باتىس قازاقستاندا ات سپورتى تۇرلەرىنەن ەل چەمپيوناتى ءوتتى

ورال. 1 شىلدە. باتىس قازاقستان وبلىسى, زەلەنوۆ اۋدانى, اسان اۋىلىنداعى ات سپورتى تۇرلەرى بويىنشا وبلىستىق بالالار-جاسوسپىرىمدەر سپورت مەكتەبى بازاسىندا كوكپار, اۋدارىسپاق, تەڭگە ءىلۋ جانە جامبى اتۋدان جاستار اراسىندا ەل چەمپيوناتى مارەگە جەتتى. بۇل تۋرالى «قازاقپاراتقا» سىلتەمە جاساعان egemen.kz ءتىلشىسى حابارلادى. كوكپاردىڭ فينالىندا قىزىلوردالىقتاردان باسىم تۇسكەن وڭتۇستىكقازاقستاندىقتار جەڭىمپاز اتاندى. ءۇشىنشى ورىندى باتىسقازاقستاندىقتاردى 5:2 ەسەبىمەن ۇتقان جامبىل وبلىسىنىڭ كومانداسى يەلەندى. اۋدارىسپاقتان ءوز سالماق دارەجەلەرىندە وڭتۇستىكقازاقستاندىق ەلامان پەرنەبەك (50 كگ.), قىزىلوردالىق بەردىبەك جورابەك (60 كگ.), اقتوبەلىك شىڭعىسحان ەرجانوۆ (70 كگ.), وڭتۇستىكقازاقستاندىق ەسىمحان راحماتۋللا (80 كگ.), اقتوبەلىك سايات ساتىم (+80 كگ.) جەڭىس تۇعىرىنا كوتەرىلدى. تەڭگە ىلۋدەن اقتوبەلىك ءاليحان باشەنباي ۇزدىك شىقسا, جامبى اتۋدان وڭتۇستىكقازاقستاندىق ەرالحان ايكوز الدىنا جان سالعان جوق. جارىستىڭ جابىلۋ راسىمىندە وبلىس اكىمى نۇرلان نوعاەۆ اتا-بابامىزدان بەرى ۇزىلمەي جالعاسىپ كەلە جاتقان ۇلتتىق سپورت تۇرلەرىن ودان ءارى دامىتۋدىڭ قاجەتتىگىن اتاپ كورسەتىپ, بارلىق كوماندالارعا العىسىن ايتتى. ۇلتتىق سپورت تۇرلەرىنەن قازاقستاننىڭ مەملەكەتتىك جاتتىقتىرۋشىسى رامازان ساتتىباەۆ جارىستى وتكىزۋگە بەلسەنە اتسالىسقان ازاماتتارعا ۇلتتىق سپورت تۇرلەرى فەدەراتسياسىنىڭ العىسحاتتارىن تابىس ەتتى. ونىڭ سوزىنە قاراعاندا, جارىس قورىتىندىسىنا سايكەس ۇلتتىق قۇراما جاساقتالاتىن بولادى. تەمىر قۇسايىن. دەرەك, سۋرەت: «قازاقپارات».