قازاقستاننىڭ بۇرىنعى پرەمەر-ءمينيسترى نۇرلان بالعىمباەۆ قايتىس بولدى

استانا. 14 قازان. بۇگىن اتىراۋدا 68 جاسقا قاراعان شاعىندا قازاقستاننىڭ بۇرىنعى پرەمەر-ءمينيسترى نۇرلان بالعىمباەۆ قايتىس بولدى. بۇل تۋرالى egemen.kz حابارلادى. بالعىمباەۆ نۇرلان وتەپ ۇلى 1947 جىلى 20 قاراشادا اتىراۋ قالاسىندا تۋعان. 1973 جىلى قازاق پوليتەحنيكالىق ينستيتۋتىنىڭ مۇناي جانە گاز فاكۋلتەتىن تاۋ-كەن ينجەنەرى ماماندىعى بويىنشا ءبىتىردى. سونداي-اق, 1992-1993 جىلدارى ماسساچۋسەتس ۋنيۆەرسيتەتىنىڭ (اقش) تىڭداۋشىسى بولدى. ەڭبەك جولىن 1964 جىلى اتىراۋ (قازىرگى ماڭعىستاۋ) وبلىسىنىڭ قۇرىق كەنتىندە بۇرعىلاۋشىنىڭ كومەكشىسى بولىپ باستاعان نۇرلان بالعىمباەۆ ءار جىلداردا جەراستى جوندەۋ وپەراتورى, مۇناي شىعارۋ جونىندەگى وپەراتور, سكۆاجينالاردى جەراستى جوندەۋ شەبەرى سىندى جۇمىستارمەن قاتار, وندىرىستىك قىزمەت كورسەتۋ بازاسى باستىعىنىڭ ورىنباسارى, باس ينجەنەر, كسرو مۇناي جانە گاز ونەركاسىبى مينيسترلىگىنىڭ باس باسقارمالارىندا باستىقتىڭ ورىنباسارى قىزمەتتەرىن ابىرويمەن اتقاردى. سونداي-اق, «شەۆرون» كومپانياسىندا ەڭبەك ەتتى. ودان بولەك, 1994-1997 جىلدارى قازاقستان رەسپۋبليكاسى مۇناي جانە گاز ونەركاسىبى ءمينيسترى, «قازاقويل» ۇلتتىق مۇناي-گاز كومپانياسىنىڭ پرەزيدەنتى, 1997-1999 جىلدارى قازاقستان رەسپۋبليكاسىنىڭ پرەمەر-ءمينيسترى, 1999 جىلدان «قازاقويل» ۇلتتىق مۇناي كومپانياسىنىڭ پرەزيدەنتى, قازاقستان ۇكىمەتىنىڭ مۇشەسى, 2002 جىلدان «قازاقستاندىق مۇناي ينۆەستيتسيالىق كومپانياسى» اق پرەزيدەنتى, 2007 جىلدان قازاقستان پرەزيدەنتىنىڭ كەڭەسشىسى, كاسپي تەڭىزى رەسۋرستارىن پايدالانۋ ماسەلەلەرى جونىندەگى قازاقستاننىڭ ارنايى وكىلى, 2009 جىلدىڭ جەلتوقسانىنان باستاپ «قازمۇنايگاز» سالىنىپ جاتقان كاسىپورىندارىنىڭ اكىمشىلىگى» جشس باس ديرەكتورى قىزمەتتەرىن اتقاردى. ءىى دارەجەلى «بارىس» وردەنىمەن ماراپاتتالعان (1999 ج). مارقۇمدى جەرلەۋ ءراسىمى 16 قازاندا اتىراۋ قالاسىندا وتەدى. ەلامان قوڭىر. دەرەك: egemen.kz. سۋرەت: facebook.com.