بيىل كۇزدە ەلباسى رەسمي ساپارمەن كۋباعا بارادى

استانا. 1 شىلدە. سىرتقى ىستەر ءمينيسترى ەرلان ىدىرىسوۆ كۋبا سىرتقى ىستەر ءمينيسترىنىڭ ورىنباسارى روحەليو سيەررا دياسپەن كەلىسسوزدەر جۇرگىزدى. كەزدەسۋ بارىسىندا تاراپتار ەكىجاقتى ىنتىماقتاستىقتىڭ قازىرگى جاعدايى مەن ونى ودان ءارى دامىتۋ بولاشاعىن, سونداي-اق, بيىلعى جىلدىڭ كۇزىنە جوسپارلانعان قازاقستان پرەزيدەنتى نۇرسۇلتان نازارباەۆتىڭ كۋبا رەسپۋبليكاسىنا رەسمي ساپارىنا دايىندىق ماسەلەلەرىن تالقىلادى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى. ەرلان ىدىرىسوۆ قازاقستان مەن كۋبانىڭ حالىقارالىق ۇيىمداردىڭ اياسىندا ءبىر-ءبىرىنىڭ باستامالارىنا ءداستۇرلى تۇردە ءوزارا قولداۋ تانىتىپ وتىرعانىن اتاپ ءوتتى. «بىرلەسكەن تىعىز ءوزارا ىقپالداستىقتىڭ ناتيجەسىندە كۋبا قازاقستان كانديداتۋراسىنىڭ 2017-2018 جىلدارى بۇۇ قاۋىپسىزدىك كەڭەسىنە تۇراقتى مۇشەلىگى, ال قازاقستان – كۋبانىڭ 2017-2019 جىلدارى بۇۇ-نىڭ ادام قۇقىقتارى جونىندەگى كەڭەسىنە قايتا سايلانۋ وتىنىمىنە قولداۋ بىلدىرەدى», – دەدى مينيستر. سونداي-اق, تاراپتار ءبىلىم, دەنساۋلىق ساقتاۋ جانە پارلامەنتارالىق ديالوگ سالاسىنداعى ىنتىماقتاستىقتى دامىتۋ تۋرالى پىكىرلەر الماسىپ, ولاردى قازاقستاندىق-كۋبالىق ءوزارا ارەكەتتەستىكتىڭ ەڭ الەۋەتتى باعىتتارى ەكەنىن ايتتى. كەزدەسۋ سوڭىندا قازاقستاننىڭ سىرتقى ساياسي ۆەدومستۆوسىنىڭ باسشىسى كۋبالىق تاراپقا ەكسپو-2017 كورمەسىن وتكىزۋ قۇقىعىن الۋ ءۇشىن استانا كانديداتۋراسىنا داۋىس بەرگەنى جانە ونىڭ جۇمىسىنا بەلسەندى قاتىسۋ شەشىمى ءۇشىن العىسىن ءبىلدىرىپ ءوتتى. ءسوز سوڭىندا مينيستر: «ءبىزدىڭ ويىمىزشا, بۇل كورمەنىڭ تابىستى وتۋىنە ەلەۋلى ۇلەسىن قوسىپ, جاڭعىرتىلاتىن ەنەرگيا كوزدەرى جانە جاسىل تەحنولوگيالاردى دامىتۋ سالاسىندا قازاقستاندىق-كۋبالىق بايلانىستاردىڭ كەڭەيۋىنە سەپتىگىن تيگىزەدى», – دەدى. ەلامان قوڭىر. دەرەك, سۋرەت: «قازاقپارات».