«بارىس» بيىلعى ماۋسىمداعى 15-جەڭىلىسىنە ۇشىرادى

استانا. 14 قازان. بۇگىن استانانىڭ «بارىسى» قۇرلىقتىق حوككەي ليگاسى شەڭبەرىندە ءوز ايدىنىندا حاباروۆسكىنىڭ «امۋرىن» قابىلداپ, 2:3 ەسەبىمەن جەڭىلىپ قالدى. بۇل تۋرالى egemen.kz حابارلادى. ويىن تەڭ جاعدايدا ءوربىدى. ءوز مۇمكىندىكتەرىن ءتيىمدى پايدالانعان قوناقتار ولەگ ءليدىڭ كومەگىمەن 5-مينۋتتا ەسەپ اشتى. ارادا بار بولعانى 3 مينۋت وتكەندە, «بارىس» ساپىنان نايدجەل دوۋس تارازى باسىن تەڭەستىردى. دەگەنمەن, ۇزىلىسكە دەيىن «امۋر» حوككەيشىلەرى تاعى ءبىر شايبا سوعىپ ۇلگەردى. بۇل جولى ۆياچەسلاۆ ۋشەنين مەرگەندىگىمەن كوزگە ءتۇستى. ەكىنشى كەزەڭدە ايدىن يەلەرى شيراق قيمىلدادى. ناتيجەسىندە 35-مينۋتتا كونستانتين پۋشكارەۆ «بارىستىڭ» ەكىنشى شايباسىن سوقتى. دەگەنمەن, رەسەيلىكتەر 53-مينۋتتا ءۇشىنشى رەت ءبىزدىڭ قاقپانى ءدال كوزدەپ, ماڭىزدى ءۇش ۇپايعا قول جەتكىزدى. جەڭىس شايباسىنىڭ اۆتورى – ارتەم زۋب. وسىمەن استانالىقتار بيىلعى ماۋسىمداعى 15-جەڭىلىسىنە ۇشىرادى. بۇگىندە 22 ويىننان 25 ۇپاي جيعان «بارىس» شىعىس كونفەرەنتسياسىندا 12-ورىندا كەلەدى. ەۆگەني كورەشكوۆتىڭ شاكىرتتەرى كەلەسى كەزدەسۋىن 17 قازاندا پودولسكىدە جەرگىلىكتى «ۆيتيازبەن» وتكىزەدى. ەلامان قوڭىر. دەرەك: egemen.kz. سۋرەت: hcbarys.kz.