ماڭعىستاۋدا لەوپاردتى ولتىرگەن ادامعا قاتىستى قىلمىستىق ءىس قوزعالدى

اقتاۋ. 19 مامىر. ماڭعىستاۋ وبلىسىندا قاقپانعا تۇسكەن لەوپاردتىڭ ولىمىنە قاتىستى قىلمىستىق ءىس قوزعالدى. بۇل تۋرالى egemen.kz ءتىلشىسى حابارلادى. ايتا كەتەيىك, بۇعان دەيىن ماڭعىستاۋ وبلىسىندا قاقپانعا ورتا ازيانى مەكەندەيتىن لەوپارد تۇسكەن بولاتىن. وقيعا «كەندىرلى-قاياسان» تابيعي قورىعىندا بولعان. جەرگىلىكتى شارۋا قوجالىعىنىڭ شوپاندارى مالدارى جوعالا بەرگەن سوڭ, دالاعا قاقپان قۇرادى. الايدا, قاقپانعا قويشىلار ويلاعانداي قاسقىر ەمەس, لەوپارد تۇسكەنىن كورىپ, قورىقتىڭ ينسپەكتورلارىنا حابار بەرگەن. قۇرساۋدان بوساتپاق بولعاندا جىرتقىش ينسپەكتورعا تاپ بەرەدى. وسى كەزدە جىرتقىش مىلتىقپەن اتىپ ولتىرىلەدى. ال لەوپارد شابۋىلداعان ينسپەكتور بۇگىندە اۋرۋحانادا جاتىر. جويىلىپ بارا جاتقان بۇل اڭنىڭ سانى قازىر الەم بويىنشا مىڭعا دا جەتپەيدى. ورماندى مەكەندەيتىن لەوپارد ماڭعىستاۋعا تۇرىكمەنستان قورىعىنان اۋىپ كەلۋى مۇمكىن دەگەن بولجام ايتىلۋدا. قازىرگى تاڭدا اتالعان وقيعاعا قاتىستى «زاڭسىز اڭ اۋلاۋ» بابى بويىنشا قىلمىستىق ءىس قوزعالدى. «ادەيى اتقان بولسا, 3 جىلعا دەيىن باس بوستاندىعىنان ايىرىلۋى مۇمكىن. ال ءوزىن قورعاۋ ماقساتىندا اتسا, ايىپپۇل تولەيدى. مۇنى سوت شەشەدى», – دەيدى ماڭعىستاۋ وبلىستىق مامانداندىرىلعان تابيعات قورعاۋ پروكۋرورىنىڭ كومەكشىسى اسلان قوجيەۆ. گۇلايىم شىنتەمىرقىزى. دەرەك, سۋرەت: egemen.kz.