىن جانداندىرۋعا دا مۇمكىندىك بەرەتىنىن ايتتى.
«بيزنەسىمىزگە باعدارلاما جوبالارىنىڭ جۇزەگە اسىرىلۋىنا تولىققاندى اتسالىسۋعا مۇمكىندىك بەرۋ ءۇشىن جەرگىلىكتى قۇرامدى كۇشەيتۋ قاجەت. ول ءۇشىن كەرەكتى ازىق-ت ۇلىك, جاتىن ورىن, تەحنيكالىق سەرۆيس سياقتى زاماناۋي قىزمەتتەردى دامىتۋ ءوز كەزەگىندە ەلىمىز ارقىلى وتەتىن باعدارلاردىڭ تارتىمدىلىعى مەن جايلىلىعىن ارتتىرادى. بۇدان بولەك, ءبىز قازاقستاندىقتاردىڭ بىرنەشە بۋىنىنا قىزمەت ەتەتىن جولدار سالاتىن بولامىز. بۇل ءۇشىن ولاردىڭ تەك ساپالى سالىنۋىنا عانا ەمەس, ۇدايى قولداۋ جانە كۇتىم كورسەتىلىپ وتىرۋىنا كوڭىل ءبولۋ كەرەك. ۇكىمەت بۇكىل ەلىمىزدىڭ جول-كولىك ينفراقۇرىلىمىنىڭ جاي-كۇيى مەن دامۋىنا جاۋاپ بەرەتىن بىرىڭعاي وپەراتور قالىپتاستىرۋدى ويلاستىرۋعا ءتيىس», – دەدى مەملەكەت باسشىسى.
نۇرسۇلتان نازارباەۆ «بەس ينستيتۋتسيونالدىق رەفورمانى جۇزەگە اسىرۋ جونىندەگى «100 ناقتى قادام» – ۇلت جوسپارى اياسىندا قۇرىلىس, جەر قويناۋىن پايدالانۋ, ەنەرگەتيكا جانە تاسىمالداۋ سالالارىنداعى رەتتەۋ ءىسى وزىق حالىقارالىق تاجىريبەلەرگە سايكەستەندىرىلەتىنىن اتاپ ءوتتى.
سوڭىندا مەملەكەت باسشىسى جۇرگىزىلىپ جاتقان بارلىق رەفورمالار ەلىمىزدى دامىتا ءتۇسۋ ءۇشىن ساپالىق تۇرعىدان جاڭا جاعدايلار جاساۋعا باعىتتالىپ وتىرعانىن ايتتى.
«وتاندىق ەكونوميكامىزدا جەكەمەنشىك سەكتوردىڭ ءرولىن ارتتىرۋ جولىنداعى مەملەكەتتىڭ جۇيەلى قادامىنىڭ ءبىرى وسى. بۇل ەل ازاماتتارىنىڭ تۇرمىسىن جاقسارتۋعا دا سەپتىگىن تيگىزەتىن بولادى. بۇگىن ءبىز ايتارلىقتاي ناتيجەلەر بار ەكەنىنە كوز جەتكىزدىك. ەندىگى مىندەتىمىز – ەل الدىنا قويىلعان ماڭىزدى مىندەتتەردى ىسكە اسىرۋ», – دەدى نۇرسۇلتان نازارباەۆ.
شارا بارىسىندا كۇن تارتىبىندەگى ماسەلەلەر بويىنشا ينۆەستيتسيالار جانە دامۋ ءمينيسترى ءا.يسەكەشەۆ, ۇلتتىق ەكونوميكا ءمينيسترى ە.دوساەۆ, پاۆلودار وبلىسىنىڭ اكىمى ق.بوزىمباەۆ, الماتى وبلىسىنىڭ اكىمى ا.باتالوۆ بايانداما جاسادى.
ەلامان قوڭىر.
دەرەك, سۋرەت: akorda.kz.
