جۋرناليستەرگە قاراعاندىنىڭ 3D-ماكەتى كورسەتىلدى

قاراعاندى. 6 ناۋرىز. كەشە بۇقارالىق اقپارات قۇرالدارىنىڭ وكىلدەرىنە قاراعاندى قالاسىنىڭ 3D-ماكەتى كورسەتىلدى. بۇل تۋرالى egemen.kz حابارلادى. وسىعان ارنالعان كورمە كەنشىلەر مادەنيەت ءۇيىنىڭ ەكىنشى قاباتىنداعى بيشىلەر زالىنان ورىن الدى. مۇندا كەز كەلگەن تىلەك ءبىلدىرۋشى كەلىپ, قالانىڭ جاڭا ماكەتىمەن تانىسا الار ەدى. قاراعاندىنىڭ 3D-ماكەتى قالانىڭ بۇرىنعى اكىمى مەيرام سماعۇلوۆتىڭ يدەياسى بويىنشا جاسالدى. مۇنداي كەڭ اۋقىمدى كارتانى ول استانادا بولعانىندا كورگەن ەكەن. سول جولى دۋانباسى ءدال وسىنداي ماكەتتى كەنشىلەر كەنتىندە دە جاساۋدىڭ كەرەكتىگىنە وي ءتۇيىپ قايتادى. سوندىقتان وعان 30 ملن. تەڭگە قارجى ءبولدىرىپ, قالا قۇرىلىسى كاداسترى ورتالىعىنا ماكەت دايىنداۋعا تاپسىرىس بەرەدى. جۇمىس توعىز اي بويى جۇرەدى. «ماكەت ءۇشىن نەگىز جاساۋ وڭاي بولعان جوق, - دەپ مويىندايدى قازىر «قالا قۇرىلىسى كاداسترى ورتالىعى» جشس ديرەكتورى تيمۋر اۋجانوۆ. – مەن بۇل جەردە قاراعاندىنىڭ 1:2000 ماسشتابتى كارتاسىن جاساۋدىڭ قيىن بولعانىن ايتىپ وتىرمىن. سەبەبى, جولدارى مەن ۇيلەرى كورسەتىلگەن مۇنداي اۋقىمداعى كارتا بۇرىن قالادا بولماعان. سونداي-اق قالا اۋداندارىن ءبىر-بىرىمەن جالعاپ, كوورديناتتارىن ساقتاپ قالۋ وڭاي بولعان جوق. اتاپ ايتقاندا, مايقۇدىق پەن وڭتۇستىك-شىعىس اۋداندى قالانىڭ ورتالىعىمەن بايلانىستىرۋعا قاتىستى ءبىراز جۇمىستار جاساۋعا تۋرا كەلدى». اتاپ ءوتۋ كەرەك, قالانىڭ پريشاحتينسكىدەن باسقا بولىكتەرىنىڭ ءبارى ماكەتكە ەنگىزىلگەن ەكەن. ديرەكتوردىڭ سوزىنە قاراعاندا, بۇل وسى اۋداننىڭ جاڭا جوباسىنىڭ جاسالىپ جاتۋىنا بايلانىستى بولعان. ال كەلەشەكتە ول قالا كارتاسى مەن ماكەتىنە تولىق قوسىلادى. قالا اكىمى نۇرلان اۋباكىروۆ شاھاردىڭ ءالى دە وسە تۇسەتىنىن, وندا كوپتەگەن جاڭا عيماراتتار پايدا بولاتىنىن ايتتى. ايتا كەتەيىك, 3D-ماكەتىنىڭ كولەمى 11x17 مەتردى قۇرايدى. وندا ۇيلەر مەن قۇرىلىستاردىڭ 185 مىڭ كىشىرەيتىلگەن كوشىرمەلەرى ورنالاستىرىلعان. ماكەت 9 ناۋرىز كۇنىنىڭ سوڭىنا دەيىن كەنشىلەر مادەنيەت ۇيىندە كورمە رەتىن تۇرادى. ايقىن نەسىپباي. دەرەك, فوتو: قاراعاندى قالالىق اكىمدىگى.