ۆەلوسپورت. «ۆۋەلتا» كوپكۇندىگىنىڭ 1-كەزەڭىندە Astana 13-ورىننان كورىندى

استانا. 23 تامىز. كەشە ۆەلوسپورتتان ۆۋەلتا كوپكۇندىگى باستالدى. يسپانيادا ءوتىپ جاتقان سايىستىڭ العاشقى كەزەڭىندە قاتىسۋشىلار كوماندالىق سىندا شەبەرلىك بايقاستى. بۇل تۋرالى egemen.kz حابارلادى. دودادا ەل نامىسىن قورعايتىن Astana pro team كاسىبي ۆەلوكومانداسى ءبىرىنشى كەزەڭدى 13-ورىنمەن اياقتادى. الايدا, بۇل ناتيجە ۆەلوسپورتشىلاردىڭ جەكە كورسەتكىشتەرىنە اسەر ەتپەيتىنى بەلگىلى. سوندىقتان ناعىز تارتىس بۇگىن باستالادى دەۋگە تولىق نەگىز بار. ەكىنشى كەزەڭدە اتلەتتەر الاۋرين-دە-لا-توررە مەن كامينيتو-دەل-رەي ەلدىمەكەندەرىنىڭ اراسىن جالعاعان 158,7 شاقىرىمدىق جارىس جولىن ءجۇرىپ وتەدى. ءبىرىنشى كەزەڭدەگى كوماندالىق سىندا قاتىسۋشىلار 7,4 شاقىرىمعا سوزىلعان پۋەرتو بانۋسۋ مەن ماربەلي اراسىنداعى جولدى باسىپ ءوتتى. ناتيجەسىندە BMC ۆەلوكومانداسى توپ جاردى (8 مينۋت 10 سەكۋند). ءدال وسىنداي كورسەتكىشكە يە Tinkoff-Saxo جانە Orica-Green Edge كوماندالارى تيىسىنشە ەكىنشى, ءۇشىنشى ورىندارعا جايعاستى. ال 13-ورىننان كورىنگەن Astana جەڭىمپازدان 30 سەكۋندقا قالىپ قويدى. وسى سايىستا ءبىزدىڭ كوماندانىڭ ساپىندا ۆينچەنتسو نيبالي, فابيو ارۋ جانە ميكەل لاندا سىندى مىقتىلار بار ەكەنىن ەرەكشە اتاپ وتكەن ءجون. سوندىقتان جالپى ەسەپتە توپ جارۋعا تولىق مۇمكىندىك بار. جارىس 13 قىركۇيەكتە اياقتالادى. ەلامان قوڭىر. دەرەك: egemen.kz. سۋرەت: sport-xl.org.