استانا. 14 قازان. «نۇر وتان» پارتياسى استانا قالالىق فيليالىندا 2015 جىلى وڭتۇستىك افريكا رەسپۋبليكاسى يوحاننەسبۋرگ قالاسىندا وتكەن كاراتە-دو شوتاكاننان XVII الەم چەمپيوناتىنىڭ جەڭىمپازدارىن ماراپاتتاۋ شاراسى ءوتتى. بۇل تۋرالى «نۇر وتان» پارتياسى استانا قالالىق فيليالىنىڭ ءباسپاسوز قىزمەتى حابارلادى.
ءىس-شارانىڭ نەگىزگى ماقساتى – XVII الەم چەمپيوناتىندا ءساتتى ونەر كورسەتىپ, ەلىمىز بەن ەلوردامىزدىڭ نامىسىن قورعاعان جاستاردى سالتاناتتى تۇردە ماراپاتتاپ, اتا-انالارىنا العىس جاريالاۋ.
جەڭىمپاز سپورتشىلار قاتارىندا 5 التىن مەدال يەگەرى بەللا ساماشەۆا, 4 التىن 1 كۇمىس يەگەرى ەركەجان ءمۇتالىپ جانە سپورت شەبەرى ادىلەت ۇسەنباەۆ پەن كاراتە-دو شوتوكاننان حالىقارالىق دارەجەدەگى سپورت شەبەرى راۋان توعىزباەۆتار بار.
سپورتشىلارعا «نۇر وتان» پارتياسىنىڭ حاتشىسى اتىنان العىس حات پەن ەسكەرتكىش سىيلىقتاردى پارتيانىڭ قالالىق فيليال توراعاسىنىڭ ءبىرىنشى ورىنباسارى ساپار احمەتوۆ تابىس ەتتى.
«ەلباسى «قازاقستان-2050» ستراتەگياسىندا «ۇلت دەنساۋلىعى – ءبىزدىڭ تابىستى بولاشاعىمىزدىڭ نەگىزى» دەي وتىرىپ, دەنە شىنىقتىرۋدى, سپورتتىڭ بارلىق سالاسىن دامىتۋدىڭ ماڭىزدىلىعىن ايتتى. جالپى ەگەمەندىگىمىز جاريالانعان ۋاقىتتان باستاپ سالاۋاتتى ءومىر سالتىن ساقتاپ, دەنى ساۋ ۇرپاق قالىپتاستىرۋدا مەملەكەت تاراپىنان كوپتەگەن ىستەر اتقارىلدى. ەندىگى ماڭىزدى ماسەلە – وسى سپورتقا دەگەن سۇيىسپەنشىلىكتىڭ جالپى بۇقارالىق سيپاتقا يە بولۋى. ءبىزدىڭ مىندەتىمىز – اعا ۇرپاق پەن جاستار اراسىنداعى بايلانىستى نىعايتۋ, وسى يگىلىكتى شاراعا بەلگىلى سپورتشىلاردى جۇمىلدىرۋ, جاستاردىڭ قىزىعۋشىلىعىن ارتتىرا ءتۇسۋ. مەملەكەت باسشىسى ن.ءا. نازارباەۆ ەل سپورتشىلارىنا ۇلكەن سەنىم ارتاتىنىن ءوز سوزدەرىندە قايتالاپ ايتىپ كەلەدى. سوندىقتان 2015 جىلى يوحاننەسبۋرگ قالاسىندا وتكەن كاراتە-دو شوتاكاننان XVII الەم چەمپيوناتىندا جوعارى كورسەتكىشپەن جەڭىسكە جەتكەن قازاقستان سپورتشىلارىن ارنايى شاقىرىپ وتىرمىز, – دەدى ساپار احمەتوۆ. – ولار, 10 جاسار سپورتشىمىز, الەمنىڭ 10 دۇركىن چەمپيونى, اتالعان حالىقارالىق سايىستا 5 بىردەي التىن مەدال يەلەنگەن بەللا ساماشەۆا جانە 2014 جىلى جەڭىمپاز اتانىپ, بيىلعى جىلعى 4 التىن 1 كۇمىس مەدال يەگەرى ەركەجان ءمۇتالىپ, سونىمەن قوسا, ەرەسەكتەر اراسىندا ەل نامىسىن قورعاپ, 3 التىن, 1 قولانى جەڭىپ العان قازاقستاننىڭ سپورت شەبەرى ادىلەت ۇسەنباەۆ جانە حالىقارالىق دارەجەدەگى سپورت شەبەرى, بيىلعى سايىستا 7-ءشى التىنعا قول جەتكىزگەن راۋان توعىزباەۆ سىندى تالانتتى جاستار بار. «نۇر وتان» پارتياسىنىڭ استانا قالالىق فيليالى سىزدەردى شىن جۇرەكتەن قۇتتىقتايدى. سىزدەردىڭ بۇل جەڭىستەرىڭىز تاۋەلسىز قازاقستاننىڭ سپورت سالاسىنداعى التىن قورجىنىن تاعى ءبىر مارتە تولتىرىپ, حالىقارالىق قاۋىمداستىق الدىندا ەل مەرەيىن ۇستەم قىلعانى انىق. وسى ورايدا اتالعان سپورتشىلاردىڭ جاتتىقتىرۋشىلارىنا جانە تاربيەلەپ-وسىرگەن اتا-انالارىنا زور العىسىمىزدى بىلدىرەمىز».
ءىس-شاراعا «نۇر وتان» پارتياسى استانا قالالىق فيليالىنىڭ باسشىلىعى, «جاس وتان» جاستار قاناتىنىڭ ۇجىمى, جاس سپورتشىلار, ولاردىڭ اتا-انالارى, جاستار ۇيىمدارى, استانا قالاسىنىڭ جۇمىسشى جاستارى, ستۋدەنتتەر, وقۋشى جاستار, سونداي-اق رەسپۋبليكالىق جانە جەرگىلىكتى باق وكىلدەرى قاتىستىى.
ايدار ورىسباەۆ.
دەرەك, سۋرەت: «نۇر وتان» پارتياسى استانا قالالىق فيليالىنىڭ ءباسپاسوز قىزمەتى.
