دەۆيس كۋبوگى جارىسىندا ميحايل كۋكۋشكين سيمونە بولەلليدى جەڭدى

استانا. 6 ناۋرىز. ءدال قازىر استاناداعى «داۋلەت» ۇلتتىق تەننيس ورتالىعىندا تەننيستەن دەۆيس كۋبوگى جارىسى اياسىندا قازاقستان مەن يتاليا اراسىنداعى ويىن وتۋدە. العاشقى ويىندا ءنومىرى ءبىرىنشى تەننيسشىمىز ميحايل كۋكۋشكين قارسىلاسى سيمونە بولەلليدى 3:0 (7:6 (8:6), 6:1, 6:2) ەسەبىمەن جەڭىپ, جالپى ەسەپتە ءبىزدىڭ كوماندانى العا شىعاردى. بۇل تۋرالى egemen.kz حابارلادى. العاشقى سەتتە 1 ساعات 6 مينۋت ويناعان قارسىلاستار جەڭىمپازدى تاي-برەيك ارقىلى انىقتادى. بۇل سىندا وتانداسىمىزدىڭ باعى باسىم بولدى. ال ەكىنشى جانە ءۇشىنشى سەتتە بولەللي ءبىزدىڭ تەننيسشىگە قارسى ەش شارا قولدانا المادى. ەكىنشى سەتتە تەك ءبىر گەيمدە عانا ۇپاي العان يتاليان كەلەسى كەزەڭدە ەنشىسىنە نەبارى ەكى ۇپاي جازدى. كۋكۋشكيننىڭ جەڭىسىنەن كەيىن قازاقستان 1:0 ەسەبىمەن العا شىقتى. قازىر كورتتا قازاقستاندىق اندرەي گولۋبەۆ پەن قارسىلاسى اندرەاس سەپپي تالاسقا تۇسۋدە. العاشقى سەتتىڭ قورىتىندىسى بويىنشا سەپپي الدا كەلەدى. ول ءبىرىنشى كەزەڭدە اندرەيدى 6:3 ەسەبىمەن جەڭدى. كۋكۋشكين مەن بولەللي اراسىنداعى تەكەتىرەس تۋرالى ايتار بولساق, قوس تەننيسشى وسىعان دەيىن 3 رەت كۇش سىناسقان. وكىنىشكە قاراي, سونىڭ بارلىعىندا يتالياننىڭ مەرەيى ۇستەم بولدى. ياعني, بۇگىن ميشا بولەلليدى العاش رەت جەڭىپ وتىر. ەلامان قوڭىر. دەرەك: egemen.kz. سۋرەت: daviscup.com.