فۋتزالدان ۋەفا كۋبوگىنىڭ جەرەبەسى تارتىلدى

استانا. 14 قازان. بۇگىن شۆەيتساريانىڭ نون قالاسىندا فۋتزالدان ۋەفا كۋبوگى ەليتالىق راۋندىنىڭ جەرەبەسى تارتىلدى. وسى سىندا ەل نامىسىن ەكى بىردەي كوماندامىز – الماتىنىڭ «قايراتى» مەن قاراعاندىنىڭ «تۇلپارى» قورعايدى. بۇل تۋرالى egemen.kz حابارلادى. جەرەبە قورىتىندىسى بويىنشا «قايرات» «س» توبىنا ءتۇستى. بۇل توپتا ول «يۋگرا» (رەسەي), «حرۋديم» (چەحيا) جانە «دور» (ۆەنگريا) كوماندالارىمەن وينايدى. اتالعان تورتتىك 10-15 قاراشادا ۆەنگريادا كەلەسى اينالىمنىڭ جولداماسىن ساراپقا سالادى. ال «ۆ» توبىنا تۇسكەن «تۇلپار» «پەسكارا» (يتاليا), «حاللە-گوويك» (بەلگيا) جانە «جەلەزارەتس» (ماكەدونيا) كلۋبتارىمەن شەبەرلىك بايقاسادى. بۇل كوماندالاردىڭ ويىندارى 10-15 قاراشادا يتاليادا وتەدى. بارلىق توپتىڭ قۇرامى تومەندەگىدەي (توپتىق كەزەڭدەگى الاڭ يەلەرى ەرەكشە بەلگىلەنگەن): «ا» توبى: «ينتەر» (يسپانيا), «ليدسەلماش» (بەلارۋس), «كرەملەن-بيسەتر» (فرانتسيا), «دوبوۆەتس» (سلوۆەنيا). «B» توبى: «تۇلپار» (قازاقستان), «پەسكارا» (يتاليا), «حاللە-گوويك» (بەلگيا), «جەلەزارەتس» (ماكەدونيا). «س» توبى: «قايرات» (قازاقستان), «يۋگرا» (رەسەي), «حرۋديم» (چەحيا), «دور» (ۆەنگريا). «D» توبى: «ەكونوماتس» (سەربيا), «سلوۆ-ماتيك» (سلوۆاكيا), «بەنفيكا» (پورتۋگاليا), «لوكوموتيۆ» (ۋكراينا). ءار توپتىڭ جەڭىمپازدارى ءتۋرنيردىڭ جارتىلاي فينالىنا جولداما الادى. بۇل سىننىڭ ويىندارى وسى كەزەڭگە شىققان ءتورت كوماندانىڭ ءبىرىنىڭ الاڭىندا ءساۋىر ايىندا وينالادى. ايتا كەتەيىك, «قايرات» فۋتزالدان ۋەفا كۋبوگىنىڭ قازىرگى يەگەرى. ەلامان قوڭىر. دەرەك: egemen.kz. سۋرەت: kairat-futsal.kz.