جەڭىس كۇنىنە وراي اقتاۋدى بەزەندىرۋگە 2,1 ملن. تەڭگە جۇمسالادى

اقتاۋ. 6 ناۋرىز. جەڭىس كۇنىنە وراي اقتاۋ قالاسىن بەزەندىرۋ جۇمىستارىنا جەرگىلىكتى بيۋدجەتتەن 2,1 ملن. تەڭگە قاراستىرىلعان. بۇل تۋرالى egemen.kz ءتىلشىسى حابارلادى. وسى قارجىعا اقتاۋدى جەڭىس مەيرامىنا بەزەندىرۋدەن بولەك, ماڭعىستاۋلىق باتىرلار مەن قازىرگى كوزى ءتىرى ارداگەرلەرىمىزدىڭ سۋرەتتەرىن قالا كوشەلەرىنە, LED ەكراندار مەن تابلولارعا ورنالاستىرۋ, سونداي-اق, «ماڭگىلىك الاۋ» مونۋمەنتىنىڭ جانىنان جەڭىستىڭ 70 جىلدىعىنا ارناپ ارنايى بارەلەف ورناتۋ كوزدەلگەن. «ءبىرىنشى بارەلەفكە مايدان الاڭى بەينەلەنسە, ەكىنشى بارەلەفكە تىل بەينەلەنەتىن بولادى. سەبەبى, جەڭىسكە مايدانداعى اسكەري كۇشپەن بىرگە, تىلداعى ەرەن ەڭبەك تە ۇلەس قوستى. سونىمەن قاتار, ماڭعىستاۋلىق كەڭەس وداعىنىڭ باتىرلارى ءمادي بەگەنوۆ, جۇماعالي قالدىقاراەۆ, ءبىلال قاليەۆ, «داڭق» وردەنىنىڭ يەگەرلەرى كەمەر وڭعالباەۆ, پاۆەل مالاەۆ, لەنين وردەندى يساتاي سۇيەۋباەۆ پەن قارتباي بەكجانوۆقا ارنايى ەسكەرتكىشتەر ورناتىلاتىن بولادى», دەيدى اقتاۋ قالاسىنىڭ اكىمى ەدىل جاڭبىرشين. اقتاۋدا سوڭعى ەكى جىلدا 8 سوعىس ارداگەرى مەملەكەتتىك تۇرعىن ءۇي قورىنان باسپانالى بولعان, قازىر اقتاۋ قالاسى بويىنشا تۇرعىن ءۇي كەزەگىندە تۇرعان ءبىر دە ءبىر ارداگەر جوق. اقتاۋ قالاسى اكىمىنىڭ ايتۋىنشا, پاتەرلەرى جوندەۋدى قاجەت ەتەتىن ارداگەرلەردىڭ ۇيلەرىنە جوندەۋ جۇمىستارىن جۇرگىزۋ قولعا الىنعان. مەرەكە قارساڭىندا ارنايى «ارداگەرلەرگە كومەك» اتتى جاستاردىڭ الەۋمەتتىك كومەك كومانداسى جاساقتالىپ, جاستار ارداگەرلەردىڭ ءۇيى-شارۋاسىنا كومەكتەسىپ, كۇندەلىكتى تۇرمىستاعى جۇمىستارىنا قولعابىس جاساماق. – جاز ماۋسىمىندا تىلەك ءبىلدىرىپ وتىرعان كاسىپكەرلەردىڭ كومەگىمەن ارداگەرلەردىڭ دەنساۋلىعىن وڭالتۋ بويىنشا ناقتى شارالار قابىلدايتىن بولامىز. ياعني, ارداگەرلەردى رەسپۋبليكامىزدىڭ ەمدەۋ-ساۋىقتىرۋ ورتالىقتارىنا جىبەرەمىز. ال قازىر وبلىستىق دەنساۋلىق ساقتاۋ باسقارماسىمەن بىرلەسىپ تەز ارادا ارداگەرلەردىڭ دەنساۋلىعىنا تولىق تەكسەرۋ جاساۋىمىز كەرەك. سوعىس ارداگەرلەرى اۋرۋحانا, ەمحانا جاعالاپ جۇرمەۋى ءۇشىن ارنايى ءموبيلدى توپ جاساقتاپ, قاريالاردىڭ ۇيلەرىنە بارىپ, دەنساۋلىقتارىن تەكسەرەتىن بولامىز, – دەيدى قالا اكىمى. 1 ناۋرىزدان باستاپ بارلىق ءبىلىم بەرۋ ۇيىمدارىندا, مەكتەپتەر مەن بالاباقشالاردا جەڭىس كۇنىنە ارنالعان «ەرلىك ساباقتارىن», «بەيبىتشىلىك ساباقتارىن» جانە «ەسكە ءتۇسىرۋ ساعاتتارىن» وتكىزۋ قولعا الىنسا, ءساۋىر ايىندا پانكراتيوننان قالالىق اشىق بىرىنشىلىك وتكىزۋ جوسپارلانعان. اتالعان بىرىنشىلىككە اتىراۋ, اقتوبە, ورال, قىزىلوردا وبلىستارىنىڭ كوماندالارى قاتىسادى دەپ كۇتىلۋدە. ال قازان ايىندا «جاۋىنگەر, سەنىڭ ەرلىگىڭ وشپەيدى!» اتتى وقۋ ورىندارى ستۋدەنتتەرىنىڭ تەاترلاندىرىلعان كورمەلەرىنىڭ بايقاۋى ۇيىمداستىرىلماق. گۇلايىم شىنتەمىرقىزى. دەرەك: egemen.kz. سۋرەت: tumba.kz.