تاعى ءبىر بەل اسقان قازاق قالامگەرىنىڭ حالىقارالىق اتاق-سىيلىقتارىن سانامالاپ شىعۋعا قوس قولىڭىزدىڭ ساۋساقتارى جەتە قويماس. مۇنىڭ ءوزى ءسابيت دوسانوۆتىڭ جازۋشىلىق ابىروي-بەدەلىنىڭ شەكاراسى بارعان سايىن كەڭەيە ءتۇسىپ وتىرعانىن ايعاقتاسا كەرەك ءارى بۇكىل قازاق ادەبيەتىنىڭ مەرەيى دەسەك ارتىق بولماس. ال ءبىزدىڭ توقتايتىنىمىز – تۇپتەپ كەلگەندە, «ەگەمەن قازاقستان» بەتتەرىندە ايتىلعان: «كۇنى-بۇگىنگە دەيىن 30 تومداي كوركەم شىعارما جازىپ-جاريالاعان ءسابيت شىعارماشىلىعى ءبىزدىڭ ۇلتتىق ادەبيەتىمىزدىڭ باعالى ۇلگىلەرىنىڭ ءبىرى» دەگەن اكادەميك سەرىك قيراباەۆتىڭ ابىز تۇجىرىمى. تاعدىرلى جازۋشىنىڭ وسىناۋ ءادىل باعاعا دا, بۇعان دەيىنگى سىيلى ماراپاتتارعا دا ابدەن ساي ەكەندىگى كەشەگى كەشتە ايقىن كورىندى.
ءسابيت ايمۇحان ۇلىن ساحنا تورىنە قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى, اقىن عالىم جايلىباي قولتىقتاي قۇرمەتتەپ الىپ شىققانىن حالقىمىزعا ءتان كورگەندىلىك بەلگىسى دەپ بىلدىك. باسقارما توراعاسى, سەناتور نۇرلان ورازالين پرەزيدەنت نۇرسۇلتان نازارباەۆتىڭ مەرەيگەرگە جولداعان قۇتتىقتاۋ حاتىن جاريا ەتىپ, وسىنداي اق تىلەك ارقالاعان جەدەلحاتتاردىڭ پارلامەنت سەناتىنىڭ توراعاسى ق.توقاەۆتان, قورعانىس ءمينيسترى ي.تاسماعامبەتوۆتەن, قازاقستاننىڭ رەسەيدەگى جانە گرۋزياداعى ەلشىلەرى م.ءتاجين مەن ە.ەرتىسباەۆتان, تاعى باسقالاردان كەلىپ جاتقانىن حابارلادى. ن.ورازالين اعا قالامداستىڭ بار ءومىرىن, قۇداي بەرگەن تالانتىن قازاقتىڭ كوركەم سوزىنە ارناپ, ادەبيەتتەگى وزىنە تيەسىلى بيىگىن انىقتاعانىن باسا ايتىپ, سونىمەن بىرگە داۋىرگە ءۇن قوسقان كوسەمسوزشىلىگىنە, ادەبيەتتەر اراسىنداعى التىن كوپىر, قازاق رۋحانياتىنىڭ ەلشىسى ەكەندىگىنە توقتالدى.
ولجاس سۇلەيمەنوۆ دوسى ءسابيتتى تۋعان كۇنىمەن قۇتتىقتاپ, قازاقتىڭ: «جاسا!» دەگەن جاقسى سوزىنە كوپ ماعىنا سىيعىزا, ۇزاق ءومىر سۇرۋگە, شىرايلى شىعارمالار تۋدىرۋعا تىلەكتەستىگىن ءبىلدىردى. الماتى جۇرتشىلىعىنىڭ ءىلتيپاتىن قالا اكىمىنىڭ ورىنباسارى زاۋرە امانجولوۆا, مەملەكەتتىك حاتشى گۇلشارا ابدىقالىقوۆانىڭ قۇتتىقتاۋىن كەڭەسشى وتەگەن ورالباەۆ, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ قۇتتىقتاۋىن وسى پارتيانىڭ الماتى قالالىق فيليالى توراعاسىنىڭ ءبىرىنشى ورىنباسارى كەنجەحان ماتىجانوۆ جەتكىزدى.
