قايىرىمدىلىق كەشى سىرقات سابيگە ءۇمىت وتىن سىيلادى

ءاليحان قازىر 5 جاستا. 4 ايلىعىندا تال­ما اۋرۋىنا ۇشىراپ, مۇگەدەك بولىپ قال­عان. ال, 3 جاسىندا سويلەۋدەن قال­دى. اتا-اناسى تۋعان-تۋىستارىنىڭ, ەڭبەكتەس ءارىپ­تەستەرىنىڭ, جۇرتشىلىقتىڭ قار­جىلىق قولداۋى ارقاسىندا ونى بىلتىر گەرما­نياداعى جەتەكشى كلينيكالاردىڭ بىرىندە ەمدەتىپتى. – شەتەلدە ەمدەتكەلى ۇلىمىز تاۋىرلەنگەن سىڭايلى. ازداپ تىلگە كەلە باستاعانى قۋانتادى. ونداعى دارىگەرلەر قۇلان-تازا ساۋىعىپ كەتۋىنە كەپىلدىك بەرگەنىمەن, كۇردەلى وپەراتسيالارعا قوماقتى اقشا كەرەك. وعان شامامىز كەلمەيدى, – دەيدى ەرلى-زايىپتى جاپاروۆتار. الاڭسىز بالالىق شاقتىڭ قىزىعىن كورە الماي ءوسىپ كەلە جاتقان «باۋىر ەتى – بالا» ءۇشىن قاتتى قينالعان اكەسى سامات بىرقاتار تانىمال انشىلەرگە تەلەفون سوعىپ, كومەك قولىن سوزۋدى وتىنگەن. قازاقستاندىق ەسترادا جۇلدىزدارى اراسىنان مايرا ءىلياسوۆا مەن نۇرلان ونەرباەۆ بالانىڭ ەمىنە قاجەتتى قاراجاتتى جيناۋعا كومەكتەسۋ ماقساتىمەن كونتسەرت وتكىزۋگە كەلىسىم بەرگەن. بۇل باستاماعا وبلىس اكىمدىگى دە قولداۋ كورسەتكەن. كىشكەنتاي ءاليحان ءۇشىن ۇيىمداستىرىلعان «ومىرگە قۇشتارلىق» اتتى قايىرىمدىلىق كەشىنە جينالعان جۇرتشىلىقتا ەسەپ بولمادى. قىزىلجار وڭىرىنە ارنايى ات تەرلەتىپ كەلگەن مايتالمان ونەر يەلەرى 3 ساعاتقا جۋىق «مەترو» كونتسەرت زالىن تاماشا اۋەنگە بولەپ, ەرەكشە كوڭىل-كۇي سىيلادى. ولارعا بەلگىلى پروديۋسەر ەرجان قابدۋللين قوسىلىپ, كەش اجارىن اشا ءتۇستى. «جان انام» قايىرىمدىلىق قورىنىڭ جەتەكشىسى مايرا ءىلياسوۆا ماعجان ەلىنە العاش رەت كەلىپ وتىرعانىنا قاراماستان ۇلكەن اسەر العانىن, تىڭدارمانداردىڭ ىقىلاسى كەرەمەت ءتانتى ەتكەنىن جەتكىزدى. – قايىرىمدىلىق دەگەن–تەرەڭ ءارى قاسيەتتى ۇعىم. بۇگىنگىدەي مەيىرىم, باۋىرمالدىق بارىنشا كەمىگەن تاسباۋىر زاماندا ادامداردىڭ ءبىر-بىرىنە دەگەن ءىلتيپاتى اۋاداي قاجەت ەكەنىن ۇعىناتىن مەزگىل جەتتى. ءومىر ەسقالي «ەگەمەن قازاقستان». سولتۇستىك قازاقستان وبلىسى.