تسيرك ونەرىنىڭ حالىقارالىق بايقاۋى

تسيرك – ساحنالىق ونەردىڭ وتە ەرتەدەن كەلە جاتقان ءتۇرى. تسيرك ونەرى اسقان ەپتىلىك پەن كۇشتىلىككە نەگىزدەلگەن پانتوميمالىق ويىن-ساۋىقتار مەن كلوۋننىڭ كۇلكىلى ءازىل-ءاجۋالارىنان,  ويىن-ساۋىعى الۋان ءتۇرلى تريۋكتەر مەن ەكستسەنتريكاعا نەگىزدەلگەن نومىرلەردەن تۇرادى. وعان سوڭعى جىلدارى استانا قالاسىندا ءداستۇرلى تۇردە وتكىزىلىپ كەلە جاتقان «ازيا جاڭعىرىعى» اتتى تسيرك ونەرىنىڭ حالىقارالىق فەستيۆالى ايعاق. بيىل دا قالا كۇنىن مەرەكەلەۋ اياسىندا استانالىق تسيرك ەلوردا اكىمدىگىنىڭ قولداۋىمەن 1-8 شىلدە ارالىعىندا جىل سايىنعى «ازيا جاڭعىرىعى» اتتى تسيرك ونەرىنىڭ ءداستۇرلى VIII فەستيۆالىن وتكىزەدى. ءبىر اپتا بويى جالعاساتىن بۇل مەرەكەلىك شارا باعدارلاماسىندا قازاقستان, بەلارۋس, يسپانيا, كۋبا, لاتۆيا, رەسەي, قىتاي, قىر­­عىز­ستان, وزبەكستان جانە ۋكراينا مەن ەلىمىزدىڭ ەڭ تانى­مال تسيرك جۇلدىزدارى ونەر كور­سەتپەك. سونداي-اق, اتال­مىش باعدارلامادا تسيرك ونەرى­نىڭ بارلىق جانرلارى تولىق قامتىلعان. بۇل تۋرالى استانا  تسيركىنىڭ ديرەكتورى ەرىك جول­جاقسىنوۆ الىس-جاقىن شەتەلدەردەن كەلگەن تسيرك مايتالماندارىمەن بولعان باسقوسۋدا كەڭىنەن توقتالىپ ءوتتى. ونىڭ ايتۋىنشا, بۇل جولى كورەرمەندەر تسيركتىڭ ەڭ ۇزدىك كورىنىستەرىن تاماشالايتىن بولادى. ولاردىڭ اراسىندا: افريكا ارىستاندارى, اۋە گيمناستتارىنىڭ باس اينالدىرار قويىلىمدارى مەن كلوۋنداردىڭ شوۋلارى بار.  سونداي-اق, فەستيۆالدە استانا­لىقتار مەن قالا قوناقتارى ءۇشىن تەك قانا جاڭا قويىلىمدار جۇرت­شىلىق نازارىنا ۇسىنىلماق. ەڭ قىزىعى ءارى مەرەكەلىك شا­را­نىڭ ەڭ ايتۋلى وقيعاسى – «كا­ۆالكادا» اتتى ۇرمەلى وركەس­تردىڭ سۇيەمەلدەۋىمەن وتەتىن فەستيۆال قاتىسۋشىلارىنىڭ استانا كوشەلەرىندەگى مەرەكەلىك شەرۋى بولماق. ايتا كەتەيىك, شەرۋ 3 شىلدە كۇنى ساعات 20:00-دە ەلوردا كوشە­لەرىمەن سالتاناتتى ساپ قۇرىپ وتەدى. راۋشان تاۋىرحانقىزى, جۋرناليست.