استانا. 14 قازان. وڭتۇستىك كورەيانىڭ مۋنگيون قالاسىندا VI دۇنيەجۇزىلىك ارميا ويىندارى اياقتالدى. بۇل تۋرالى egemen.kz ءتىلشىسى حابارلادى.
جارىستىڭ قورىتىندىسى بويىنشا قازاقستان قارۋلى كۇشتەرىنىڭ قۇراما كومانداسى 130 قاتىسۋشى ەلدىڭ اراسىنان 12-ورىندى يەلەنىپ, ارميا ويىندارىنىڭ مىقتى كوماندالارىنىڭ قاتارىنا كىردى.
جالپى ەسەپپەن العاندا كوماندامىزدىڭ قورجىنىندا 13 مەدال, ياعني, 4 التىن, 3 كۇمىس جانە 6 قولا مەدال بار.
جوعارى دارەجەدەگى ماراپاتتاردى ەلىمىزگە 64 كيلو سالماقتا ونەر كورسەتكەن بىلعارى قولعاپ شەبەرلەرى, قاتارداعى جاۋىنگەر ەلدوس سارقۇلوۆ پەن 69 كيلوعا دەيىنگى سالماقتاعى اوسك-نىڭ قىزمەتكەرى اسلانبەك شىمبەرگەنوۆ, تاەكۆوندوشى قاتارداعى جاۋىنگەر نۇرسۇلتان ماماەۆ پەن ەركىن ستيلدەگى بالۋان اوسك-نىڭ قىزمەتكەرى مەيرامبەك ايناعۇلوۆ اكەلدى.
كۇمىس مەدالدارىن 57 كيلوعا دەيىنگى سالماقتا قر سپورت شەبەرى, ەركىن كۇرەستەن الەم چەمپيوناتتارىنىڭ جۇلدەگەرى اوسك-نىڭ قىزمەتكەرى ۆلاديمير كۋدرين, ارقامەن 100 مەتر قاشىقتىققا جۇزۋدە كىشى سەرجانت الەكساندر تارابرين جانە 91 كيلوعا دەيىنگى سالماقتاعى بىلعارى قولعاپ شەبەرى اوسك-نىڭ قىزمەتكەرى كامشىبەك كۇنكاباەۆ قانجىعالارىنا بايلادى.
ارميا ويىندارىندا قولا مەدالدى 74 كيلوعا دەيىنگى سالماقتا ەركىن ستيلدەگى بالۋاندار الەم چەمپيونى كىشى سەرجانت عالىمجان ۇسەرباەۆ, 65 كيلوعا دەيىنگى سالماقتا الەم چەمپيوناتىنىڭ جۇلدەگەرى ەفرەيتور ازامات شاعاپ ۇلى, 61 كيلو سالماقتا قازاقستاننىڭ چەمپيونى, اسكەري قىزمەتشىلەر اراسىنداعى 2014 جىلعى الەم چەمپيوناتىنىڭ كۇمىس جۇلدەگەرى ەفرەيتور ەلدوس ابىكەنوۆ, كىشى سەرجانت ادىلەت داۋلىمباەۆ, سونداي-اق 49 كيلو سالماقتا اوسك-نىڭ بوكسشىلارى, قىزمەتكەرلەرى جومارت ەرجان پەن 60 كيلوعا دەيىنگى سالماقتا جاقسىلىق ءىلياسوۆ جەڭىپ الدى.
VI دۇنيەجۇزىلىك ارميا ويىندارى 1 مەن 11 قازان ارالىعىندا ارميا سپورتىنىڭ دۇنيەجۇزىلىك كەڭەسى (CISM) شەڭبەرىندە وتكەنىن ەستەرىڭىزگە سالا كەتەيىك. ول 4 جىلدا ءبىر رەت وتكىزىلەدى جانە اۋقىمى بويىنشا وليمپيالىق ويىندارمەن سالىستىرۋعا بولادى.
بيىلعى جىلى الەمنىڭ 130 ەلىنەن باس قوسقان 8 500 سپورتشى ويىنعا قاتىستى. ەلىمىزدىڭ نامىسىن قر قك باس شتابى باستىعىنىڭ ورىنباسارى, گەنەرال-مايور مۇقان دۇيسەكەەۆتىڭ باسشىلىق ەتۋىمەن ارميا ورتالىق سپورت كلۋبىنىڭ 58 سپورتشىسىنان قۇرالعان قارۋلى كۇشتەردىڭ قۇراماسى قورعادى. سپورتشىلار سپورتتىڭ 11 تۇرىنەن ونەر كورسەتتى. اتاپ ايتساق, ەركىن جانە گرەك-ريم كۇرەسى, سپورتتىق باعدارلاۋ, دزيۋدو, ءجۇزۋ, وق اتۋ, زاماناۋي بەسسايىس, اسكەري بەسسايىس, تاەكۆوندو, جەڭىل اتلەتيكا جانە بوكس.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.
