فۋتبول. ەۋروپا ليگاسىندا قازاقستان تورەشىلەرى دە قازىلىق جاسايدى

استانا. 1 شىلدە. قازاقستاننىڭ فۋتبول تورەشىلەرى ەۋروپا ليگاسىنىڭ ىرىكتەۋ كەزەڭىندە قازىلىق ەتەدى. بۇل تۋرالى قازاقستان فۋتبول فەدەراتسياسىنىڭ ءباسپاسوز قىزمەتى حابارلادى. ەرتەڭ اتالعان ءتۋرنيردىڭ ءبىرىنشى ىرىكتەۋ كەزەڭى باستالادى. وسى سىندا «ساكسان» (مولدوۆا) مەن «اپوللون ليماسسول» (كيپر) كوماندالارى اراسىنداعى ويىندا قازاقستان قازىلارى قىزمەت كورسەتەدى. ناقتى ايتساق, مولدوۆا استاناسى – كيشينەۆ قالاسىندا وتەتىن ماتچتا تالدىقورعاندىق دەنيس يزمايلوۆ باس تورەشى بولىپ تاعايىندالدى. ال ونىڭ قاپتالداعى كومەكشىلەرى – ەۆگەني بەلسكي (تاراز) جانە اناتولي حودين (اتىراۋ). ءتورتىنشى تورەشى – قاراعاندىلىق ارتەم كۋچين. دەنيس يزمايلوۆ وتكەن ماۋسىمدا دا ەۋروپا ليگاسى ىرىكتەۋ ءتۋرنيرىنىڭ ماتچىندا قىزمەت اتقارعان ەدى. سونىمەن قاتار, توپتىق كەزەڭدە ارتەم كۋچيننىڭ جەتەكشىلىگىمەن «يانگ بويز» (شۆەيتساريا) – «سلوۆان» (سلوۆاكيا) ماتچىندا جۇمىس ىستەدى. بۇل ويىندا يزمايلوۆ تورەشىنىڭ قوسىمشا كومەكشىسى بولدى. ايتا كەتەيىك, بۇل سىندا ەلىمىزدىڭ نامىسىن ءۇش بىردەي كوماندا قورعايدى. شىمكەنتتىڭ «ورداباسى» كومانداسى ءوز الاڭىندا ءيزرايلدىڭ «بەيتارىن» قابىلدايدى. اتالعان ماتچ استانا ۋاقىتى بويىنشا 18:00-دە باستالادى. سونىمەن قاتار اقتوبەدە «اقتوبە» – «كاليۋ» (ەستونيا) ويىنى وتەدى. بۇل كەزدەسۋ ساعات 22:00-گە جوسپارلانعان. ءۇشىنشى كوماندا – الماتىنىڭ «قايراتى» سىرت الاڭدا «تسرۆەنا زۆەزدامەن» (سەربيا) كۇش سىناسادى. بۇل ويىن استانا ۋاقىتىمەن 3 شىلدە كۇنى ساعات 00:45-تە باستالادى. ەلامان قوڭىر. دەرەك, سۋرەت: قازاقستان فۋتبول فەدەراتسياسىنىڭ ءباسپاسوز قىزمەتى.