سارىاعاشتا قىزدارىن ءوز قولىمەن ولتىرگەن اناعا سوت ۇكىمى شىقتى

استانا. 1 شىلدە. وڭتۇستىك قازاقستاندا ەكى قىزىن بۋىندىرىپ ولتىرگەن ايەلگە وبلىستىق قىلمىستىق ءىس جونىندەگى مامانداندىرىلعان سوتى ۇكىم شىعاردى. ۇكىمدە قىلمىسكەر 20 جىلعا سوتتالعانى ايتىلعان. بۇل تۋرالى nur.kz حابارلادى. وبلىس تۇرعىنى وسى جىلدىڭ ءساۋىر ايىندا سارىاعاش قالاسىندا 2004 جانە 2006 جىلى تۋعان ەكى قىزىن اسا قاتىگەزدىكپەن ولتىرگەن بولاتىن. بەلگىلى بولعانداي ول قىزدارىن ەر ادامنىڭ گالستۋگىمەن بۋىندىرعان. سۋديانىڭ ايتۋىنشا, ول الدىمەن ۇلكەن قىزىن, ارتىنشا كىشى قىزىن ولتىرگەن. سۋديا ساميدين تەمىراليەۆ: «ايەل ايىبىن مويىنداپ اۋداندىق ىشكى ىستەر بولىمىنە ءوزى كەلگەن. وعان قىلمىستىق كودەكستىڭ 99-بابى 1,3,14-تارماقتارىنىڭ 2-ءبولىمى بويىنشا ايىپ تاعىلدى. سونداي-اق, تۋلاعانوۆانىڭ ايىبى سوتتا تولىقتاي دالەلدەندى. سوت وعان جالپى رەجىمدەگى كولونيادا 20 جىلعا جازاسىن وتەۋ ۇكىمىن شىعاردى», – دەدى. ايتا كەتەيىك, قىلمىسكەردىڭ تاعى ەكى ەرەسەك بالاسى بار. ولار تۋىسقاندارىنىڭ قولىندا تاربيەلەنۋدە. جەتكىنشەكتەردىڭ الداعى تاعدىرى سوتپەن شەشىلەتىن بولادى. ال سوتتالعان انا اتا-انالىق قۇقىعىنان ايىرىلۋى مۇمكىن. تالعات رايىمبەك. دەرەك, سۋرەت: nur.kz.