استانا. 2 شىلدە. «ەگەمەن قازاقستان» رەسپۋبليكالىق گازەتى اكتسيونەرلىك قوعامى دايىنداپ, شىعارىپ وتىرعان «پرەزيدەنت» اتتى جيناق گازەتتىڭ 2010-2015 جىلدار ارالىعىنداعى نومىرلەرىندە جارىق كورگەن ەلباسى نۇرسۇلتان نازارباەۆ تۋرالى الۋان ءتۇرلى ماقالالاردى وقىرمان نازارىنا ۇسىنىپ وتىر. وسىعان وراي گازەت عيماراتىندا «پرەزيدەنت» جيناعىنىڭ تۇساۋكەسەر ءراسىمى وتەدى. بۇل تۋرالى egemen.kz حابارلادى.
«پرەزيدەنت» اتتى جيناق «ەگەمەن قازاقستان» رەسپۋبليكالىق گازەتى اكتسيونەرلىك قوعامنىڭ بۇعان دەيىنگى جىلدارى شىعارعان «ەلباسى», «تاۋەلسىزدىك», «سالتانات», «استانا» جانە «دىنتۇتقا» جيناقتارىمەن ءبىر سەريانى قۇرايدى. كىتاپ سونىمەن قاتار پرەزيدەنتتىڭ العاشقى 20 جىلداعى مەملەكەت باسقارۋ كەزەڭىن قامتيتىن «ەلباسى» توپتاماسىنىڭ مازمۇن جاعىنان جالعاسى ىسپەتتەس.
جيناقتا قامتىلعان ءاربىر جىلدىڭ ماتەريالدارى جەكە تاراۋعا بىرىكتىرىلگەن. ونىڭ باسى ەلباسىنىڭ بالالىق جانە جاستىق شاقتارى تۋرالى ءسوز ەتىلەتىن ماقالا-سۇحباتتان باستالادى. بۇدان ءارى بولاشاق مەملەكەت باسشىسىنىڭ ۇشقان ۇياسىنان العان تاربيەسى مەن ءوسۋ جولدارى, ۇلكەن ومىرگە قاراي باسقان العاشقى قادامدارى, وسىنىڭ جەلىسىندە دنەپرودزەرجينسكىدەگى وقىعان جىلدارى, ەلباسىنىڭ تۋعان جەرگە دەگەن كوزقاراسى مەن ول جونىندەگى تەبىرەنىسى ءسوز ەتىلەدى. كەلەسى ماقالالاردا وسىنداي ءومىر وتكەلدەرىنەن وتكەن ەلباسىنىڭ قازاق ءتىلىنىڭ مارتەبەسىن كوتەرۋدەگى ەرەن ەڭبەگى, ەسىلدىڭ بويىنا ەل بايتاعىن ورنالاستىرۋ جولىنداعى ۇلكەن كورەگەندىگى, قازاقستاننىڭ دامۋ جولىن تاڭداۋداعى كەمەڭگەرلىگى, سىرتقى الەممەن قارىم-قاتىناستاعى سىندارلى ساياساتى, وسىنىڭ نەگىزىندە جاھان جۇرتى ساناساتىن تەگەۋرىندى تۇلعاعا اينالۋى جايلى تولىمدى تولعام ايتىلىپ, ساليقالى سىر شەرتىلەدى. كىتاپتا كوپتەگەن اۆتورلاردىڭ پرەزيدەنتتىڭ ەل باسقارۋ ىسىندەگى كرەدوسىنا, باعىتى مەن باعدارىنا عىلىمي, فيلوسوفيالىق جانە الەۋمەتتىك تۇرعىدان باعا بەرۋگە قۇرىلعان تالدامالى ماتەريالدارى دا كوپتەپ ورىن العان. مۇندا سونداي-اق, نۇرسۇلتان ءابىش ۇلىنىڭ باۋىرلارىمەن, بىرگە وسكەن دوستارىمەن جۇرگىزىلگەن سۇحباتتار دا قامتىلعان. وسىندا ءسوز بولاتىن جايتتاردى ەلباسى تۋرالى تۇسىرىلگەن فيلمدەر بويىنشا جازىلعان شولۋ-رەتسەنزيا تياناقتاپ بەرەدى.
كىتاپ نەگىزىنەن ەلباسى مەن ونىڭ ىرگەلى ىستەرى تۋرالى مەملەكەت جانە قوعام قايراتكەرلەرى, عالىمدار مەن جازۋشىلار, ونەر جانە ەڭبەك ادامدارى جازعان ماقالالاردان قۇرالعان. بۇلاردان بولەك, اقىنداردىڭ ودا, تولعاۋ جانە تىلەك مازمۇنىندا تولعاعان ءبىر توپ ولەڭدەرىنە دە كەزەك بەرىلگەن. جيناقتا سونداي-اق, پرەزيدەنتتىڭ وسى بەس جىل ىشىندەگى ءارتۇرلى كەزدەسۋلەردەن تۇسىرىلگەن سۋرەتتەرى دە جەكە توپتاما تۇرىندە كورىنەدى. جالپى, كىتاپتىڭ كولەمى 804 بەتتى قۇرايدى.
اتالمىش جيناقتىڭ تۇساۋكەسەر ءراسىمى 3 شىلدە كۇنى, ساعات 16:00-دە «ەگەمەن قازاقستان» گازەتىنىڭ رەداكتسياسىندا وتەدى.
تالعات رايىمبەك.
دەرەك, سۋرەت: egemen.kz.