شەتەلدىك مەيماندار ىشىنەن قازاق جازۋشىسىنا تاجىك اقىن-جازۋشىلارى گۋلرۋحسور سافيەۆا مەن سوتتور تۇرسىن, «تۇرىكسوي» جانە تۇركيا جازۋشىلار وداعىنىڭ اتىنان سەركەن حاستۇرىك, قىرعىز تۋعانداردان قىرعىز عىلىم اكادەمياسىنىڭ ۆيتسە-پرەزيدەنتى ابدىلداجان اقماتاليەۆ, بەلگىلى قىرعىز اقىنى مارحاباي ااماتوۆ, سونداي-اق رەسەي جازۋشىلار وداعى باسقارما توراعاسىنىڭ ورىنباسارى, ماسكەۋ جازۋشىلار وداعىنىڭ توراعاسى ۆلاديمير بويارينوۆ, شولوحوۆ جانە تۆاردوۆسكي اتىنداعى سىيلىقتاردىڭ لاۋرەاتى, اقىن ليۋدميلا ششيپاحينا, اتاقتى بەلورۋس جازۋشىسى ولەس كوجەدۋب, ارميان جازۋشىسى ستانيسلاۆ وگەنيان, رەسەي اقىنى نينا پوپوۆا, قازاقستان پرەزيدەنتىنىڭ «رۋحانيات» سىيلىعىنىڭ لاۋرەاتى, فرانتسۋزدىق مەيمان البەرت فيشلەر مەن مادلەنا فيشلەر حانىم, ياكۋتيالىق قالامگەر يليا پەتروۆا, وزبەك جازۋشىسى مەحمانقۇل يسلامقۇلوۆ, ازەربايجان اقىنى ەلحان زال قاراحان اق تىلەكتەردىڭ ارناسىن اعىتتى. وسى مەيماندار تاراپىنان ءسابيت دوسانوۆ انتون دەلۆيگ اتىنداعى بۇكىلرەسەيلىك «زا ۆەرنوست سلوۆۋ ي وتەچەستۆۋ» سىيلىعىمەن, ش.ايتماتوۆ قورىنىڭ اتىنان ايتماتوۆ اتىنداعى حالىقارالىق سىيلىقپەن, سونداي-اق «قىرعىز ۇلتتىق تەاتر اكادەمياسىنىڭ اكادەميگى» اتاعىمەن ماراپاتتالدى. قازاق جازۋشىسى تۋرالى ماقالا تۇرىكتىڭ ءبىر ميلليون تارالىمى بار گازەتىندە باسىلعانىن دا وسى ارادا ەستىدىك. اق پەيىلمەن ايتىلعان باۋىرلاستىق سىرلاردا دا, شىن جۇرەكتەن ارنالعان جارقىن جىرلاردا دا تولاس بولعان جوق.
قوستاناي, الماتى, باتىس قازاقستان جانە وڭتۇستىك قازاقستان وبلىستارىنان دا مەرەيتوي يەسىنە ارنايى قۇتتىقتاۋلار مەن سىي-سىياپاتتار كەشىكپەي جەتتى. ايگىلى سىقاقشى كوپەن امىربەك اعا جازۋشىعا ءازىل شۋاعىن سىيلادى. جەزتاڭداي انشىلەرىمىز مايرا مۇحامەدقىزى, قابىلاش ابىكەي, نۇرعالي ءنۇسىپجانوۆ پەن شاحيزادا ءسابيت اعالارىن ءان قاناتىندا سامعاتتى. ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى ءسابيت دوسانوۆ جىرلارىنان شاشۋ شاشتى, «داۋىل» دراماسىنان كورىنىستەر قويىلدى. قۇرمانعازى اتىنداعى وركەستر كۇيىنىڭ اۋەنىمەن اسقاقتاتا ورىندالعان «كەنەسارى حاننىڭ سوڭعى ءسوزى» اتتى تولعاۋ-جىرى قازىنالى قالامگەردىڭ قازاق قالىبىنداعى قاسيەتىن مولىنان اڭعارتتى.
قورعانبەك امانجول,
«ەگەمەن قازاقستان».
سۋرەتتەردى تۇسىرگەن
ازامات قۇسايىنوۆ.
الماتى
