ەتنومادەني بىرلەستىكتەر قاتارىنا فين-ۋگورلار قوسىلدى. وبلىس ورتالىعىنداعى دوستىق ۇيىندە قازاقستان حالقىنىڭ بىرلىگى كۇنى جانە اسسامبلەيا جىلى اياسىندا فين-ۋگور بىرلەستىگىنىڭ تانىستىرىلىمى بولىپ ءوتتى. جاڭا ورتالىقتىڭ اشىلۋىنا وراي الىستاعى موردوۆيانىڭ مادەنيەت مينيسترلىگى, ماري ەل رەسپۋبليكاسىنىڭ پرەزيدەنتى قۇتتىقتاۋلارىن جولداپتى. ءبىزدىڭ وبلىس ورتالىعىنداعى فين-ۋگورلار ەتنومادەني بىرلەستىگىنىڭ اشىلۋىنا وراي ۋدمۋرتيادان ارنايى قوناقتار دا كەلدى.
الىس جولدان كەلگەن قوناقتاردىڭ ءبىرى ولگا يايتسوۆانىڭ ايتۋىنشا, قوناقجاي, بەيبىتشىلىك پەن ۇلتارالىق قاتىناستىڭ ۇلگىسى بولىپ تابىلاتىن قازاقستانعا كەلۋ – ۇلكەن مارتەبە. ەندى فين-ۋگورلار بىرلەستىگىنىڭ اشىلۋىمەن ەكىجاقتى دوستىق قارىم-قاتىناس ارتىپ, بارىس, كەلىسكە قۇرىلاتىن جاقسى بايلانىس جالعاساتىن بولادى. فين-ۋگورلار ەتنومادەني بىرلەستىگىندە وبلىستا تۇراتىن موردۆا, ۋدمۋرت, كومي-پەرمياك, ماري جانە ۆەنگرلەر بار. ال جالپى الەمدە فين-ۋگورلار دەپ ەكى توپقا بولىنەتىن حالىقتار قاتارىندا وسى تىلدە سويلەيتىن كومي, كومي-پەرمياكتار, ۋدمۋرتتار, ماريلار, كارەلدەر, فيندەر, ەستوندار, ۆەپستەر, ساامدار, موردۆا, يجورلار, بۋرتاستار, قاراتايلار, موكشاندار, چۋدتار, شوكشالار بولسا, ۋگورلار توبىندا ۆەنگرلەر, سەكەيلەر, چانعوشتار, حانتى-مانسىلار سياقتى ۇلىستار بار كورىنەدى.
فين-ۋگورلار حالقىنىڭ سانى 25 ميلليون دەپ ەسەپتەلەدى ەكەن. ءبىزدىڭ وبلىستا تۇرىپ جاتقان ساناۋلى عانا بۇل حالىق وكىلدەرى ەندى بىرگە باس قوسىپ, وزدەرىنىڭ دە بار ەكەنىن ءبىلدىرىپ, ءبىر ەتنومادەني بىرلەستىك قۇرعىلارى كەلەتىندىكتەرىن وتىنسە كەرەك. ەلباسى قۇرعان اسسامبلەيانىڭ شاپاعاتىن فين-ۋگورلار دا قولداپ, ءان-بيلەرىن, ۇلتتىق سالت-داستۇرلەرىن جيناپ, جيىستىرىپ بىرگە الا كەلىپتى. جىل سايىن وبلىستىق فيليالدا دوستىق ۇيىمەن بىرلەسىپ 400-دەن اسا ءىس-شارالار وتكىزىلەدى. بۇل كۇندەرى بۇل ۇيدە وبلىستىق قازاقستان حالقى اسسامبلەياسىنىڭ حاتشىلىعى, 23 ەتنومادەني بىرلەستىك, اسسامبلەيانىڭ جاستار بىرلەستىگى, ۇلتتىق وركەندەۋ مەكتەبى, «انا ءتىلى» تىلدەردى دامىتۋدىڭ وقىتۋ-ادىستەمەلىك ورتالىعى, «قازاق ءتىلى» قوعامى ورنالاسقان. سونىمەن قاتار, 20 ەتنوستىڭ مادەنيەتىن دارىپتەيتىن 42 شىعارماشىلىق ۇجىم جۇمىس ىستەيدى.
اۋدانداردا اسسامبلەيانىڭ 13 فيليالى, اۋىلداردى قوسقاندا 83 ەتنومادەني بىرلەستىك جۇمىس ىستەيدى. ال اسسامبلەيادا ءبىزدىڭ وبلىستان قىزمەت جاسايتىن 18 ەتنومادەني بىرلەستىك وكىلدەرى بار. جاقىندا «ايرەنيك» ارميان ەتنومادەني بىرلەستىگىنىڭ 20 جىلدىعى اتالىپ وتسە, پاۆلودار اۋدانى ەفرەموۆ اۋىلىندا كورەي ەتنومادەني بىرلەستىگىنىڭ فيليالى اشىلدى. 1996 جىلى ەتنو-لينگۆيستيكالىق مەكتەپ اشىلدى. قازىر بۇل مەكتەپتە وزگە ۇلت وكىلدەرىنىڭ ۇل-قىزدارى ءبىلىم الاتىن, ءوز انا تىلدەرىن ۇيرەنەتىن 16 ۇلتتىق وقۋ ءبولىمى بار, جىل سايىن 500-دەن استام وقۋشى وقيدى. سونداي-اق, «ەرتىس – دوستىق وزەنى» شەكارالاس ىنتىماقتاستىقتىڭ حالىقارالىق فەستيۆالىن وتكىزۋ داستۇرگە اينالدى. وبلىستىڭ قالالارى مەن اۋداندارىندا, كاسىپورىندارىندا قازاقستان حالقى اسسامبلەياسىنىڭ كۇنى بەكىتىلگەن.
ءسويتىپ, فين-ۋگورلار دا جەرگىلىكتى اسسامبلەياداعى 24-ءشى ەتنومادەني بىرلەستىك بولىپ ىرگە كوتەردى. ونى ولگا نيكولاشينا باسقارادى. جەرگىلىكتى اسسامبلەيانىڭ ءبىر بۇتاعى سەكىلدى بولىپ كوكتەم ايىندا قاتارعا قوسىلعان فين-ۋگورلار وكىلدەرى وزدەرىنىڭ ءماندى دە ءساندى ۇلتتىق كيىمدەرىن كيىپ كونتسەرت قويدى. داستارقان باسىنا جينالعان وزگە ۇلت وكىلدەرى فين-ۋگورلار جاساعان ۇلتتىق تاعامداردان ءدام تاتتى.
فاريدا بىقاي, «ەگەمەن قازاقستان».
پاۆلودار.
سۋرەتتەردى تۇسىرگەن ۆەرا ليۆينتسوۆا.
