5315 بوزداقتىڭ ەسىمى جازىلعان مەموريال

ۇلى جەڭىستىڭ 70 جىلدىق مەرەيتويى قارساڭىندا كۇرشىم اۋدانىنىڭ ورتالىعىندا داڭق مە­موريالى اشىلدى. وتان قور­عاۋ­­­­­شى كۇنى سالتاناتتى تۇردە اش­ىلعان ەسكەرتكىشتىڭ ەلىمىز­دە با­لاماسى جوق دەۋگە بولادى.

– بيىل ەلباسى نۇرسۇلتان نازارباەۆتىڭ تاپسىرماسى بو­يىنشا ۇلى جەڭىستىڭ 70 جىل­دىق مەرەيتويى ەلىمىزدىڭ بار­لىق وڭىرلەرىندە ەرەكشە اتاپ وتىلۋدە. شىعىس ءوڭىرى دە مەرەكەنى جوعارى دەڭگەيدە قارسى الدى. جالپى, شىعىس قازاقستاننان 170 مىڭنان اسا ادام مايدانعا الىنىپ, ولاردىڭ اراسىنان ەرلىگىمەن تاريحقا ەنگەن 109 كەڭەس وداعىنىڭ باتىرى, 22 داڭق وردەنىنىڭ تولىق كاۆالەرى شىقتى. بۇل – ەلىمىز بەن ءوڭىرىمىز­دىڭ باتىرلىعى مەن قاھارمان­دىعىنىڭ كورىنىسى. التايدىڭ تەمىرى مەن قورعانىسى جاۋعا وق بولىپ اتىلسا, التايدىڭ جاس ورەن­دەرى قايسار جاۋىنگەر بولىپ قان مايداندا شايقاستى. جانقيارلىقپەن جاۋعا اتويلاپ قارسى تۇرعان بوزداقتارىمىزدىڭ رۋحىنا تاعزىم ەتۋ ءۇشىن كۇرشىم اۋىلىندا داڭق مەموريالى بوي كوتەردى. بىزگە بۇل ەسكەرتكىش تاريحتان ءتالىم الۋ, كەلەشەك بۋىندى وتانشىلدىق رۋحتا تاربيەلەۋ ءۇشىن كەرەك, – دەدى وبلىس اكىمىنىڭ ورىنباسارى جاقسىلىق ومار. كۇرشىم اۋدانىنىڭ اكىمى التايبەك سەيىتوۆتىڭ ايتۋىنشا, كۇرشىم-مارقا وڭىرىنەن سو­عىستىڭ الدىڭعى شەبىنە 9456-دان استام ازامات اتتانعان ەكەن. ونىڭ ىشىندە 2462 جاۋىنگەر حابار-وشارسىز كەتسە, 2853 سارباز ماي­داندا وپات بولعان. مىنەكەي, وسى­ ۇلى وتان سوعىسىنان قايت­پاعان 5315 بوزداقتىڭ ەسىمى جاڭا­دان بوي كوتەرگەن داڭق مەموريالىنىڭ قابىرعالارىنا گاببرو مارمارعا ويىلىپ جازىلدى. قۇرىلىستىڭ جالپى قۇنى 65 ملن. تەڭگەنى قۇرادى. 5 گەكتار جەرگە ورنالاسقان كەشەن اۋماعى ەكى سەكتوردان تۇرادى. ياعني, مەموريال اۋماعى حالىقتىڭ سەيىلدەۋىنە دە قولايلى ورىن سانالادى. سەكتوردىڭ ءبىر جاعىنا گۇلزار, سۋبۇرقاق, ورىندىقتار مەن اللەيا ورىن تەپكەن. ال ەكىنشى جاعى – تاع­زىم الاڭى. قوس قاناتتىڭ ءدال ورتا­سىندا كوككە شانشىلعان ءتورت قىرلى ستەلا بار. دۇنيەنىڭ ءتورت بۇ­رىشى ۇعىمىن بەرەتىن ستەلانىڭ ۇزىندىعى 18 مەتر, اۋدانى 1,29 گەكتاردى قۇرايدى. ۇشار باسىنداعى جۇلدىزدىڭ نىشانى ءداستۇرلى ءدىني نانىمدار بويىنشا تىرشىلىك اتاۋلى مەن و دۇنيەدەگى كەڭىستىكتىڭ بايلانىسىن جەتكىزەدى. قۇرمەت تاقتاسىندا قان مايداندا قازا تاپقان جاۋىنگەرلەردىڭ اتى-جوندەرىنەن بولەك كۇرشىم اۋدانىنان شىققان كەڭەس وداعىنىڭ باتىرلارى, سوتسياليستىك ەڭبەك ەرلەرى, قازاقستاننىڭ ەڭبەك ەرى, جوعارى اسكەري جانە مەملەكەتتىك قىزمەتتە بولعان قايراتكەرلەر مەن تۇلعالاردىڭ ەسىمدەرى كورىنىس تاپقان. كەشەننىڭ ماڭدايىندا «ەش­كىم دە ولگەندەردى تىرىلتۋگە قۇدىرەتسىز, دەگەنمەن دە ولاردى ماڭگى ەستە ساقتاۋ – ءبىزدىڭ قاسيەت­تى پارىزىمىز» دەگەن ەلباسى نۇرسۇلتان نازارباەۆتىڭ ءسوزى ويىپ جازىلىپتى. اقىن سىرباي ماۋلەنوۆتىڭ سوعىس قاسىرەتىن بەينەلەگەن جىرى دا ەسكەرتكىشتىڭ ءمانىن اشا تۇسكەن. – ءومىر بويى ءبىرى اكەسىن, ءبىرى اتاسىن, ءبىرى اسىل جارىن كۇت­كەن اعا ۇرپاقتىڭ قاسىرەتى قايتالانباسىن, – دەستى سالتاناتتى شاراعا ورتاقتاسقان كۇرشىمدىك سوعىس ارداگەرلەرى احمەدكارىم احماديەۆ, جۇنىسقالي يحيەۆ. دۋمان اناش, «ەگەمەن قازاقستان». شىعىس قازاقستان وبلىسى, كۇرشىم اۋدانى.