ءورت

27 ماۋسىم كۇنى اپتاپ ىستىق + 35-ءتى كورسەتكەن تالتۇستە م.جۇماباەۆ پەن ك.سۇتىشەۆ كوشەلەرىنىڭ قيىلىسىندا ەشكىم كۇتپەگەن وقىس وقيعا ورىن الىپ, وسى ماڭاي تۇرعىندارىن ءبىراز الەككە سالدى. «پيتستسا حاۋس» ءدامحاناسى, شاشتاراز, بالالار ورتالىعى جانە بىرنەشە ساۋدا نۇكتەلەرى قونىستانعان «نۇرپارك» ويىن-ساۋىق كەشەنى كوزدى اشىپ-جۇمعانشا الاپات ءورت قۇشاعىنا وراندى. 4 ساعاتتان اسا ۋاقىتقا سوزىلعان قىزىل جالىندى اۋىزدىقتاۋعا توتەنشە جاعدايلار دەپارتامەنتىنىڭ قۇتقارۋشىلارى جەدەل جەتىپ, 70-تەن استام ءورت ءسوندىرۋشى مەن 22 تەحنيكا جۇمىلدىرىلدى. الايدا, كوتەرىلگەن جەلدىڭ سالدارىنان ءتىلسىز جاۋ كورشى ورنالاسقان 5 قاباتتى تۇرعىن ۇيگە اۋىز سالىپ, شاتىردى جالماپ ءتۇستى. ابىروي بولعاندا, عيماراتتىڭ قابىرعالارى ءىرى پانەلدەن تۇرعىزىلعاندىقتان, امان قالدى. ىشكى ىستەر دەپارتامەنتى قىز­مەتكەرلەرىنىڭ بەلسەنە اتسالىسۋى­مەن 100-گە جۋىق تۇرعىن قاۋىپسىز جەرلەرگە شىعارىلدى. ولاردىڭ اراسىندا جاس بالالار مەن ءمۇم­كىندىگى شەكتەۋلى جاندار دا بولدى. پاتەرلەر گاز, ەلەكتر قۋاتىنان اجىراتىلدى. ايتىپ كەلمەس اپات كۋاگەرلەرىنىڭ ايتۋىنشا, 3 قاباتتى كەشەن تامتىعى قالماي جانىپ كەتكەن. شاماسى ءورت ۇشقىنى سىرتى تەز جانعىش ماتەريالدارمەن قاپتالعان اعاش عيماراتتىڭ توبەسىنەن تۇتانعان سىڭايلى. تۇرعىن ءۇيدىڭ شاتىرى تۇگەلدەي ورتەنىپ, دالىزدەر, جەلدەتكىشتەر, سپۋتنيكتىك بايلانىس قوندىرعىلارى قاتتى زاقىمدانعان. تەرەزە شىنىلارىنىڭ كۇل-تالقانى شىعىپ, ۇڭىرەيىپ تۇر. بۇل ۇيگە وسىدان ەكى جىل بۇرىن تۇرعىن ءۇي-كوم­مۋنالدىق شارۋاشىلىعىن جاڭعىرتۋ باعدارلاماسى بويىنشا كۇردەلى جوندەۋ جۇرگىزىلىپتى. ەندى قايتپەك كەرەك؟ اي سايىن جۇيەلى تولەنىپ كەلگەن نەسيەنىڭ جەلگە ۇشقانى ما؟ تۇرعىنداردىڭ قاتتى قينالعان تۇسى وسى بولدى. اراعا كۇن سالىپ, وقيعا بولعان جەرگە ايماق باسشىسى ەرىك سۇلتانوۆ كەلىپ, تۇرعىندارمەن كەزدەستى. جاعدايمەن جەتە تانىسقانىن, تۇرعىن ءۇيدىڭ شاتىرى مەن دالىزدەرىن جوندەۋ جۇمىستارىنا جەرگىلىكتى قازىنادان 25 ميلليون تەڭگە بولۋگە تاپسىرما بەرگەنىن جەتكىزدى. ءتىلسىز جاۋدان قاتتى جاپا شەككەن 13 پاتەر يەلەرىنە 139 مىڭ تەڭگە مولشەرىندە كومەك قاراستىرىلاتىن بولدى. – جەكە مەنشىك يەلەرىنە تيەسىلى عيماراتتاعى ءورتتىڭ سەبەپتەرى زەرتتەلۋدە. ونىڭ ناقتى قورىتىندىسى ساراپتامالاردان كەيىن بەلگىلى بولادى,– دەدى باق وكىلدەرىنە بەرگەن سۇحباتىندا توتەنشە جاعدايلار جونىندەگى دەپارتامەنت ءباسپاسوز قىزمەتىنىڭ جەتەكشىسى ەۆگەني جۋراۆلەۆ. ءومىر ەسقالي «ەگەمەن قازاقستان». سولتۇستىك قازاقستان وبلىسى.