استانا. 2 شىلدە. قىزىلوردا وڭىرىندە اۋا تەمپەراتۋراسى (كولەڭكە جەردە) +42 گرادۋستان جوعارى بولىپ تۇر. سونداي-اق, «قازگيدرومەت» ماماندارى 29 ماۋسىم مەن 2 شىلدە ارالىعىندا تسيكلون وتەتىنىن ايتۋدا. بۇل تۋرالى egemen.kz حابارلادى.
«قازگيدرومەت» رمك قىزمەتىنىڭ دەرەگىنە سۇيەنسەك, قىزىلوردا ايماعىندا كۇننىڭ تىكەلەي جەرگە ءتۇسۋى 68-75 گرادۋس نولدەن جوعارى. ال كولەڭكە جەردەگى اۋا تەمپەراتۋراسى +42 گرادۋستان جوعارى. سونداي-اق, ماماندار بيىلعى جازدىڭ ەرەكشە ىستىق بولاتىنىن العا تارتىپ وتىر. وسىعان وراي سينوپتيكتەر تۇرعىنداردى اپتاپ ىستىقتا دالاعا شىقپاي, رەتى كەلسە سالقىن جەردە دەمالعاندى دۇرىس ساناپ, ەسكەرتۋ جاساۋدا.
دەگەنمەن, تاياۋ كۇندەرى ەلىمىزدىڭ بىرقاتار ايماقتارىندا داۋىل تۇرىپ, بۇرشاق ۇرادى. سينوپتيكتەر 4 شىلدەگە دەيىنگى اۋا رايى بولجامىن جاريالادى.
«قازگيدرومەتتىڭ» مالىمەتىنشە, جوعارى ءباريلى جىرامەن بايلانىستى سۋىق اتموسفەرالىق فرونتتار قازاقستاننىڭ باتىسىنان شىعىس باعىتىنا اۋىسادى. وسى فرونتتارعا بايلانىستى نايزاعايلى وتكىنشى جاڭبىر, بۇرشاق جانە داۋىلدى جەل بولادى.
«جاقىن اراداعى ءۇش تاۋلىكتە فرونتتىڭ شىعىسقا جىلجۋ شاماسىنا قاراي, بارلىق مەتەورولوگيالىق قۇبىلىستار رەسپۋبليكانىڭ باتىس, سولتۇستىك, ورتالىق جانە شىعىس وبلىستارىندا بولادى دەپ كۇتىلىپ وتىر. سونىمەن قاتار, وسى فرونتپەن قازاقستان اۋماعىنىڭ كوپ بولىگىندە اۋا تەمپەراتۋراسى تومەندەيدى», – دەدى ماماندار.
ەسكە سالا كەتەيىك, بۇعان دەيىن سينوپتيكتەر قازاقستاندا شىلدە ايىنىڭ اۋا رايى قانداي بولاتىنىن جاريالاعان ەدى. ولاردىڭ ايتۋلارىنشا, رەسپۋبليكادا شىلدەنىڭ ءبىرىنشى ونكۇندىگىندە اۋا رايى سالقىن, جەلدى ءارى جاڭبىرلى بولادى دەپ كۇتىلىپ وتىر. ال ەڭ سالقىن كۇندەر الداعى دەمالىسقا سايكەس كەلەدى.
تالعات رايىمبەك.
دەرەك: egemen.kz.
سۋرەت: today.kz.
