استانا. 14 قازان. قازاقستان رەسپۋبليكاسى قورعانىس مينيسترلىگىندە ۆەدومستۆو باسشىسى يمانعالي تاسماگامبەتوۆ پەن قحر قورعانىس ءمينيسترى گەنەرال-پولكوۆنيك چان ءۆانتسيۋاننىڭ كەزدەسۋى ءوتتى. بۇل تۋرالى egemen.kz ءتىلشىسى حابارلادى.
كەزدەسۋ قورىتىندىسى بويىنشا قازاقستان رەسپۋبليكاسىنىڭ قارۋلى كۇشتەرىنە اقىسىز نەگىزدە تەحنيكالىق كومەك كورسەتۋ تۋرالى قر جانە قىتاي اراسىنداعى كەلىسىمگە قول قويىلدى.
سونىمەن قاتار, قورعانىس ءمينيسترى يمانعالي تاسماعامبەتوۆ قىتاي وكىلدەرىن استانا قالاسىندا 2016 جىلدىڭ ماۋسىمىندا وتەتىن «كادەكس-2016» اسكەري تەحنيكا مەن قارۋ-جاراقتىڭ حالىقارالىق كورمەسىنە قاتىسۋعا شاقىردى.
«قىتاي قورعانىس ونەركاسىبى كەشەنىنىڭ ەكسپوزيتسياسى جوعارى دەڭگەيدە ۇسىنىلادى دەپ ۇمىتتەنەمىن. بۇل ءبىزدىڭ اسكەري-تەحنيكالىق ىنتىماقتاستىعىمىزعا قوسىمشا سەرپىن بەرەدى», دەدى قورعانىس ۆەدومستۆوسىنىڭ باسشىسى.
ءوزارا ءىس-قيمىل جاساۋدىڭ ماڭىزدى اسپەكتىسى بىرلەسىپ دايىندالۋ جانە اسسيمەتريالىق قاۋىپ-قاتەرلەرگە (ارنايى ماقساتتاعى بولىمشەلەردى دايىنداۋ) قارسى ءىس-قيمىل جونىندەگى الەۋەتتى ارتتىرۋ اياسىندا تاجىريبە الماسۋ بولىپ تابىلادى. قازاقستان تاۋلى دايارلىق, جاۋىنگەرلىك جۇزۋشىلەردى دايىنداۋ, قارۋلى كۇشتەر ارنايى بولىمشەلەرىنىڭ قالالىق جاعدايلارداعى ارەكەت ەتۋى بويىنشا بىرلەسكەن ءىس-شارالاردى ۇيىمداستىرۋعا مۇددەلى. جاقىن ارادا قىتاي مەن قازاقستاننىڭ اۋماعىندا بىرلەسكەن روتالىق-تاكتيكالىق لاڭكەستىككە قارسى وقۋ-جاتتىعۋىنىڭ ءوتۋى جوسپارلانۋدا.
ودان باسقا, ەكى ەلدىڭ ءوزارا ءىس-قيمىلىندا اسكەري ءبىلىم بەرۋ سالاسى ماڭىزدى ءرول اتقارادى. بۇگىنگى تاڭدا قازاقستاندىق اسكەري قىزمەتشىلەر قىتايدىڭ ۇلت-ازاتتىق ارمياسىنىڭ اسكەري جوعارى وقۋ ورىندارىندا ءبىلىم الۋدا. قر-نىڭ اسكەري قىزمەتشىلەرى قىتاي ارمياسىنىڭ تۇرلىك (ااك, اتك جانە قا) اكادەميالارىندا, سونداي-اق ءارتۇرلى ماماندىقتار بويىنشا دايارلاۋ كۋرستارىندا ءبىلىم نارىمەن سۋسىنداۋدا.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
