ەلباسىنىڭ «ءومىر وتكەلدەرى» اتتى سۇحبات كىتابى جارىق كوردى

استانا. 1 شىلدە. بۇگىن استانادا ەلباسى نۇرسۇلتان نازارباەۆتىڭ «ءومىر وتكەلدەرى» اتتى سۇحبات كىتابىنىڭ تۇساۋكەسەر ءراسىمى ءوتتى. كىتاپقا بەلگىلى جۋرناليست, «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆقا سوڭعى جىلدارى بەرگەن سۇحباتتارى توپتاستىرىلعان. سالتاناتتى شاراعا مەملەكەتتىك حاتشى گۇلشارا ابدىقالىقوۆا, پارلامەنت دەپۋتاتتارى جانە زيالى قاۋىم وكىلدەرى قاتىستى. بۇل تۋرالى egemen.kz حابارلادى. جالپى, كىتاپتا ەلباسى ءوزىنىڭ شىققان تەگىنەن باستاپ, بالالىق شاعى, مەكتەپتەگى كەزى, دنەپرودزەرجينسكىدەگى جاستىق جىلدارى, تەمىرتاۋداعى قۇرىش قۇيعان ساتتەرى تۋرالى اڭگىمەلەيدى. تۋىندى 16 تاراۋدان, 570 بەتتەن تۇرادى. ونى تاياۋدا ەلىمىزدىڭ بارلىق كىتاپحانالارىنان وقۋعا بولادى. جاڭا تۋىندى تۋرالى مەملەكەتتىك حاتشى: «تاۋەلسىز ەلىمىزدىڭ تۇڭعىش پرەزيدەنتى, الەمدىك دەڭگەيدە ءبىرتۋار تۇلعا, ەلباسى نۇرسۇلتان ءابىش ۇلى نازارباەۆتىڭ تاريحي ءومىرى جايىندا جازىلعان شىعارمالار قاتارى مازمۇنى تەرەڭ جاڭا تۋىندىمەن تولىعىپ وتىر. ەلباسىمىزدىڭ ءومىربايانى العاش رەت ءوزىنىڭ «ادىلەتتىڭ اق جولى» اتتى كىتابىندا باياندالعانىن بىلەمىز. قازاقستان پرەزيدەنتىنىڭ سودان كەيىنگى كىتاپتارىنىڭ بارلىعى ەلدىڭ ستراتەگيالىق دامۋ باعىتىنىڭ جەكەلەگەن تارماقتارىنا ارنالعانى ءمالىم. سوندىقتان «ءومىر وتكەلدەرى» مەملەكەت باسشىسىنىڭ تاۋەلسىزدىك العان 1991 جىلدان كەيىن ءوزى تۋرالى اڭگىمەلەگەن ەكىنشى كىتابى دەۋگە بولادى. شىعارمانىڭ قۇندىلىعى تۋرالى ايتار بولسام, ەلباسى مەن سۇحبات الۋشى اراسىنداعى ادەبي شىنايى اڭگىمەنىڭ ءوربۋى, ەگەمەندىك شەجىرەسىنە قاتىستى بۇرىن-سوڭدى ەستىمەگەن تىڭ دەرەكتەردىڭ ۇسىنىلۋى, «ۇشقان ۇيا ۇلاعاتى» اتتى تاراۋمەن باستالىپ, «نۇرلى جولعا» ۇلاسۋى سياقتى ومىرباياندىق سۇحباتتار تاريحي وقيعالارمەن ساباقتاستىرىلا رەت-رەتىمەن بەرىلۋى, سونداي-اق, ءوزارا ديالوگ بارىسىنداعى ينتەللەكتۋالدىلىق پەن قازاقتىڭ شۇرايلى ءتىلى وقىرماندى وزىنە تارتاتىن ەرەكشە تۇستارىنىڭ قاتارىنا جاتادى», – دەدى. ءوز كەزەگىندە شارا مودەراتورى, ەلباسى قىزمەتى تۋرالى بىرقاتار كىتاپتاردىڭ اۆتورى ماحمۋد قاسىمبەكوۆ پرەزيدەنتتىڭ جاڭا كىتابىنىڭ ەرەكشەلىكتەرىن ايتىپ بەردى. سونىمەن قاتار, بەلگىلى تۇلعالار – مىرزاتاي جولداسبەكوۆ, كەنجەعالي ساعاديەۆ, تولەۋتاي سۇلەيمەنوۆ جانە الەكساندر تاراكوۆ كىتاپ تۋرالى ءوز پىكىرلەرىن ءبىلدىردى. جاقسىباي سامرات. دەرەك: egemen.kz. سۋرەت: baq.kz.