تەستىلەۋ تارتىبىندە نەندەي وزگەرىس؟

بالالاردىڭ ءبىلىم دارەجەسىن تەستىلەۋمەن انىقتاپ, ولاردىڭ بولاشاعىنا باعدار بەرەتىن ۇبت ءوز دەڭگەيىندە جىل سايىن ارتىقشىلىقتارى جانە كەمشىلىكتەرىمەن ءوتىپ كەلەدى. بۇل تۇرعىدا لايىقتى باللدى جيناي الماي, كەلەشەككە سەنىمسىز قاراي باستاعان وقۋشىلاردىڭ پسيحولوگياسىنا سالماق بولار ءبىلىم جۇيەسىنە بيىلعى جىلى ءبىراز وزگەرىستەر ەنگەندىگىن بىلدىك. اتالعان تاقىرىپ ءتوڭى­رەگىندە, بىرىڭعاي تەستىلەۋگە ءبىر اي شاماسىندا ۋاقىت قال­عان كەزدە ءبىلىم جانە عىلىم مينيسترلىگى تاراپىنان بىرقاتار مالىمەتتەر بەرىلدى. پرەزيدەنت جانىنداعى ورتالىق كوممۋنيكاتسيالار قىزمەتىندە باس قوسقان مينيسترلىك وكىلدەرى اعىمداعى جىلدىڭ جاڭالىقتارىمەن تانىستىردى. ۇستىمىزدەگى جىلدان باستاپ كامەلەتتىك اتتەستاتقا ۇبت مەن ءپان بويىنشا جىلدىق باعا­نىڭ قورىتىندىسى ورتاشا اريفمەتيكالىق جيىنتى­عىنداعى قۇرامدىق باعامەن انىقتالاتىن بولادى, دەدى ءبىلىم جانە عىلىم مينيسترلىگى ءبىلىم جانە عىلىم سالاسىنداعى باقىلاۋ كوميتەتىنىڭ توراعاسى سايات ءنۇسىپوۆ. مۇنداي اتتەستاتتاۋ مەكتەپتىڭ جۇ­مى­سىن ءادىل باعالاۋعا, مەكتەپ بىتىرۋشىلەرگە تۇسەتىن پسي­حو­ەموتسيونالدىق جۇكتەمەنى ازايتۋعا مول ءمۇم­كىندىك بەرە­تىنىن ايتقان س.ءنۇسىپوۆ مەكتەپتە ۇزدىك وقى­عان وقۋشى تەستىلەۋ كەزىندە پسي­حولوگيالىق نەمەسە باسقا دا جاعدايلارعا باي­لانىستى تومەن بالل الىپ قالۋى مۇمكىن ەكەندىگىن, وسى تۇر­عىدا اتتەس­تاتقا ونىڭ تەستى­لەۋدەن جيناعان باعاسى تۇسە­تىندىگىن مىسالعا كەلتىرە وتىرىپ, وسى جۇيەنىڭ قازىرگى تاڭدا وزگەرگەندىگىن تار­قاتىپ ايتتى. باعانىڭ اريف­مەتيكالىق جيىنتىعى دەپ وتىرعانىمىز دا تاپ وسى, دەگەن كوميتەت ءتورا­عاسى, 5-كە وقىعان بالانىڭ تەس­تى­دەن 4 الىپ قالاتىن جاع­دايىندا, ونىڭ ورتا كورسەتكىشى 4,5 بولاتىندىعىن تىلگە تيەك ەتتى. سونىمەن قاتار, ول ەلىمىزدەگى جالپى سانى 155-ءتى قۇرايتىن تەست وتكىزۋ پۋنكتتەرىنە تاعى دا 10 پۋنكت قوسىلعاندىعىن ايتتى. بۇل ماسەلەنىڭ تاساسىندا بالالاردىڭ ءارتاراپتان اۆتوبۋسقا ءمىنىپ, ءبىرشاما جول ءجۇرىپ, تەستىلەۋ پۋنكتىنە شارشاپ جانە تولقىپ باراتىندىعى سەبەپ ەكەندىگىن جەتكىزدى. سول سەبەپتى دە, شالعاي وڭىرلەردە قوسىمشا پۋنكتتەر اشىلعان. سونداي-اق, لەكتەر سانىنىڭ ۇلعايۋى جانە ولارداعى تەستى­لەنۋشىلەر سانىنىڭ 600-گە دەيىن كەمۋى ەسەبىنەن, ۇبت وتكىزۋ مەرزىمى 2 اپتاعا ۇزارتىل­عاندىعىن اتاپ ءوتتى. سالىس­تىرمالى تۇردە وتكەن جىلى ۇبت مەرزىمى ءبىر اپتانى قۇراپ, لەكتەگى ءبىلىم الۋشىلار سانى 800-گە بارعان. ۇبت وتكىزۋ پۋنكتتەرىنە, تەست وتكىزۋدى باسقارۋ جانە باقىلاۋ ءۇشىن 2000 مينيسترلىك وكىلدەرى تاعايىندالدى. ولار ءار اۋديتورياعا بىرەۋدەن قاتى­سادى. بۇل تەحنيكالىق قۇرال­داردىڭ ۇزدىكسىز جۇمىس جا­ساۋىن قاداعالاۋ ءۇشىن دە ءتيىمدى, دەدى س.ءنۇسىپوۆ. سونى­مەن قاتار, ونىڭ ايتۋىنا قاراعاندا, جاسوسپىرىمدەردىڭ پسيحو­لوگيالىق جاس ەرەكشە­لىگىن ەسەپكە الا وتىرىپ, مەك­تەپ بىتىرۋشىلەر مەن ولاردىڭ اتا-انالارىنىڭ قاۋىپ­سىز­دىگىن قامتاماسىز ەتۋ جانە كۇي­زەلىسىن بارىنشا ازايتۋ ءۇشىن كوپشىلىكتىڭ نازارى­نا ۇسىنىلاتىن ۇبت قورىتىن­دى­سىنا شارتتى بەلگى قويى­لادى. ياعني, بۇرىنعى ءداستۇر بو­ي­ىنشا تەستىلەۋدەن سوڭ ونىڭ قورىتىندىسى اتى-ءجونى جا­زىلىپ, تاقتايشاعا ىلىنبەي­دى. ءار وقۋشىعا جەكە سايكەس­تەندىرۋ ءنومىرى جانە تەستىلە­نۋ­شىنىڭ جەكە كودى بەرىلەدى. ول ءبىتىرۋشىنىڭ اتى-ءجونىنىڭ ورنى­نا جازىلادى. ۇبت قورىتىن­دىسى ءبىر ۋاقىتتا ۇلتتىق تەستىلەۋ ورتالىعىنىڭ www.testcenter.kz سايتىندا جاريالاناتىن بولادى. بالالاردىڭ پسيحولوگيالىق احۋالى باستى نازاردا جانە ولاردىڭ كەلەشەككە دەگەن سە­نىم­دى قادامى ماڭىزدى ەكەن­دىگىن ايتا وتىرىپ, س.ءنۇسى­پوۆ وسىنىڭ اياسىندا اتا-انالار مەن مەكتەپ مۇعالىمدەرىنىڭ بالاعا قولداۋ كورسەتۋ قاجەتتىگىن كولدەنەڭ تارتتى. ەلميرا ماتىباەۆا, «ەگەمەن قازاقستان».