قازاقستان جاستار قۇراماسى انگليادان ءىرى ەسەپپەن جەڭىلدى

استانا. 14 قازان. بۇگىن, 13 قازاننان 14-ىنە قاراعان ءتۇنى فۋتبولدان 2017 جىلعى جاستار اراسىنداعى (U-21) ەۋروپا چەمپيوناتىنا ىرىكتەۋ ءتۋرنيرى شەڭبەرىندە قازاقستان جاستار قۇراماسى سىرت الاڭدا انگليامەن وينادى. ناتيجەسىندە اعىلشىندار 3:0 ەسەبىمەن جەڭىسكە جەتتى. بۇل تۋرالى egemen.kz حابارلادى. كەزدەسۋ انگليانىڭ كوۆەنتري قالاسىندا ءوتتى. الاڭ يەلەرى العاشقى مينۋتتاردان باستاپ شابۋىلعا شىقتى. الايدا, ءبىزدىڭ كوماندا ساۋاتتى قورعانىپ, ۇزىلىسكە دەيىن ءوز قاقپاسىنا گول جىبەرمەدى. ال ەكىنشى تايمدا ويىنشىلارىمىز باستاپقىداي بەلسەندىلىك تانىتا المادى. سالدارىنان 53-مينۋتتا رۋبەن لوفتۋس-چيك ايىپ سوققىسىن وتە كەرەمەت ورىنداپ, ەسەپ اشتى. سونداي-اق, 70-مينۋتتا نەتان رەدموند ەسەپتى ەسەلەسە, قوسىمشا ۋاقىتتا مەرگەندىگىمەن كوزگە تۇسكەن چۋبا ەكپوم ويىننىڭ نۇكتەسىن قويدى. وسىلايشا جاس فۋتبولشىلارىمىز اتالعان ىرىكتەۋ سىنىنداعى ءتورت ويىننىڭ ۇشەۋىندە جەڭىلىپ وتىر. بۇگىندە ءۇش ۇپايمەن قازاقستان ءوز توبىندا 4-ورىندا كەلەدى. ال التى ۇپايى بار انگليا ءۇشىنشى ساتىدا. كوش باسىندا ءۇش ويىننان 7 ۇپاي جيعان شۆەيتساريا تۇرسا, ەكىنشى ورىنعا نورۆەگيا جايعاسقان. نورۆەگتەردىڭ قورجىنىندا دا 7 ۇپاي بار. الايدا, ولار ءبىر ويىن ارتىق وتكىزۋىنە بايلانىستى شۆەيتساريادان كەيىن ورنالاسقان. تۋرنير كەستەسىنىڭ سوڭىندا بارلىق ءۇش ويىندا جەڭىلىس تاپقان بوسنيا جانە گەرتسەگوۆينا كەلەدى. ەلامان قوڭىر. دەرەك: egemen.kz. سۋرەت: vk.com.