قىزىلوردا وبلىسىندا مۇستافا شوقايدىڭ ءبيۋستى اشىلدى

قىزىلوردا. 14 قازان. الاش ارىسى, كورنەكتى قوعام جانە مەملەكەت قايراتكەرى مۇستافا شوقايدىڭ 125 جىلدىق مەرەيتويى تۋعان جەرى قىزىلوردا وبلىسىندا كەڭ كولەمدە تويلانۋدا. بۇل تۋرالى egemen.kz ءتىلشىسى حابارلادى. قايراتكەردىڭ ەسىمىن ۇلىقتاپ, تاۋەلسىزدىك جولىنداعى ەرەن ەڭبەگىن دارىپتەۋ ماقساتىندا «مۇستافا شوقاي – الاشتىڭ الىپ تۇلعاسى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى. وعان تولەن ابدىك, قويشىعارا سالعارين, كوشىم ەسماعامبەتوۆ, امانتاي ءشارىپ, انەس ساراي, ءسۇلتانالى بالعاباەۆ سىندى زيالى قاۋىم وكىلدەرى, تاريحشىلار مەن ساياساتكەرلەر قاتىسىپ, تۇششىمدى ويلارىن ورتاعا سالدى. جالپى كونفەرەنتسياعا قاتىسۋشىلار شوقاي تۋرالى كوپتەگەن تىڭ دەرەكتەرگە قانىقتى. مىسالى, شوقايدىڭ «ياش تۇركىستان» جۋرنالىن شىعارعانى بەلگىلى بولعانىمەن, «تۇركىستان» اتتى جۋرنالدىڭ التى ءنومىرىن شىعارعانى بۇرىن بەلگىسىز بولىپ كەلگەن ەدى. سونداي-اق, نەمىس تۇتقىنىنان ورتاازيالىق ۇلتتار وكىلدەرىن بوساتۋ جۇمىستارىمەن قاتار, ولىمگە كەسىلگەن 80 گرۋزيندى اجالدان اراشالاپ قالعان. بۇل دەرەكتەردى ەستىگەن گرۋزين حالقىنىڭ زيالى قاۋىمى شوقاي تۇرعان ۇيگە ەستەلىك تاقتا ورناتىپتى. كونفەرەنتسيادا ءسوز سويلەۋشىلەر تاراپىنان بىرقاتار ۇسىنىستار دا ايتىلدى. سولاردىڭ قاتارىندا قىزىلوردا قالاسىندا ەسكەرتكىش ورناتۋ, شوقاي ورتالىعىن قۇرۋ تۋرالى ويلار بار. سونداي-اق, وسى شارا اياسىندا قوعام قايراتكەرى مۇستافا شوقايدىڭ تۋىپ وسكەن جەرى شيەلى اۋدانى, سۇلۋتوبە اۋىلىندا جاڭادان 240 ورىندىق مادەنيەت ءۇيى اشىلىپ, الدىنا قايراتكەردىڭ ءبيۋستى قويىلدى. ەرجان بايتىلەس. دەرەك, سۋرەت: egemen.kz.